Pahpa Nohno kan, Kumwail Kin Sewese Noumwail Seri kan en Kekeirda Pwe Ren Papidaisla?

1. Dahme pahpa nohno Kristian kan men tehk mwahu mwohn neirail seri kan papidaisla?

“EREIN sounpwong tohto I kin ndindaiong Pahpa oh Nohno me I men papidaisla oh ira kin kalapw koasoiong ie duwen met. Ira men tehk mwahu me I uhdahn ese uwen kesempwal en ei pilipilo. Nan December 31, 1934, rahno leledo ong mwekid kesempwal wet nan ei mour.” Ih mwomwen Blossom Brandt eh kawehwehda dahme wiawi ni eh pilada en papidaisla. Pil rahnwet, pahpa nohno kan men sewese neirail seri kan wiahda pilipil mwahu kan. En kihla ong ehu ahnsou pwehn papidaisla kak keper ong ahn serio eh nanpwungmwahu rehn Siohwa. (Seims 4:17) Mwohn neira serio pahn papidaisla, pahpa nohno loalokong kan men tehk mwahu me serio onopadahngehr wiahla emen sapwellimen Krais tohnpadahk.

2. (a) Kahpwal dahieu me ekei sounapwalih me kin seiloak kin tehkada? (b) Dahme kitail pahn koasoiapene nan iren onop wet?

² Ekei sounapwalih me kin seiloak kin tehkada me me pwulopwul tohto me kereniong sounpar 20 de daulih saikinte papidaisla, mehnda ma re tikida nan padahk mehlel. Pali laud en ahnsou, irail me pwulopwul pwukat kin iang mihting, iang kalohk, oh wiahki me irail Sounkadehdehn Siohwa kei. Ahpw mie soangen kahrepe kei me re saikinte inoukihong Siohwa arail mour oh papidaisla. Ong ekei, met pwehki pahpa nohno ko medewe me neirail seri kan saikinte onopada en papidaisla. Nan iren onop wet, kitail pahn koasoiapene irair pahieu me kin kauhdi pahpa nohno kan sang ar pahn kangoange neirail seri kan en papidaisla.

NEI SERIO LELEHR SOUNPAR?

3. Dahme ahn Blossom pahpa oh nohno kin pwunodki?

³ Ahn Blossom pahpa oh nohno, me kitail koasoia nan tepin parakrap, kin pwunodki ma Blossom lelehr sounpar en kak wehwehki ia wehwehn en papidaisla oh ia uwen met eh kesempwal. Ia duwen pahpa nohno kan ar kak ese ma neirail serio onopadahngehr en inoukihong Siohwa eh mour?

4. Ia duwen sapwellimen Sises kehkehlik nan Madiu 28:19, 20 eh kak sewese pahpa nohno kan rahnwet?

⁴ Wadek Madiu 28:19, 20. Paipel sohte mahsanih sounpar depe me emen anahne papidaisla. Ahpw e kesempwal ong pahpa nohno kan en medemedewe kanahieng duwen dahme ntingdi nan Madiu 28:19. Sises ketin kehkehlingkihong kitail en ‘padahkihong tohn wehi kan koaros; pwe re en wiahla sapwellime tohnpadahk.’ Met wehwehki me kitail en padahki emen oh akadeiong en sewese ih wiahla tohnsukuhl de tohnpadahk men. Tohnpadahk men kin sukuhlki oh wehwehki dahme Sises ketin padahngki oh men peikiong ih. Eri sang ni ahnsou me neirail seri kan wia seri pwelel, pahpa nohno kan anahne kasukuhlih irail oh akadeiong en sewese irail en inoukihong Siohwa arail mour oh wiahla sapwellimen Krais tohnpadahk. Mehlel, seri pwelel kan sohte kak papidaisla. Ahpw, Paipel kasalehda me seri tikitik kan pil kak wehwehki oh poakohng padahk mehlel en Paipel.

5, 6. (a) Dahme Paipel mahsanih duwen Timoty me kahrehda kitail en kak ese duwen eh papidais? (b) Ia ahl me keieu mwahu ong pahpa nohno loalokong kan en sewese neirail seri kan?

