Sapwellimen Koht Kisakis Keieu Laud Dahme Kahrehda E Uhdahn Kesempwal?

IHS ME KETIKIHDA?

Ekei kisakis kin kesempwal pwehki e kin kohsang rehn emen kaun de emen me kitail kin uhdahn wauneki. Ekei kisakis, mehnda ma pweitikitik pil kin kesempwal pwehki e kin kohsang rehn emen kisehn atail peneinei me kitail kin poakohng de kompoakepatail men me kitail kin likih. Met duwehte en Russell kisakis ong Jordan, me pwarada nan iren mwoweo. Ia duwen met eh pidada kisakis en pweinen pweipwei sapahlo?

Keieu, Paipel mahsanih me Koht “ketin poaronedohng sampah Sapwellime Iehros, pwe kitail en kak mourkihla.” (1 Sohn 4:9) Ire mehlel wet me kahrehda kisakis wet eh uhdahn kesempwal. Sohte emen me ahneki manaman laudsang Koht. Me pid duwen Siohwa, sounmelkahkahn Ipru men ntingihedi: “Komwi, me mwarenki Siohwa, komwi kelehpw me Keieu Lapalap pohn sampah koaros.” (Melkahka 83:18, NW) Kitail sohte kak alehdi kisakis ehu sang rehn emen me lapalap sang ih.

Keriau, Koht iei ‘Samatail.’ (Aiseia 63:16) Ia duwen? E ketikihong kitail mour. Patehng met, e kin ni loalopwoat apwalih kitail duwehte pahpa limpoak men me kin apwalih nah seri kan. Ni eh mahsanih duwen ekei sapwellime aramas en mahs ako me duwehte Epraim, Koht ketin kalelapak: “Ia duwe, Epraim kaidehn nei seri kesempwal, seri me I kin poakohng? . . . Ihme kahrehda ei pepehm kan kin perenkihda ih. Oh I uhdahn pahn mahkohng ih.” (Seremaia 31:20, NW) Koht kin ketin sapwellimanki soangen pepehmohte ong sapwellime tohnkaudok kan rahnwet. E sohte wiahte Sounkapikpatail wasa lapalahpie ahpw e pil ketin wia Samatail oh Kompoakepatail me loalopwoat. Ia duwe, met sou kasalehda me sohte lipilipil en kisakis me kohsang reh kin uhdahn kesempwal?

DAHME KAHRHEDA E KETIKIHDA?

Ekei kisakis kin kesempwal pwehki e kin kohda kaidehn ni idihd ahpw sang ni limpoak mehlel. Emen me sohte kin roporop ni eh kin kihkihwei sohte kin kasik me e pahn alehdi pweinen eh kadek.

Koht ketikihda sapwellime Ohlo ong kitail pwehki e ketin poakohng kitail. Paipel mahsanih: “Iet duwen en Koht eh ketin kasalehda sapwellime limpoak ong kitail: pein ih ketin poaronedohng sampah Sapwellime Iehros.” Ia kahrepen eh ketin wia met? “Pwe kitail en kak mourkihla.” (1 Sohn 4:9) Ia duwe, Koht ketin idihdiong en wia met? Soh douluhl! “Pweinen pweipwei sapahlo me Sises Krais ketin pwainlao” iei kasalepen sapwellimen Koht “kalahngan.”​—Rom 3:24, NW.

Dahme kahrehda sapwellimen Koht kisakiso wia wiewiahn “kalahngan” ehu? Paipel kawehwehda: “Koht ketin kasalehiong kitail ia uwen laud en sapwellime limpoak ong kitail: pwe ni ahnsou me kitail mihmi nan dihp, Krais ketin pwoukinkitailla!” (Rom 5:8) Limpoak soh roporop me kamwakid Koht en ketin sewese aramas luwet, soh sawasparail, oh dipan kan. Kitail sohte warohng alehdi limpoak wet oh kitail pil sohte kak kapwungohng ih. Sapwellime kisakiso iei kasalepen limpoak me keieu laud nan poadopoad.

