Kadehdehda me Ke Loalopwoatohng Siohwa

1, 2. Dahme kahrehda e kapwuriamwei me Sonadan uhdahn kompoakepahnkihla Depit oh kolokolte eh loalopwoatohng ih?

SONADAN ele pwuriamweikihla ia uwen mwahnakapwo Depit eh eimah. Depit kemehla kodono Kolaiad oh wahdo ‘moangen Kolaiado’ rehn semen Sonadano, Sohl, me wia Nanmwarki en Israel. (1 Sam. 17:57) Sonadan sohte peikasalki me Koht kin ketin ieiang Depit, oh sangete ahnsowo, Sonadan oh Depit uhdahn kompoakepahnkihla emenemen. Ira inoukihda me ira pahn ahnsou koaros loalopwoatohng emenemen. (1 Sam. 18:1-3) Erein eh mour, Sonadan kin loalopwoatohng Depit.

² Sonadan kolokol eh loalopwoatohng Depit mendahki Siohwa ketin pilada Depit, a kaidehn Sonadan, en wiahla nanmwarki en Israel. Oh ni ahnsou me Sohl songosong en kemehla Depit, Sonadan pwunodikihda iengeo. E ese me Depit rukuruk nan sapwtehn me mi Ores, ih eri kohla wasao pwehn kangoange Depit en pousehlahte likih Siohwa. Sonadan ndaiong Depit: “Komw dehr masak mehkot. Ei pahpa Sohl sohte kak en kauweikomwihla. E ese mehlel me komwi me pahn wiahla nanmwarkien Israel oh ngehi me pahn keriaun kaun.”​—1 Sam. 23:16, 17.

3. Dahme Sonadan kesempwalki laudsang eh kin loalopwoatohng Depit, oh ia duwen atail ese met? (Menlau kilang tepin kilel.)

³ Kitail kin kalapw wauneki aramas me kin loalopwoat. Ahpw ia duwe, kitail wauneki Sonadan ihte pwehki e kin loalopwoatohng Depit? Soh, Sonadan eh loalopwoatohng Koht iei me keieu kesempwal nan eh mour. Ni mehlel, iei kahrepe wet me e loalopwoatohng oh sohte peirinki Depit, mendahki Depit pahn wiahla nanmwarki a kaidehn ih. Sonadan pil sewese Depit en koapworopworki Siohwa. Ira koaros kolokolte ara loalopwoatohng Siohwa oh emenemen. Ira kolokol ara inou me ira wiahdao: “KAUN-O pahn ketin kupwure pwe kowe oh ngehi, oh kadaudokomw kan oh pil kadaudokei kan, kitail en kin dadaurete inou sarawi me kita kauwadahr nanpwungata.”​—1 Sam. 20:42.

4. (a) Dahme pahn uhdahn kahrehiong kitail en peren oh nsenamwahu? (b) Dahme kitail pahn koasoiapene nan iren onop wet?

⁴ Kitail pil anahne “loalopwoat” ong atail peneinei, kompoakepatail kan, oh riatail Kristian kan nan mwomwohdiso. (1 Des. 2:10, 11, NW) Ahpw kesempwalsang koaros, kitail anahne loalopwoatohng Siohwa. Ih me ketikihong kitail mour! (Kaud. 4:11) Kitail kin uhdahn peren oh nsenamwahu ni atail kin loalopwoatohng ih. Ahpw kitail ese me kitail anahne loalopwoatohng Koht pil ni ahnsou apwal kan. Nan iren onop wet, kitail pahn koasoiapene ia duwen mehn kahlemeng en Sonadan eh kak sewese kitail en kolokolte atail loalopwoatohng Siohwa nan soangen irair pahieu: (1) ni ahnsou me kitail pehm me emen me ahneki manaman pohtail sohte warohng kitail en wauneki, (2) ni ahnsou me kitail anahne pilada ihs me kitail en loalopwoatohng, (3) ni brother men me kin tiengla mwowe nan mwomwohdiso eh sohte wehwehki kitail de kasalehda wiewia sapahrek, oh (4) ni ahnsou me kitail pehm me e apwal en kolokol inou ehu.