⁵ Timoty iei tohnpadahk men me pilada en papah Siohwa ni eh pwulopwulte. Wahnpoaron Pohl nda me Timoty tepida sukuhlki padahk mehlel sang Mahsen en Koht ‘sang ni eh kisin seri.’ Ahn Timoty pahpao sohte kin papah Siohwa, ahpw eh nohno oh pil nohno kahlapo sewese Timoty en poakohng Mahsen en Koht. Imwilahn met, eh pwoson uhdahn kehlail. (2 Tim. 1:5; 3:14, 15) Ni eh mpen sounpar 20, e pil alehdi pwukoa tohrohr kan nan mwomwohdiso.​—Wiewia 16:1-3.

⁶ Seri koaros wekpeseng. Koaros sohte kin koahiekla ni sounpar teieu. Ekei seri kin wehwehki padahk mehlel, wiahda pilipil mwahu kan, oh men papidaisla ni arail pwulopwul. Ekei mwein saikinte onopada en papidais lao re ekis laudla. Pahpa nohno loalokong kan sohte kin idingkihong neirail seri kan en papidaisla. Ahpw re kin sewese neirail serio en kekeirda ni uwen koahiek me serio ahneki. Pahpa nohno kan kak perenki ni seri men eh kin kapwaiada kaweid en Lepin Padahk 27:11. (Wadek.) Ahpw re anahne tamataman me arail mehn akadei iei en sewese neirail seri kan en wiahla tohnpadahk kei. Ni arail wia met, re anahne pein idek rehrail, ‘Ia duwe, dahme nei serio ese itar pwe en inoukihong Koht eh mour oh papidaisla?’

DAHME NEI SERIO ESE ITAR?

7. Emen me men papidaisla anahne esehla padahk pisetik koaros en Paipel? Menlau kawehwehda.

⁷ Ni pahpa nohno kan ar kasukuhlih neirail seri kan, re men seri ko en esehla mwahu padahk mehlel. Loalokong wet pahn sewese seri kan en men inoukihong Koht arail mour. Ahpw met sohte wehwehki me seri men anahne esehla padahk pisetik koaros en Paipel mwohn eh kak inoukihda eh mour oh papidaisla. Sapwellimen Krais tohnpadahk koaros anahne pousehlahte ale kasukuhl pil mwurin arail papidaisla. (Wadek Kolose 1:9, 10.) Eri ia uwen emen anahne esehla mwohn eh kak papidaisla?

8, 9. Dahme wiawihong sounsilepen imwetengo nan Pilipai, oh dahme kitail kak sukuhlkihsang met?

⁸ Koasoipen peneinei ehu mahs kak sewese pahpa nohno kan rahnwet. (Wiewia 16:25-33) Nan pahr 50, Pohl kohla ni kahnimw en Pilipai ni keriaun eh seiloak en misineri. Ni eh mihmi mwo, aramas akan karaunlikamwih ih oh Sailas, salihedi ira oh kesehlong nan imweteng. Ni pwongo, rerrer en sahpw laud ehu wiawi oh kahrehda wenihmw koaros en imwetengo en ritpeseng. Sounsilepen imwetengo medewe me koaros me selidi kan tangehrdoaui, oh e men kemehla pein ih. Ahpw Pohl kauhdi ih. Pohl oh Sailas eri padahkihong sounsilepeo oh eh peneinei padahk mehlel duwen Sises. Irail eri kamehlele soahng kan me re sukuhlki duwen Sises oh pohnese uwen kesempwal en peikiong ih. Irail eri mwadang papidaisla. Dahme kitail kak sukuhlkihsang met?

⁹ Ele sounsilepeo wia emen sounpei en Rom me kommoaldiher sang doadoahk. E sehse Mahsen en Koht. Eri pwehn wiahla Kristian men, e anahne sukuhlki padahk mengei kan sang Paipel, wehwehkihla dahme Siohwa ketin kupwurki sang sapwellime ladu kan, oh men peikiong padahk kan en Sises. Dahme e sukuhlki erein ahnsou mwotomwoto sewese ih en men papidaisla. E pahn uhdahn pousehlahte kalaudehla eh esehla padahk mehlel mwurin eh papidaisla. Eri ni noumw serio eh padahkihong uhk me e men papidaisla pwehki e poakohng Siohwa oh men peikiong ih, dahme ke kak wia? Ke kak mweidohng ih en koasoiong elder kan pwe irail en kak pilada ma e kakehr de warohng papidaisla.a Duwehte Kristian koaros me papidaislahr, e pahn pousehlahte kalaudehla eh sukuhlki duwen Siohwa erein eh mour, pil kohkohlahte.​—Rom 11:33, 34.

