Peidek Kan En Paipel Pasapengla

Ihs me uhdahn kakaun sampah wet?

Aramas tohto kamehlele me Koht mehlelo iei me kaun en sampah wet. Ahpw ma met mehlel, sampah wet pahn diren lokolok? (Deuderonomi 32:4, 5) Nin duwen me Paipel mahsanih, sampah wet mi pahn manaman en me Suwedo.​—Wadek 1 Sohn 5:19.

Ia duwen emen me suwed eh alehdi manaman pohn tohnsampah? Ni tepin poadopoad en aramas, tohnleng men uhwongada Koht oh kangoange tepin pwopwoudo en pil uhwongada. (Senesis 3:1-6) Tepin pwopwoudo pilada en peikiong tohnleng uhwong menet Sehdan oh wiahkihla ih ara kaun. Koht Wasa Lapalahpie kelehpw me sapwellimanki pwuhng en kaunda, ahpw e ketin kupwurki aramas akan en pilada sapwellime kaunda pwehki re poakohng ih. (Deuderonomi 6:6; 30:16, 19) E kansensuwed me Sehdan pitihdier pali laud en tohnsampah pwe ren wiahda pilipil suwedohte me tepin pwopwoudo pilada.​—Wadek Kaudiahl 12:9.

Ihs me pahn kamwahwihala ahn aramas kahpwal kan?

Ia duwe, Koht pahn mweidohng Sehdan en pousehlahte eh kaunda suwed? Soh. Koht pahn ketin doadoahngki Sises pwehn ketikihsang suwed me Sehdan wiahdahr.​—Wadek 1 Sohn 3:8.

Koht ketikihong Sises manaman pwehn ketin kasohrehla Sehdan. (Rom 16:20) Eri Koht pahn ketin kaunda tohnsampah oh ketikihong aramas akan mour nsenamwahu oh popohl me e ketin kupwurki nin tapio.​—Wadek Kaudiahl 21:3-5.