“Wia Uwen Me Ke Kakong”
1 Ni ahnsou me kitail inoukihda pein atail mour ong Siohwa, kitail inoukihda en kihong ih uwen me kitail kak. Pil duwehte mahs, e konehng wahnpoaron Piter en kangoange Kristian kan en mahs en wia uwen arail kak en tehk ma arail nanpwung mwahu rehn Siohwa uhdahn teng. (2 Pit. 1:10) Kitail men wia uwen me kitail kak ni atail men kaperenda Siohwa ni atail papah ih rahnwet. Dahme met kin pidada? Ni atail nanpwung mwahu rehn Siohwa kin mwahula oh kitail kin medemedewe loal duwen soahng tohto me Siohwa kin wiaiong kitail, mongiongatail kin kamwekid kitail en wia uwen me kitail kak ni atail kin papah ih. Kitail men kamwahuiala irair en atail doadoahk en kalohk, oh pil, ma kak, kalaudehla atail ahnsou ong kalohk.—Melkahka 34:8; 2 Tim. 2:15.
2 Emen brother pwulopwul me men kalaudehla eh ahnsou ong kalohk diarada me ni eh wia onop en Mahsen en Koht kaukaule, onop wet kin kalaudehla eh kalahnganki Siohwa oh kin kihong ih ngoang me laudsang mahs. Met kamwekid ih en iang doadoahk en pioneer. Emen sister me kin apwalki koasoi ong aramas me e sehse tepida doadoahngki ekei padahk kan me pwarada nan pwuhken Reasoning oh diarada me eh kalohk kin pweida mwahu sang mahs. E pil tepiada onop en Paipel rehn pwopwoud ehu me mwuhr iangala padahk mehlel.
3 Perenki Dahme Ke Kak Wia: Ekei kitail kin lelong irair apwal duwehte soumwahu, uhwong sang atail peneinei, semwehmwe oh nan arail wasahn kalohk, sohte me kin mwekidki padahk mehlel. Pil mie ekei kahpwal kan me kin pwarada nan imwin rahn pwukat me kin koarompwa atail doadoahk en papah Koht. (Luk 21:34, footnote; 2 Tim. 3:1) Met wehwehki me kitail sohte kin kapwaiada atail inou ong Siohwa? Soh, ma kitail wia uwen me kitail kak ong.
4 E sohte mwahu en kadeik pein kitail pwehki kitail kin kilang dahme mehteikan kin wia. Ihme kahrehda, Pwuhk Sarawi kin kangoange kitail me “emenemen en pein kasakasawih pein eh wiewia kan.” Tounmeteiki pein kitail uwen me kitail kak kin kaperenda Siohwa oh kin kihong kitail “kahrepe mwahu en perenda.”—Kalesia 6:4; Kolose 3:23, 24.
5 Kitail anahne kapwaiada mahsen en Piter en ‘wia uwen me kumwail kak pwe kumwail en kin mwakelekel oh pwung mwohn silangin Koht ni kapehd popohl.’ (2 Pit. 3:14) Ma kitail wia met, Siohwa pahn sinsile kitail oh kihong kitail popohl me pahn kainsenamwahuwih kitail.—Melkahka 4:8.