TOUNMETEI DAH ME WIAWIHDA?

Ekei kisakis kin kesempwal pwehki e kin kasalehda tounmetei laud sang rehn aramaso me kihda kisakiso. Ni ahnsou me aramas emen kin toukihda mehkot me uhdahn kesempwal ong ih oh kihong kitail, kitail kin uhdahn kesempwalki kisakiso pwehki eh tounmetei.

Koht ketikihda “sapwellime Iehros.” (Sohn 3:16) Sohte emen me kesempwal sang sapwellime Iehroso me e kak ketikihong kitail. Erein ahnsou reirei me Koht ketin kapikapikada lahng oh sampah, Sises ketiket limwah oh ieiang ih doadoahk oh wiahla “emen me e kin ketin poakohng.” (Lepin Padahk 8:30, NW) Sises iei sapwellimen Koht “Iehros kompoak” oh “kasalepen Koht me soh sansal.” (Kolose 1:13-15) Sohte soangen kerenpene ieu mie me kak pwarada nanpwungen soahng momour loalokong kan me duwehte Siohwa oh Sises.

Ahpw, Koht “sohte ketin kisekoleki Sapwellime Iehros.” (Rom 8:32) Siohwa ketikihong kitail sapwellimeo me e kin ketin keieu kesempwalki. Sohte kisakis ehu me kak pwainohng ih laudsang met.

KAITARALA ANAHN KESEMPWAL EHU

Ekei kisakis kin kesempwal pwehki re kin kaitarala anahn kesempwal ehu, pil anahn karuwaru kan. Karasepe, ia uwen omw pahn kalahngankihong emen me toukihda en pwainla wini ehu me pahn doarehla omw mour me ke sohte kak pwainda! Kisakiso uhdahn pahn kesempwal, kaidehn?

“Pwe duwen aramas koaros ar kin mehkihla ar miniminiong Adam, ih duwen koaros pahn iasadahng mour pwehki ar miniminiong Krais.” (1 Korint 15:22) Nin duwen atail wia kadaudok en Adam, kitail koaros kin lelohng ‘mehla,’ sohte kak pitsang medek en soumwahu oh mehla de pil pwungla rehn Koht oh saledeksang atail sapwung mwohn silangi. Oh nin duwen aramas tikitik kei, kitail sohte kak wiahiong pein kitail de meteikan en ‘momour.’ Paipel kasansalehda: “Sohte me kak kapitala pein ih; sohte me kak patohwanohng Koht pweinen eh mour, pwe pweinen mour me nohn laud kowahlap. Me emen kak kihda sohte pahn itarohng.” (Melkahka 49:7, 8) Kitail uhdahn anahne sawas pwehki kitail sohte kak pwainla pweinen pweipwei sapahlo. Ma kitail kelehpw, e pahn sohte sawaspatail.

Sang sapwellime limpoak laud, Siohwa kupwurki pwainla mehn komour me kitail anahne, pwe “koaros pahn iasadahng mour” pwehki Sises. Ia duwen pweinen pweipwei sapahlo eh kapwaiada met? “Ntahn Sapwellime Iehros Sises kin kamwakeleikitailsang nan dipatail akan koaros.” Ei, en pwoson ntahn Sises kin ritingada wenihmwen mahkpen dipatail oh mour soutuk. (1 Sohn 1:7; 5:13) Oh dahme pweinen pweipwei sapahlo pahn wiahiong kompoakepatail me melahr akan? “Duwen mehla eh tepisang aramastehmen, ih duwen iasada sang mehla eh tepido sang aramastehmen [Sises].”​—1 Korint 15:21.a

Meirong en Sises kohsang rehn me keieu lapalapo oh kisakis wet wia kasalepen limpoak me keieu laud. Sohte emen me kihong kitail kisakis laud duwehte me Siohwa ketikihongkitailehr. Oh sohte kisakis ehu me kaitarala anahn laud ehu me duwehte meirong ehu me kasaledengkitalla sang dihp oh mehla. Ei, sohte kisakis ehu me kak pahrekiong pweinen pweipwei sapahlo.