Dehr Manokehla en Kadekohng Mehn Liki kan

1, 2. (a) Kahpwal dah kan me mehn liki tohto kin lelohng rahnwet? (Menlau kilang tepin kilel.) (b) Mehn kataman dahieu me Paipel kihda, oh peidek dah kan me kitail pahn koasoiapene?

DAULIH sounpar 30 samwalahro, Osei,^[1] me saikinte wiahla Sounkadehdehn Siohwa men ahnsowo, mweselsang sapweo Ghana pwehn kousoanla Iurop. E nda: “I mwadang diarada me pali laud en aramas akan sohte nsenohkin ie. I pil uhdahn pwuriamweikihla uwen kopou en wasao. Ni ahnsou me I kohsang wasahn peidi en sompihro oh ahpwtehn pehmada uwen kopouo, I tepida sengiseng.” Pwehki Osei apwalki esehla lokaiahn wasao, e sohte kak diarada doadoahk mwahu mwurin sounpar ehu. Oh pwehki e pil dohsang sapweo, e kin pehm eh kelekelehpw oh loaleidkihda eh peneineio.

² Medewehla dahme ke men meteikan en wiahiong uhk ma ke mi nan soangen irairo. Ke uhdahn pahn kalahnganki ma tohnmwomwohdiso kan ni Wasahn Kaudok kin kasamwo iuk oh poakohng uhk sohte lipilipil wasa me ke kohsang ie de kilimwen poh dah. Ei mehlel, Paipel mahsanihong Kristian mehlel kan en kadek ong mehn liki kan. (Ipru 13:2) Eri kitail pahn tehkpene peidek pwukat: Ia sapwellimen Siohwa madamadau ong mehn liki kan? Kitail anahne wekidala atail madamadau ong mehn liki kan? Oh ia duwen atail kak sewese emen me kohsang ehu sahpw tohrohr en pehm me e iang kisehn atail mwomwohdiso?

IA SAPWELLIMEN SIOHWA MADAMADAU ONG MEHN LIKI KAN

3, 4. Nin duwen me Eksodus 23:9 kasalehda, dahme Koht kupwurki mehn Israel ko en kasalehiong mehn liki kan, oh dahme kahrehda?

³ Mwurin Siohwa ketin kapitala sapwellime aramas akan sang kalidu en mehn Isip ko, e ketikihong irail kosonned kan me padahkihong irail en kadekohng mehn liki kan me iangirailla. (Eks. 12:38, 49; 22:21) Pwehki mour sohte kin ahnsou koaros mengei ong mehn liki kan, ni limpoak Siohwa kin ketin apwalih irail. Karasepe, re kak rikpene luhwen wahnsapw kan me soundolung kan sohte rikada.​—Lip. 19:9, 10.

⁴ Siohwa sohte ihte ketin kehkehlikihong mehn Israel ko en wauneki mehn liki kan, e kupwurki irail en tamataman ia arail pepehm ni ahnsou me re wia mehn liki kei. (Wadek Eksodus 23:9.) Pil mwohn mehn Israel ko wiahla lidu kei nan Isip, mehn Isip ko sohte kin perenki irail pwehki ar weksang irail. (Sen. 43:32; 46:34; Eks. 1:11-14) Mouren mehn Israel ko uhdahn apwal ni ahnsou me re wia mehn liki kei. Siohwa kupwurki irail en tamataman ahnsowo oh ren kin kadekohng mehn liki kan.​—Lip. 19:33, 34.

5. Dahme pahn sewese kitail en kadekohng mehn liki kan duwehte me Siohwa kin ketin wia?

⁵ Siohwa sohte ketin wekila. Eri ni mehn liki kan ar kin kohdo ni atail mwomwohdiso, dehr manokehla me Siohwa kin ketin kasalehdahte kadek ong irail. (Deud. 10:17-19; Mal. 3:5, 6) Nna uhdi oh medewehla duwen kahpwal kan me mehn liki kan kin ahneki. Karasepe, mwein re sohte wehwehki lokaiahn sapwatail oh ele aramas kin kasalehda wiewia sapahrek ong irail. Kitail en nantihong sewese oh kadekohng irail.​—1 Pit. 3:8.

