Ia Wasa Mwohni Kin Kohsang Ie Pwehn Apwalih At Doadoahk en Kalohk?

Sounpar koaros se kin wiahda oh kihpeseng Paipel oh sawaspen Paipel sapw kei. Se kin kauwada oh katanga ohpis en Sounkadehdehn Siohwa kan oh at wasahn wiahda pwuhk kan nan sampah pwon. Mwomwohdiso nen kei kin tuhpene nan Wasahn Kaudok kan me sohte nohn laud ahpw kaselel. Ihs me kin pwain soahng pwukat koaros?

Sawas en mwohni me aramas akan kin pein toukihda ihme kin utung at doadoahk. (2 Korint 9:7) Nan pahr 1879, keriaun Kahn Iroir me wiawihda koasoia me se kamehlele me SIOHWA iei me kin ketin utung doadoahk wet, oh pwehki kahrepe wet, se sohte kin oh sohte pahn peki sawas en mwohni sang rehn aramas. Se saikinte wekidala koasoandi wet.

Mwohni kan me aramas toukihda kin pekederlahngete ohpis en Sounkadehdehn Siohwa kan de kin kohdi nan koakon en sawas kan nan at Wasahn Kaudok kan. Ahpw se sohte kin peki eisek kis ehu de wahseli delen meirong, de kihong pweinen at doadoahk kan de nait pwuhk kan. Se sohte kin ale pweinen at kalohk, pweinen padahk nan mwomwohdiso, de pweinen at sewese kauwada wasahn kaudok kan. Sises mahsanih: “Nin duwen amwail aleier nin sohte pweipwei, kumwail pil kihwei nin sohte pweipwei.” (Madiu 10:8) Sounpapah koaros nan ohpis en Sounkadehdehn Siohwa kan oh nan at poasen kaun, iangahki Pwihn me Kin Apwalih Mwomwohdiso nan Sampah Pwon en Sounkadehdehn Siohwa kan, kin sohte mie pweinerail.

Sawas en mwohni kan me aramas kin toukihda pil kin kadoadoahk ong ahnsoun kahpwal laud kan. Tepin Kristian ko kin perenki sewesehki irail kan me lelohng apwal dahme re kak kihda. (Rom 15:26) Se pil kin sewese me lelohng apwal sang ni at pwurehng kauwada imwarail kan oh wasahn kaudok kan oh kihda mwenge, likou, oh sawas en wini.