MEHNIA KASUKUHL ME KEIEU MWAHU ONG NEI SERIO?

10, 11. (a) Dahme ekei pahpa nohno kin medewe? (b) Dahme pahn uhdahn pere seri men?

¹⁰ Ekei pahpa nohno leme me e pahn keieu mwahu ong neirail seri kan en papidaisla ihte mwurin arail kohla iang sukuhl laud oh rapahkihda doadoahk mwahu. Mie kahrepe mwahu me re ahneki en medewe met, ahpw re anahne pein idek rehrail: ‘Ia duwe, met pahn sewese nei serio en uhdahn pweida mwahu? Met pahrekiong dahme kitail sukuhlki sang Paipel? Ia duwen Siohwa eh ketin kupwurki kitail en doadoahngki atail mour?​—Wadek Eklesiasdes 12:1.

¹¹ E kesempwal en tamataman me sampah wet oh soahng kan loale kin uhwong dahme Siohwa ketin kupwurki oh medewe. (Seims 4:7, 8; 1 Sohn 2:15-17; 5:19) Nanpwungmwahu keren rehn Siohwa wia mehn perepe keieu mwahu me seri men kak ahneki pwehn pelianda Sehdan, sampah wet, oh madamadau suwed en sampah. Ma pahpa nohno kan kin mwohneki mahs sukuhl laud oh doadoahk mwahu, neirail seri kan ele pahn kamehlele me soahng kan nin sampah wet kin kesempwalsang arail nanpwungmwahu rehn Siohwa. Met keper. Nin duwen pahpa nohno limpoak kan, ia duwe, kumwail uhdahn men sampah wet en padahkihong dahme e medewe pahn kihong noumwail serio nsenamwahu? Ihte ahl me kitail en pweida oh ahneki peren mehlel iei en mwohneki mahs Siohwa nan atail mour.​—Wadek Melkahka 1:2, 3.

IA DUWEN MA NEI SERIO WIAHDA DIHP LAUD?

12. Dahme kahrehda ekei pahpa nohno pehm me e mwahu ong neirail serio en awih mahs mwohn eh papidaisla?

¹² Emen nohno kawehwehda dahme kahrehda e sohte men nah serepeino en papidaisla. E nda, “I suwedki nda me kahrepe keieu laudo iei pwehki koasoandi en piskenla.” Duwehte sistero, ekei pahpa nohno kin pehm me e mwahu ma neirail serio en awih mahs mwohn eh papidaisla lao e ekis laudla oh ahneki koahiek en soikala wiahda sapwung laud. (Sen. 8:21; Lep. Pad. 22:15) Pahpa nohno pwukat ele medewe me ma neirail serio sohte papidaisla, e sohte kak piskenla. Ahpw dahme kahrehda madamadau wet sapwung?​—Seims 1:22.

13. Ma emen saikinte papidaisla, met wehwehki me e sohte kin pein pwukoahki eh sapwung kan mwohn Siohwa? Menlau kawehwehda.

¹³ Uhdahn pahpa nohno kan sohte men neirail serio en papidaisla mwohn eh onopada en inoukihong Siohwa eh mour. Ahpw e pahn sapwung en medewe me seri men sohte kin pein pwukoahki eh sapwung kan mwohn Siohwa lao e papidaisla. Seri men kin pein pwukoahki eh sapwung mwohn Koht ni eh ese dahme Siohwa ketin mahsanih me pwung oh sapwung. (Wadek Seims 4:17.) Pahpa nohno loalokong kan sohte kin kauhdi neirail serio eh pahn papidaisla. Pil ni ahnsou me serio tikitik, re kin padahkihong en poakohng dahme Siohwa ketin mahsanih me pwung oh pil tateki dahme E mahsanih me sapwung, duwehte me re kin wia. (Luk 6:40) Limpoak me noumw serio ahneki ong Siohwa pahn pere ih sang wiahda dihp laud ehu, pwehki e pahn men wia dahme Siohwa ketin mahsanih me pwung.​—Ais. 35:8.