KITAIL ANAHNE WEKIDALA ATAIL MADAMADAU ONG MEHN LIKI KAN?

6, 7. Dahme kasalehda me tepin Kristian kan sukuhlki en powehdi arail kin uhdahn lipilipilki aramas?

⁶ Tepin Kristian ko sukuhlki en powehdi arail kin uhdahn lipilipilki aramas, irair ehu me mehn Suhs tohto kin wia. Ni Pendekos 33, Kristian mehn Suhs kan me kousoan nan Serusalem kin kadekohng oh nsenohki me kapw kan me kohsang sahpw teikan. (Wiewia 2:5, 44-47) Met kadehdehda me Kristian mehn Suhs ko wehwehki ia wehwehn en kadekohng mehn liki kan.

⁷ Ahpw erein ahnsowo, mie mehkot wiawi. Mehn Suhs ko me ese lokaiahn Krihs kaulimki me wiewia sapahrek lelohng liohdi kan nanpwungarail. (Wiewia 6:1) Pwehn kapwungala irairo, wahnpoaron ko pilada ohl isimen en kohla oh tehk mwahu me met en dehr wiawihong emen. Wahnpoaron ko pilada ohl akan me adarail ko eden mehn Krihk, mwein pwehn sewese liohdi ko ren dehr nohn soansuwed.​—Wiewia 6:2-6.

8, 9. (a) Dahme kahrehda kitail anahne tehk ma kitail kin lipilipilki aramas de soh? (b) Dahme kitail anahne kihsang rehtail? (1 Pit. 1:22)

⁸ Mehnda ma kitail ese de soh, atail tiahk kin uhdahn kamwakid kitail koaros. (Rom 12:2) Oh ele kitail pil kin rong mehn mpatail kan, iengetail tohndoadoahk, de tohnsukuhl kan nda soahng suwed duwen aramas akan me tikida ehu wasa, oh arail keinek de pohrail weksang kitail. Ia uwen atail kin mwekidki madamadau sapwung pwukat? De dahme kitail pahn wia ni emen eh kemenkouruhrki wasa me kitail kohsang ie de ekei atail tiahk?

⁹ Mie pak me Piter kasalehda eh lipilipilki aramas me kaidehn mehn Suhs. Ahpw kedekedeo e sukuhlki en kihsang soangen madamadau sapwung pwukat. (Wiewia 10:28, 34, 35; Kal. 2:11-14) Pil duwehte, ma kitail tehkada me mie pil kisin pepehm en lipilipilki aramas rehtail, kitail anahne doadoahk laud pwehn kihsang douluhl soangen pepehm wet. (Wadek 1 Piter 1:22.) Dahme kak sewese kitail en wia met? Tamataman me sohte emen rehtail warohng ale komourpatail oh kitail koaros sohte unsek, sohte lipilipil sahpw dah me kitail kohsang ie. (Rom 3:9, 10, 21-24) Eri sohte kahrepen atail en medewe me kitail mwahusang meteikan! (1 Kor. 4:7) Kitail anahne ahneki soangen madamadauohte me Pohl ahneki. E ndaiong rie Kristian kan me re “solahr wia mehn liki de tohn wehin liki” kei ahpw re wia “kisehn sapwellimen Koht peneinei.” (Ep. 2:19) Kitail koaros anahne doadoahk laud pwehn kihsang madamadau en lipilipilki aramas pwe kitail en kak pwuhriong nan mour kapwo.​—Kol. 3:10, 11.

IA DUWEN ATAIL EN KADEKOHNG MEHN LIKI KAN

10, 11. Ia duwen Pohas eh kahlemengih sapwellimen Siohwa madamadau ong mehn liki kan?