NI AHNSOU ME KITAIL PEHM ME EMEN ME AHNEKI MANAMAN POHTAIL SOHTE WAROHNG KITAIL EN WAUNEKI

5. Dahme kahrehda e apwal ong mehn Israel kan en loalopwoatohng Koht erein Sohl eh wia nanmwarki?

⁵ Sonadan oh mehn Israel kan mi nan irair apwal ehu. Semen Sonadano, Nanmwarki Sohl, sohla peik oh Siohwa ketin soikala ih. (1 Sam. 15:17-23) Ahpw Koht ketin mweidohngete Sohl en pousehlahte kaunda sounpar tohto. Eri e apwal ong aramas ako en loalopwoatohng Koht ma nanmwarkio me pilipildahr en mwohndiong “mwoahl me KAUN-O ketin kauwada” kin wiewia soahng suwed kan.​—1 Kron. 29:23.

6. Ia duwen atail ese me Sonadan kolokolte eh loalopwoatohng Siohwa?

⁶ Sonadan kolokolte eh loalopwoatohng Siohwa. Medewehla dahme Sonadan wia mwurinte Sohl tepida sapeikiong Koht. (1 Sam. 13:13, 14) Ni ahnsowo, lapalahn karis en sounpei en mehn Pilisdia kan iangahki wararail werennansapw 30,000 kohdohng mahweniong Israel. Nein Sohl sounpei meh wenepwikihte. Sohl oh Sonadan kelehpw me mie neira dipwisou en mahwen. Ahpw Sonadan sohte masepwehk. E tamanda dahme soukohp Samuel nda: “Pwehki mware lapalap, Siohwa sohte pahn likidmeliehla sapwellime aramas akan.” (1 Sam. 12:22, NW) Sonadan ndaiong emen sounpei: “E pahn ketin kupwure pwe kitail en powehdi, mehnda ma kitail me malaulau.” Eri ih oh sounpeio mahweniong ekei mehn Pilisdia ko oh kemehla mpen meh riehk. Sonadan pwoson Siohwa, oh Siohwa ketin kapaiahda ih. Siohwa ketin kahrehda rerrer en sapw en wiawi, oh mehn Pilisdia ko masepwehkada. Irail eri mahweniong oh kemehla emenemen, oh mehn Israel ko kana nan mahweno.​—1 Sam. 13:5, 15, 22; 14:1, 2, 6, 14, 15, 20.

7. Ia mwomwen ahn Sonadan wiewia ong semeo?

⁷ Mendahki Sohl pousehlahte sapeikiong Siohwa, Sonadan kin peikiongete semeo ni ahnsou kan me e kak. Karasepe, ira kin ehupene mahwen pwehn pere sapwellimen Siohwa aramas akan.​—1 Sam. 31:1, 2.

8, 9. Ia duwen atail kasalehda atail loalopwoatohng Koht ni atail kin wauneki irail kan me ahneki manaman?

⁸ Duwehte Sonadan, kitail kak loalopwoatohng Siohwa sang atail kin peikiong koperment en sapwatail ni ahnsou kan me kitail kak. Siohwa ketin mweidohng “pwungen wehi kan” en ahneki manaman pohtail, oh e ketin kupwurki kitail en wauneki irail. (Wadek Rom 13:1, 2.) Ihme kahrehda kitail en wauneki kaunen koperment men pil ni ahnsou kan me e sohte kin mehlel oh kitail pehm me e sohte warohng kitail en wauneki. Ni mehlel, kitail anahne wauneki koaros me Siohwa ketin mweidohng irail en ahneki manaman.​—1 Kor. 11:3; Ipru 13:17.

