Sehdan me Kahrehda Mahwen oh Lokolok

Nan November 11, 1918, Mahwen Keieu en Sampah imwisekla. Wasahn pesines kan ritidi oh aramas akan wie kahkahlek nanial kan. Ahpw arail peren sohte werei. Kahpwal ehu me keper sang kesik wiawi mwuhr.

Soumwahu lusulus keper ehu me adaneki Spanish flu lelohng sounpei kan nan France nan June 1918. Sohte pwand, e sansalda uwen keper en soumwahu wet. Karasepe, erein sounpwong keite, soumwahu wet kemehla sounpei en Amerika kan nan France tohtohsang me kesikdi. Oh sounpei kan me iangada soumwahu wet wahla soumwahwo nan sapwarail ko mwurin mahweno imwisekla oh e mwadang kohpeseng nan sampah pwon.

Duhpek oh apwallahn pai en wehi pil wiawi nan sounpar kan mwurin mahweno. Mie duhpek laud nan pali laud en sapwen Iurop ahnsou me mahweno imwisekla nan pahr 1918. Nan pahr 1923, mwohni en Sehmen sohla kak doadoahk, de sohla kak pwainda mehkot. Sounpar weneu mwuri, pai en wehi nan sampah pwon mwadangete tikitikla. Oh mwuhr, nan pahr 1939, mahwen keriau en sampah tepida. E mwomwen pousehlahte mahwen keieu en sampah. Dahme kamwakid kahpwal laud pwukat en wiawi?

KILELEPEN IMWIN RAHN AKAN

Kokohp en Paipel sewese kitail en kilang dahme kin kahrehda ekei mwekid kan nan poadopoad, ahpw mehlel me pid Mahwen Keieu en Sampah. Sises Krais ketin kohpada duwen ahnsou ehu me “ehu sahpw pahn uhwong ehu sahpw,” lehk lapalap oh soumwahu lusulus pahn wiawi nin sampah. (Madiu 24:3, 7; Luk 21:10, 11) E mahsanihong sapwellime tohnpadahk ko me soangen kahpwal pwukat pahn wia kilel ehu en imwin rahn akan. Oaritik teikan duwen met mi nan pwuhken Kaudiahl, me kadokepene suwed en sampah ong mahwen me wiawi nanleng.—Menlau kilang koakon “Mahwen nin Sampah oh Mahwen Nanleng.”

Pwuhken Kaudiahl pil koasoia duwen soun dake oahs pahmeno, me ekei pak pil adaneki soun dake oahs pahmen en Apocalypse. Soun dake oahs silimeno kin karasaraskihong soangen kahpwal kohte me Sises ketin kohpada, me iei mahwen, lehk lapalap, oh soumwahu lusulus. (Menlau kilang koakon “Dahme Soun Dake Oahs Pahmeno Wiewia?”) E sansal me mahwen keieu en sampah tapiada ahnsou apwal ehu me saikinte imwisekla. Paipel pil kasalehda me Sehdan iei me tapiada kahpwal pwukat koaros. (1 Sohn 5:19) Ia duwe, eh manaman en kaunda pahn uhdi?

Pwuhken Kaudiahl pil padahkihong kitail me ahn Sehdan “ahnsou mwotomwotalahr.” (Kaudiahl 12:12) Ihme kahrehda e inenen lingeringer kowahlap oh kahrehda kahpwal laud nin sampah. Kahpwal laud kan me kitail kin kilang iei kadehdehpen ahn Sehdan ahnsou eh mwotomwotalahr.

KAUWEHLA DOADOAHK EN TEPILO

Mahwen Keieu en Sampah uhdahn wekidala irair en sampah. E kahrehda mahwen laud nin sampah. E kahrehda aramas akan en tapiada uhwong koperment oh sohla arail likilik ong kaun kan. E pil kihda mehn kadehde sansal duwen Sehdan eh piskensang nanleng. (Kaudiahl 12:9) Kaunen sampah menet me soh sansal kin mwekid likamwete kaun lemei men me ese me eh ahnsou en kaunda mwotomwotalahr. Ahnsou me eh kaunda pahn imwisekla, kahpwal kan me Mahwen Keieu en Sampah tapiada pahn uhdi.

Pwehki dahme Paipel kohpada, ke ahneki kahrepe mwahu en likih me Sises Krais, atail Nanmwarki nanleng, pahn ketin “kauwehla doadoahk en Tepilo” ni ahnsou keren. (1 Sohn 3:8) Aramas rar rar kei kin kapakapki Wehin Koht en pweida. Ia duwen kowe? Kitail uhdahn kalahnganki me Wehin Koht me pahn kahrehda aramas lelepek kan en kilang kupwuren Koht en pweida nin sampah, ahpw kaidehn dahme Sehdan mwahuki. (Madiu 6:9, 10) Pahn kaundahn Wehin Koht, mahwen me pidada sampah pwon de pil soangen mahwen teikan sohla pahn pwurehng mie. (Melkahka 46:9) Sukuhlki duwen Wehi wet oh nantihong ken iang mi ni ahnsowo me popohl pahn kadirehla sampah!​—Aiseia 9:6, 7.