PEIDEK KAN EN PAIPEL PASAPENGLA

Dahme kahrehda kitail anahne tamataman pwoulahn Sises?

Pwoulahn Sises wia ahnsou ehu me keieu kesempwal nan poadopoad. E ketin pwoula pwehn kapwurehdo mouren aramas nin duwen me Koht ketin kupwurki nin tapio. Aramas sohte kepikipikda pwe ren soumwahuda, mehla de ahneki ineng en wia dahme suwed. (Senesis 1:31) Ahpw dihp tepidohng sampah sang tepin aramas, Adam. Sises tounmeteikihla moure pwe en ketin doare kitail sang dihp oh mehla.​—Wadek Madiu 20:28; Rom 6:23.

Koht ketin kasalehda limpoak laud sang ni eh ketin poaronehdo sapwellime Ohlo nin sampah pwehn pwoukinkitailla. (1 Sohn 4:9, 10) Sises ketin padahkihong sapwellime tohnpadahk ko ren tamataman eh pwoula ni arail pahn wia kasarawih ehu me sohte nohn laud me iangahki pilawa oh wain. Arail kin wia met sounpar koaros kin kasalehda arail kalahnganki limpoak me Koht oh Sises ketin kasalehda.​—Wadek Luk 22:19, 20.

Ihs me pahn iang tungoale pilawao oh waino?

Tepin Sises eh ketin padahkihong sapwellime tohnpadahk ko ren tamataman eh pwoula, e mahmahsanih duwen inou ehu. (Madiu 26:26-28) Inou wet ritingadahng irail oh pil me malaulau teikan koapworopwor en iang Sises wia nanmwarki oh samworo nanleng. Mendahki me rar rar kei kin wia katamanpen pwoulahn Sises, irail kante me mi nan inowo me pahn iang tungoale pilawao oh waino.​—Wadek Kaudiahl 20:6.

Kereniong sounpar 2,000, Siohwa kin ketin pilada irail kan me pahn wia nanmwarki kei. (Luk 12:32) Re malaulau sang irail kan me pahn mour kohkohlahte nin sampah.​—Wadek Kaudiahl 7:4, 9, 17.