Soun Dake Oahs Pahmeno oh Komwi

Irail tangatang kohwei oh ni nehrail kan eh kin sokedi e kin pos duwehte nansapwe! Mwekid en oahs lapala pahmeno oh soun dake ko uhdahn kehlail me kahrehiong en mwomwen me re kak lusieisang nan Paipel! Keieun oahso poh pwetepwet oh soun dakeo lingan oh e wia nanmwarki kapw men. Mwurin ih, mie oahs men me poh duwehte kisiniei, soun dakeo kihsang popohl nan sampah pwon. Mwurin mwo, mie kesilimen en soun dake oahs men me toantoal duwehte lukepen pwong, oh me dakeo kolokol mehn tenek ehu, mwomwen me e weuwa rohng ehu duwen apwal en mwenge. Kapahmen en oahso poh pehsehs, mie kilel en soumwahu oh soahng keper teikan me kak kemehla aramas, oh Mehla me wia soun dake. Oh wasahn me melahr akan me wehwehki sousou en tohnsampah, ahpw idawehnla mwuri, me imwikihla mehlahn aramas tohto!​—Kaudiahl 6:1-8.

“I masepwehkada ni ahnsou me I tepin wadek duwen soun dake oahs pahmeno. I pehm me Rahn en Kadeiko wie kohkohdo oh pwehki ei saik onopada, I sohte pahn pitila.”​—Crystal.

“I lelki wekpeseng en soun dake oahs ko oh wekpeseng en poh en oahs ko. Ni ei wehwehkidahr wehwehn kasansal wet, soahng koaros miehla wehwe ong ie.”​—Ed.

Ke kak wehwehki mwomwen en Crystal pepehm duwen soun dake oahs pahmeno nan Kaudiahl? De ke ahneki soangen pepehmohte me Ed ahneki? Sohte lipilipil ia omw pepehm, koasoipen soun dake oahs pahmeno wia ehu kasansal me keieu kaselel nan Kaudiahl, kaimwiseklahn pwuhk nan Paipel. Ke ese me ke kak pein paiekihda sang omw pahn wehwehki kasansal wet? Ia duwen? Koht ketin inoukihda me ke kak diarada nsenamwahu mehlel sang ni omw pahn wadek, sukuhlkihsang, oh momourki soahng kan me ntingdi nan pwuhk en kokohp wet.​—Kaudiahl 1:1-3.

Ekei kin masak kasansal en oahs pahmen pwukat, ahpw e sohte wiawihda pwehn kamasak uhk. Ni mehlel, aramas rar kei diaradahr me kasansal wet kin kakehlakahda arail pwoson oh pil kin sewese irail en kasikasik koapworopwor kaselel en ni ahnsou kohkohdo. Met pil kak wiawihong uhk! Menlau wadek ire kan me mi mwurin met.