⁹ Olga,^[1] (Menlau kilang ire kan mwuri.) emen sister nan Palieir en Amerika, kasalehda eh loalopwoatohng Siohwa sang eh wauneki eh pwoudo mendahki eh pwoudo kin lemeiong ih. Ekei pak eh pwoudo sohte kin lokaiahiong ih de e pil kin ndaiong ih soahng kamedek kan pwehki eh wia Sounkadehdehn Siohwa men. Eh pwoudo pil ndaiong ih me e pahn kohkohsang ih oh wahsang neira seri ko. Ahpw Olga sohte “dupungkihong me suwed.” E wia uwen eh kak en wia lih pwopwoud mwahu men. E kin kukohng eh pwoudo, lopworada eh likou ko, oh apwalih ekei kisehn ahn eh pwoudo peneinei. (Rom 12:17) Oh ni ahnsou me e kak, e kin iang eh pwoudo mwemweitla rehn eh peneinei oh kompoakepah kan. Karasepe, ni ahnsou me eh pwoudo men kohla ni mehlahn eh pahpao nan kahnimw tohrohr ehu, Olga kaunopada soahng koaros me re anahne ong seiloako. Mwuhr, ni mehlao, e awih eh pwoudo likin imwen sarawio. Mwurin sounpar tohtohie, ahn Olga pwoudo tepida mwahu ong ih pwehki eh kin uhdahn kanengamahiong oh ahnsou koaros kasalehiong ih wahu. Met e kin kangoange Olga en kohla iang mihting kan oh pil kin tangahkihla ih wasao. Ekei pak e pil kin iang Olga towehda mihting kan.​—1 Pit. 3:1.

NI AHNSOU ME KITAIL ANAHNE PILADA IHS ME KITAIL EN LOALOPWOATOHNG

10. Ia duwen Sonadan eh ese ihs me e anahne loalopwoatohng?

¹⁰ Ni ahnsou me Sohl nda me e pahn kemehla Depit, Sonadan anahne wiahda pilipil apwal ehu. E men loalopwoatohng eh pahpao, ahpw e pil men loalopwoatohng Depit. Sonadan ese me Koht kin ketin ieiang Depit ahpw kaidehn Sohl, eri e pilada en loalopwoatohng Depit. E padahkihong Depit en rukula oh eri ndaiong Sohl dahme kahrehda Sohl anahne mweidohng Depit en mourla.​—Wadek 1 Samuel 19:1-6.

11, 12. Ia duwen atail limpoak ong Koht eh kin sewese kitail en pilada en loalopwoatohng ih?

¹¹ Alice, emen sister sang Australia, anahne pilada ihs me e pahn loalopwoatohng. Erein eh onohnopki Paipel, e ndaiong eh peneineio duwen soahng kan me e sukusukuhlki. E pil ndaiong irail me e sohte pahn iang irail wia kasarawien Krismas oh kawehwehda dahme kahrehda. Ni tapio eh peneineio nsensuwedkihla met, ahpw mwuhr re uhdahn lingeringerda pah. Re pehm me Alice solahr nsenohkin irail. Mwuhr eh nohnou nda me e solahr men pwurehng kilang Alice. Alice nda: “I pwuriamweila oh uhdahn nsensuwedla pwehki I uhdahn poakepoake ei peneineio. Ahpw mendahki met, I koasoanehdi me Siohwa oh sapwellime Ohlo me pahn keieu nan ei mohngiong, oh I papidaisla ni mihting tohrohr me wiawi mwurinte mwo.”​—Mad. 10:37.

¹² Kitail en dehr mweidohng atail loalopwoatohng soahng kan, duwehte pwihn en mwadong ehu, sukuhl, de sahpw, en kesempwalsang atail loalopwoatohng Siohwa. Karasepe, Henry kin perenki iang pwihn en eh sukuhlo mwadong en chess oh men eh sukuhlo en keieu nan mwadongo. Ahpw pwehki e kin mwadong ni imwin wihk koaros, e sohla itar eh ahnsou ong kalohk de towehda mihting kan. Henry nda me mwomwen eh loalopwoatohng eh sukuhlo kesempwalsang eh loalopwoatohng Koht. Ih eri pilada en uhdihsang mwadong en chess nan eh sukuhlo.​—Mad. 6:33.

13. Dahme pahn sewese kitail en pilada dahme kitail en wia ni ahnsou me kitail ahneki kahpwal en peneinei?

¹³ Ekei pak e kak apwal en loalopwoatohng emenemen tohn atail peneinei ni ahnsou ehute. Karasepe, Ken nda: “I kin men kaukaule mwemweitla rehn ei nohnou me mahlahr oh pil men en mi reht ekei pak. Ahpw ei nohnou oh ei pwoudo sohte kin ehupene.” E pousehla koasoia: “I sohte kak kaperenda emen a meteio en dehr nsensuwedki.” Ken medewe duwen dahme Paipel mahsanih oh esehda me nan soangen irair wet, e anahne kaperenda eh pwoudo oh loalopwoatohng ih. Ih eri diarada elen sawas ehu me eh pwoudo pwungki. Mwuhr, e kawehwehiong eh pwoudo dahme kahrehda e anahne kadek ong eh nohnou. E pil kawehwehiong eh nohnou dahme kahrehda e anahne wauneki eh pwoudo.​—Wadek Senesis 2:24; 1 Korint 13:4, 5.

