PEIDEK KAN EN PAIPEL PASAPENGLA
Ia kahrepen Krais eh pahn pwurehng ketido?
Mwohn Sises Krais ketidahla nanleng nan pahr 33, e ketin inoukihda me e pahn pwurodo. E ketin karasahiong ih duwehte ohl lapalap men me seiloakla wasakis ahnsou reirei oh pwurodo pwehn kaunda nin duwen nanmwarki men. Kahrepen Krais eh pahn pwurehng ketido iei pwehn ketikihda koperment mwahu ehu ong aramas akan.—Wadek Luk 19:11, 12.
Sises pahn ketikihda koperment mwahu ehu ong aramas akan
Soangen kahlap dah me Krais sapwellimaniki ahnsou me e pahn pwurehng ketido? E ketin iasada nin duwen ngehn emen. (1 Pit. 3:18) Ih eri ketidahla nanleng oh ketidi ni palimaun en Koht. (Melkahka 110:1) Kedekedeo, Sises ahpw pakahrlahng mwohn Siohwa Koht, “me sapwellimanki mour poatopoato,” me ketikihong Sises manaman en kaunda tohnsampah. Eri Sises pahn ketido, kaidehn nin duwen aramas emen, ahpw nin duwen Nanmwarki soh sansal men.—Wadek Daniel 7:13, 14.
Dahme Sises pahn ketin wia ni eh pahn ketido?
Ni Sises eh pahn ketido ni soh sansal iangahki sapwellime tohnleng kan, e pahn ketin kadeikada tohnsampah. E pahn ketin kasohrala aramas suwed akan ahpw pahn ketikihong mour irail me kin pwungki sapwellime kaunda nin duwen Nanmwarki men.—Wadek Madiu 25:31-33; Melkahka 37:9-11.
Nin duwen Nanmwarki men, Sises pahn ketin kahrehiong sampah en wiahla paradais ehu. E pahn ketin kaiasada me melahr kan pwe ren kak ahneki mour nan Paradais nin sampah.—Wadek Melkahka 37:29; Sohn 11:25.