METEIKAN KAK SAWAS

14. Ia duwen elder kan ar kak utungada dahme pahpa nohno kan kin wiewia?

¹⁴ Elder kan kak utungada dahme pahpa nohno kan kin wiewia sang arail lokaia kangoang kan ni ahnsou me irail kin koasoia duwen mehn akadei kan nan sapwellimen Siohwa doadoahk. Emen sister tamanda ahnsou me Brother Russell koasoiong ih ni eh sounpar weneu. Sistero nda, “E doadoahngki minit 15 pwehn koasoiong ie duwen ei mehn akadei kan en papah Siohwa.” Ia imwilahn met? Mwuhr, sistero wiahla pioneer men, oh e wia pioneer men daulih sounpar 70! E uhdahn sansal me lokaia kangoang kan kin kak kamwakid mouren emen. (Lep. Pad. 15:23) Elder kan pil kak luke pahpa nohno kan oh neirail seri kan ren iang sewese doadoahk kan en Wasahn Kaudok. Re kak kihong seri ko en wia soahng kan me konehng arail sounpar oh koahiek.

15. Ia duwen meteikan nan mwomwohdiso ar kak sewese me pwulopwul kan?

¹⁵ Ia duwen meteikan nan mwomwohdiso ar kak sawas? Re kak kasalehda arail nsenohki me pwulopwul kan ni ahl me konehng. Karasepe, ke kak rapahki soahng kan me kasalehda me me pwulopwul kan kin karanihala Siohwa. Ia duwe, mie seri men me kin kihda pasapeng mwahu ni mihting kan, de mie eh padahk de kamwomwada nan prokram en mihting en nan wihk? E kalohk ong emen nan sukuhl, de e wiahda dahme pwung ni eh lelohng kasongosong en wia mehkot sapwung? Ma ei, mwadang ndaiong ih me dahme e wiahdao uhdahn mwahu! Kitail kak akadeiong en koasoiong me pwulopwul kan mwohn oh mwurin mihting kan. Ni atail wia met, seri kan pahn pehm me irail wia kisehn ‘pokon en sapwellimen Siohwa aramas akan.’​—Mel. 35:18.

SEWESE NOUMW SERIO EN KEKEIRDA PWE EN PAPIDAISLA

16, 17. (a) Dahme kahrehda e kesempwal ong seri kan en papidaisla? (b) Soangen peren dah me pahpa nohno Kristian kan kak ahneki? (Menlau kilang tepin kilel.)

¹⁶ Ehu rehn pwais keieu kaselel kan me pahpa nohno kan ahneki iei en padahkihong neirail seri kan en poakohng Siohwa. (Ep. 6:4; Mel. 127:3) Nan wehin Israel, seri kan inoudaier ong Siohwa ni ahnsou me re ipwidi. Ahpw neitail seri kan soh. Pwehki pahpa nohno kan poakohng Siohwa oh padahk mehlel, met sohte wehwehki me neirail seri kan pahn pil wia met. Sang ni rahn me neirail serio ipwidi, pahpa nohno kan anahne akadeiong en sewese neirail serio en wiahla tohnpadahk men, inoukihong Koht eh mour oh papidaisla. Mie mehkot me kesempwal sang met? Ahn emen inou me e wiahda ong Siohwa, eh papidais, oh eh papah Siohwa ni lelepek pahn kahrehda eh kak komourla erein kahn kamakam kowahlapo.​—Mad. 24:13.

¹⁷ Ni ahnsou me Blossom Brandt men papidaisla, eh pahpa oh nohno men tehk mwahu me e onopadahr. Ni ara uhdahn kamehlele me e onopadahr, ira utungada eh pilipilo. Blossom koasoiahda dahme eh pahpao wia nipwongo mwohn eh papidaisla. E nda: “E ndaiong kiht koaros en kelepwikihdi oh e kapakap. E patohwanohng Siohwa me e uhdahn perenkihda duwen pilipil me nah kisin serepeino wiahda en inoukihong Ih eh mour.” Daulih sounpar 60 mwurin mwo, Blossom nda: “Ke kak uhdahn kamehlele me I sohte pahn manokehla nipwongo erein ei mour!” Pahpa nohno kan, kumwail en pil ahneki soangen peren oh nsenamwahuohte ni amwail kilang noumwail seri kan wiahla sapwellimen Siohwa ladu kei me inouda oh papidaisla.