NI BROTHER MEN EH SOHTE WEHWEHKI KITAIL DE KASALEHDA WIEWIA SAPAHREK

14. Ia duwen wiewiahn Sohl ong Sonadan eh sohte pahrek?

¹⁴ Kitail pil kak loalopwoatohng Siohwa ma brother men me kin tiengla mwowe nan mwomwohdiso kasalehda wiewia sapahrek. Koht ketin idihada Nanmwarki Sohl, ahpw ahn Sohl wiewia ong pein nah pwutako suwed. E sohte wehwehki dahme kahrehda Sonadan poakohng Depit. Eri ni Sonadan eh song en sewese Depit, Sohl uhdahn lingeringerda oh kanamenekihada nah pwutako mwohn aramas tohto. Ahpw Sonadan kasalehdahte wahu ong semeo. Ni ahnsowohte, e loalopwoatohng Siohwa oh pil Depit me Koht ketin pilada en uhd wiahla nanmwarkien Israel.​—1 Sam. 20:30-41.

15. Ma brother men kasalehda wiewia sapahrek ong kitail, dahme kitail pahn wia?

¹⁵ Nan atail mwomwohdiso rahnwet, brother kan me kin tiengla mwowe kin song en toupahrek ong koaros. Ahpw brother pwukat sohte unsek. Pwehki met, irail kakete sohte wehwehki ia kahrepen atail wiahda soahng ehu. (1 Sam. 1:13-17) Eri ma ehu rahn emen kasalehda wiewia sapahrek de sohte wehwehki kitail, kitail en kolokolte atail loalopwoatohng Siohwa.

NI AHNSOU ME KITAIL PEHM ME E APWAL EN KOLOKOL INOU EHU

16. Nan soangen irair dah kan me kitail anahne loalopwoatohng Koht oh dehr roporop ong pein kitail?

¹⁶ Sohl men Sonadan en uhd wiahla nanmwarki ahpw kaidehn Depit. (1 Sam. 20:31) Ahpw Sonadan poakohng Siohwa oh kin loalopwoatohng ih. Eri Sonadan sohte roporop ong pein ih, ahpw e wiahla kompoakepahn Depit oh kolokol eh inou ong ih. Ni mehlel, emen me poakohng Siohwa oh loalopwoatohng ih kin “kapwaiada dahme e inouki ahnsou koaros, mehnda ma e apwal.” (Mel. 15:4) Pwehki kitail kin loalopwoatohng Koht, kitail pahn kolokol atail inou kan. Karasepe, ma kitail pwungkipene mehkot rehn emen me pid pesines, kitail pahn wia dahme kitail pwungkihdahr, mehnda ma e apwalla. Oh ma mie kahpwal nan atail mouren pwopwoud, kitail pahn kasalehda atail poakohng Siohwa ni atail kolokolte atail loalopwoatohng atail pwoud.​—Wadek Malakai 2:13-16.

17. Ia duwen iren onop wet eh sewese iuk?

¹⁷ Kitail men duwehte Sonadan me kin loalopwoatohng Koht oh sohte roporop ong pein ih. Kitail en kolokolte atail loalopwoatohng riatail Kristian kan pil ni ahnsou kan me re kin kansensuwedihala kitail. Oh kitail en kolokolte atail loalopwoatohng Siohwa pil ni ahnsou apwal kan. Kitail eri pahn kaperenda Siohwa, oh iei met me kin keieu kaperenda kitail. (Lep. Pad. 27:11) Kitail kak uhdahn kamehlele me e pahn ahnsou koaros ketin wia dahme keieu mwahu ong kitail oh pil apwalih kitail. Nan iren onop en mwuhr, kitail pahn kilang dahme kitail kak sukuhlkihsang ekei irail me kin loalopwoat oh sohte loalopwoat ni mwehin Depito.