¹⁰ Ohl lelepeko Pohas kahlemengih sapwellimen Siohwa madamadau ong mehn liki kan. Ia duwen? Ni ahnsou me Pohas kolahng tehk eh mwahto erein ahnsoun dondol, e tehkada Rud, mehn liki men sang Mohap. Rud wie doadoahk laud rikirik kadok en parli kan. Pahn Kosonned en Moseso, Rud ahneki pwuhng en rikada luhwen wahnsapw kan. Ahpw ni Pohas eh rongada me Rud pekihda mahs ma e kak rik luhwen parli kan nan eh mwahto, e uhdahn pwuriamweikihla oh mweidohng Rud en pil rik luhwen parli kan ni kapakap en parli kan.​—Wadek Rud 2:5-7, 15, 16.

¹¹ Dahme wiawi mwuhr uhdahn kasalehda me Pohas nsenohki Rud oh irair apwal me e mi loale nin duwen mehn liki men. E ndaiong Rud en mi rehn nah pwihn en lih pwulopwul kan pwe ohl ako me doadoahk nan mwahto en dehr lidere ih. E pil tehk mwahu me Rud pahn ale mwenge oh pihl me itar ong ih, duwehte me nah tohndoadoahk ko kin ale. Pohas kasalehda wahu ong lih semwehmwe menet oh pil kangoange ih.​—Rud 2:8-10, 13, 14.

12. Ia duwen kadek eh kak kamwakid mehn liki kan?

¹² Pohas kadekohng Rud kaidehn ihte pwehki Rud kin kasalehiong eh mwaho, Naomi, limpoak poatopoat, ahpw pwehki e tepida papah Siohwa oh kilangwohng Ih nin duwen perepe. Ni ahnsou me Pohas kadekohng Rud, e kin kahlemengih sapwellimen Siohwa limpoak poatopoat. (Rud 2:12, 20; Lep. Pad. 19:17) Pil duwehte rahnwet, ni ahnsou me kitail kin kadek, ele kitail pahn kak sewese “aramas koaros” en esehla padahk mehlel oh kilang me Siohwa uhdahn ketin poakohng irail.​—1 Tim. 2:3, 4.

13, 14. (a) Dahme kahrehda kitail anahne rahnmwahwih mehn liki kan ni atail Wasahn Kaudok? (b) Dahme kak seweseiuk en soanamwahu ni omw lokaiaiong emen sang ehu sahpw tohrohr?

¹³ Kitail kak kadekohng mehn liki kan sang ni atail kin rahnmwahwih irail ni atail Wasahn Kaudok. Irail kan me keseula ehu sahpw tohrohr ele kin ekei pak namenek oh kelekelehpw. Pwehki arail tiahk de ma irail lapalap de soh, ele re pahn pehm me re sohte kesempwal sang aramas akan sang sahpw teikan. Eri kitail me pahn rahnmwahwih irail mahs oh kadekohng oh nsenohki mehlel irail. Ke kak doadoahngki JW Language app pwehn seweseiuk en esehla ia duwen omw pahn rahnmwahwih irail ni pein arail lokaia.​—Wadek Pilipai 2:3, 4.

¹⁴ Mwein ke pahn soansuwedki lokaiaiong emen me kohsang ehu sahpw tohrohr. Pwehn powehdi soangen pepehm wet, ke kak ndaiong ih duwen pein kowe. Ele ke pahn diarada me e pil kin perenki soahng kan me ke perenki. Tamataman me tiahk en ehuehu sahpw kin mie pein arail kehl oh luwet akan.

