Ni Ahnsou me Kahpwal Ehu Wiawi

“Nin tapio se pehmada me solahr at koapworopwor. Soahng koaros me se ahneki ohkihla engk ehu oh lapake.”—Andrew, Sierra Leone.

“Mwurin melimelo, se pwurala ni imwato. Sohte mehkot luwehdi. Se uhdahn nsensuwedkihla. Nei serepeino kelepwikihdi oh sengiseng.”—David, Virgin Islands.

MA MIE pak ke mourla sang kahpwal ehu, ele ke pahn wehwehki dahme me mourlahr teikan lelohngehr: pwuriamweila, sohte kamehlele, sohte wehwehki, pwunodki, ouraman suwedki. Me pitila tohto nsensuwedkihla oh pwangada me kahrehda re sohte pil ahneki ineng en kamwahwihala arail mour.

Ma sohla omw dipwisou de kepwe pwehki kahpwal ehu me wiawi, ele ke pil pehm me ke solahr kak dadaur pahn lokolok oh pwunod. Mwein ke pil pahn tepida pehm me sohte katepen omw momour. Ahpw Paipel kawehwehda me mie katepen omw mour oh me ke kak ahneki kahrepen koapworopwor mwahu ong ahnsou kohkohdo.

ESEHLA PADAHK MEHLEL EN PAIPEL KIN KIHONG KITAIL KOAPWOROPWOR

Eklesiasdes 7:8 mahsanih: “Imwilahn mehkot kin mwahusang nin tapi.” Ni omw ahpwtehnte mwahula sang kahpwal ehu me wiawi, mour kin mwomwen sohla koapworopwor. Ahpw ni omw kin ni kanengamah oh nantihong kamwahwihala omw mour, soahng kan kak mwahula.

Paipel kohpada ahnsou ehu me “sohte ngilen mwahiei pahn mie . . . sohte ngilen peksawas.” (Aiseia 65:19) Met pahn pweida ni ahnsou me sampah pahn wiahla paradais ehu pahn kaundahn Wehin Koht. (Melkahka 37:11, 29) Kahpwal kan solahr pahn pwurehng wiawi. Ke solahr douluhl pahn tamataman soahng kamedek oh kansensuwed koaros pwehki Koht me Keieu Kehlail ketin inoukidahr: “Mehkoaros me pweidahr nan ahnsou samwalahr ako pahn manokonokla douluhl.”—Aiseia 65:17.

Song medewehla: Sounkapikadao ketin koasoanehdi “ahnsou kohkohdo kan me kumwail kasikasik”—mour meleilei pahn sapwellimen Koht kaunda me unsek. (Seremaia 29:11) Ia duwe, omw ese ire mehlel wet pahn kak seweseiuk ken wiahiong omw mour en mie katepe? Sally, me kitail koasoiaier mwoweo, nda: “Omw katamankihong pein kowe soahng mwahu koaros me Wehin Koht pahn wiahiong kitail ni ahnsou kohkohdo kak seweseiuk ken sohla medemedewehte soahng kansensuwed kan me wiawiher oh kak nantihong dadaur irair me ke mi loale met.”

Ke sohte men kalaudehla omw sukuhlki duwen dahme Wehin Koht pahn kereniong wiahiong aramas akan? Ni omw wia met, ke kak kamehlele me mendahki kahpwal me ke lelohngehr, omw mour mie katepe met ni omw pahn kasikasik ahnsou me sohte pahn mie kahpwal. Ahpw ni ahnsou wet, Paipel kin kihda kaweid mwahu kan me kak seweseiuk ken dadaurete mendahki soahng kan me kahpwal ehu kin kahrehda. Tehk ekei karasepe kan.

Iren Paipel kan me Kak Sawas

Kommoal mwahu.

“E ahpw mahsanihong irail: ‘Kitail kohla kelehpwla oh ekis kommoal.’ Pwe me tohto kin kohdo oh pil kohkohla oh solahr arail ahnsoun kommoal de pil mwenge.”—Mark 6:31.

Sounroporop kan koasoia me ni ahnsou me aramas kin lelohng kahpwal laud, arail pepehm kan pahn suwedla oh pil laudla ma re sohte kin meir mwahu. Ihme kahrehda e wia elen loalokong en kin kommoal mwahu.

Koasoiahda duwen omw pepehm kan.

“Pwunod pahn kak adihasang omw peren, ahpw lokaia kadek pahn kaperenihiukada.”—Lepin Padahk 12:25.

Koasoiong emen tohn omw peneinei de kompoakepahmw me ke kin likih. Patehng arail pahn rongorong omw koasoakoasoia omw pepehm kan, tohn omw peneinei de kompoakepahmw keren kan kak kangoangeiuk oh kihong uhk sawas me ke anahne.a

Kilengla mwowe ong ahnsou mwahu kan.

‘Mie lahng kapw oh sampah kapw me kitail kin awiawih nin duwen sapwellimen [Koht] inou, wasa me pwung pahn mi ie.’—2 Piter 3:13.

a Aramas emen me kin pwunopwunod ahnsou reirei de me kin ahneki pwunod laud ele anahne rapahki sawas en wini.