Dahme Kahrehda Ken Men Esehla Duwen Wehin Koht?

Aramas rar rar kei nan sampah pwon kin kamehlele me Wehin Koht kin kihong irail koapworopwor ong ahnsou kohkohdo. Re kin idawehn mehn kahlemeng en Sises me ketin padahkihong sapwellime tohnpadahk ko ren kapakapki: “Wehiomwi en ketido. Kupwuromwi en pweida nin sampah.”​—Madiu 6:10, King James Version.

E kapwuriamwei me aramas tohto uhdahn kin men esehla duwen Wehin Koht, ahpw pali laud en pelien lamalam kan kin mwomwen sohte nohn nsenohki. Karasepe, soupoad H. G. Wells kasalehda ia uwen kapwuriamwei me Sises kin uhdahn ketin kesempwalki padahk me e ketin kahdaneki Wehin Nanleng, ahpw pelien sarawi kan en Kristian sohte kasalehda nan arail padahk kan me re kesempwalki padahk wet.

Weksang pelien sarawi pwukat, Sounkadehdehn Siohwa kan uhdahn kesempwalki oh kin pakpakairki duwen Wehin Koht. Medewehla: Kahn Iroir wet me ke wie wadewadek kin wiawihda ni lokaia 220. Kereniong meh pahdep wenerar (46 million) kin wiawihda, kahrehda kisin pwuhk wet iei me keieu kohpeseng nan sampah. Ia oaralap me keieu kesempwal en pwuhk wet? Oaralapo pwon iei: Kahn Iroir Pakpakairki Wehin Siohwa.a

Dahme kahrehda Sounkadehdehn Siohwa kan kin doadoahk laud pwehn pakairki Wehin Koht? Ehu, re kin kamehlele me Wehin Koht iei oaralap en pwuhk me keieu kesempwal nan sampah, me iei Paipel. Patehng met, re kamehlele me Wehin Koht kelehpw me pahn kamwahwihala kahpwal kan me kin lelohng aramas akan rahnwet.

Sang ni arail kin pakairki duwen Wehin Koht, Sounkadehdehn Siohwa kan kin nantihong idawehn mehn kahlemeng en Sises. Ni Sises eh ketiket nin sampah, Wehin Koht iei me keieu kesempwal nan eh mour oh e pil wia oaralap keieu kesempwal nan sapwellime doadoahk en kalohk. (Luk 4:43) Dahme kahrehda Wehi wet uhdahn kesempwal ong Sises? Oh ia duwen eh kak wia mehkot me keieu kesempwal ong uhk? Se luke iuk ken tehk dahme Paipel sapengki met nan oaralap kan mwuhr.