KASAMWO KOAROS

15. Dahme pahn sewese kitail en wehwehki irail kan me nanti en ahnla sapw kapw ehu?

¹⁵ Pwehn sewese meteikan ren pehm me re iang kisehn omw mwomwohdiso, pein idek rehmw, ‘Ma I mi nan ehu sahpw tohrohr, dahme I pahn men meteikan en wiahiong ie?’ (Mad. 7:12) Kanengamahiong irail kan me kin nantihong ahnla sahpw kapw ehu. Ni tapio, mwein kitail sohte nohn wehwehki dahme re kin medemedewe de ia duwen arail kin mwekidki mehkot. Pwehn dehr kasik me irail en ahneki soangen madamadau oh wiewia me duwehte aramas en atail wasa, kitail sou kasamwohte irail?​—Wadek Rom 15:7.

16, 17. (a) Dahme kitail kak wia pwe kitail en karanihala irail kan me kohsang ehu sahpw tohrohr? (b) Sawas dahieu me kitail kak sewesehki irail kan me keseudo nan atail mwomwohdiso?

¹⁶ Ma kitail kin kihong ahnsou en sukuhlki duwen sahpw ehu de tiahk en arail wasa, ele e pahn mengei ong kitail en esehla irail. Erein kaudok en peneinei, kitail kak wia roporop duwen tiahk en irail kan me keseudo nan atail mwomwohdiso de wasahn kalohk. Pil ehu ahl en karanihala mehn liki pwukat iei en luke irail en kohdo iang kitail mwenge ni imwatailo. Siohwa ketin “ritingadahng mehn liki kan elen pwoson,” eri kitail anahne kahlemengih oh ritingada imwatail ong mehn liki kan me “kisehn atail pwoson.”​—Wiewia 14:27; Kal. 6:10; Sohp 31:32.

¹⁷ Ni atail kin iang peneinei ehu me kohsang ehu sahpw tohrohr, met pahn sewese kitail en wehwehki oh kesempwalki arail nannanti en ahnla atail tiahk. Ele kitail kin kilang me re anahne sawas en sukuhlki atail lokaia. Kitail pil kakete sewese irail en kilang pwihn dah kan me kak sewese irail en diarada ihmw oh doadoahk me mwahu. Soangen sawas pwukat kak uhdahn sewese riatail Kristian kan.​—Lep. Pad. 3:27.

18. Mehn kahlemeng mwahu dah me pid wahu oh kalahngan me mehn liki kan rahnwet kak alasang?

¹⁸ Ahpw, irail kan me keseudo atail wasa pahn men wia uwen arail kak en ahnla tiahk en sahpw kapwo. Rud kasalehda mehn kahlemeng mwahu. Keieu, e kasalehda wahu ong tiahk en wasao me e kousoanla sang ni eh pekihda mahs en iang rik kadok en parli kan. (Rud 2:7) E sohte isanekihla pwuhng wet me e ahneki de pehm me meteikan anahne kihong ih mehkot. Keriau, e mwadang en ndaiong meteikan me e kalahnganki kadek me irail kasalehiong ih. (Rud 2:13) Ni mehn liki kan ar kin kasalehda soangen wiewia wet, riarail Kristian kan oh aramas en wasao pahn uhdahn wauneki irail.

19. Kahrepe dah kan me kitail anahne kasamwo mehn liki kan?

¹⁹ Kitail uhdahn perenki me Siohwa ketin kasalehiong kitail kadek kalahngan oh mweidohng aramas koaros en esehla duwen rongamwahwo. Ekei sohte kin kak onop Paipel de towehda mihting rehn sapwellimen Siohwa aramas akan nan sapwarailo. Ahpw met pwehki re ahneki ahnsou mwahu en tuhwong kitail, kitail anahne sewese irail pwe ren deh pehm me irail mehn liki kei. Mwein kitail sohte nohn kepwehpwe de pil sohte nohn kak sewese irail, ahpw ni atail kin kadekohng irail, kitail kin kahlemengih sapwellimen Siohwa limpoak ong irail. Nin duwen aramas kei me kin kahlemengih Koht, kitail en wia uwen atail kak en kasamwo mehn liki kan!​—Ep. 5:1, 2.