Iaduwen Kitail Kak Koahiekla Ni Atail Kawehwe ong Aramas akan
1 Ehu kawehwehpen lepin lokaia “kawehwe” iei “en koasoi ong emen pwehn kamwekid eh madamadau oh eh wiewia kan.” Pwehn pweida mwahu nan ahmw doadoahk en kalohk, ke anahne koahiekla ni ahmw kawehwe ong aramas akan me ke tuhwong soahng ngehnin kan. (Wiewia 17:2-4) Ahpw iaduwen ke kak koahiekla ni ahl wet?
2 Tepkihda Doudouloale: Ahnsou me ke kin wia ahmw onop en padahk mehlel me kin mihmi nan Pwuhk Sarawi, e pahn mwahu en doudouloale ni ahmw kin wadwadek. Ma ekei ire kan kin apwal en wehwehki, e pahn pil mwahu en wia ahmw roporop duwen ire pwukat oh doudouloale. Ken nantihong wehwehki duwen ire pwukat oh pil wehwehki iaduwen ke kak doadoahngki iren Paipel kan en kawehwe duwen ire ko.
3 Kitail Anahne Kaunopada Ong Kalohk: Medemedewe iaduwen ke pahn kawehwehda padahk mehlel ong soangsoangen aramas. Medewehda peidek ehu me pahn kahrehong tohnihmw en medemedewe. Medemedewe mwowe iaduwen ke pahn kakete koasoia ire ieu oh doadoahngki Pwuhk Sarawi oh kawehwe duwen ireo. Pil nantihong tamanda soahng kan me aramas kin nda pwehn kauwehla atail koasoiong irail, oh medemedewe dahme kitail kak nda pwehn koasoiapene duwen ire pwukat. Pilada wasakis nan pwuhk de brochure de makisihn de tract me pahn mwahu en kasalehong tohnihmwo.
4 Idawehn Mehn Kahlemeng Mwahu en Sises: Sises wia mehn kahlemeng me keieu mwahu ong iaduwen emen pahn kawehwe ong aramas akan sang nan Pwuhk Sarawi. Pwe kitail en kasawihada iaduwen e wia met, kitail en kilang dahme wiawi nan Luk 10:25-37. Tehk ire pwukat: (1) Doadoahngki iren Paipel kan ahnsou me kitail pahn sapeng peidek kan me aramas kin kihda. (2) Luhke irail en kasalehda arail madamadau kan oh kapinga irail ahnsou me re koasoia madamadau pwung kan. (3) Tehk me ahmw kawehwe ni ahmw kin doadoahngki iren Paipel kan pahn dokedoke ah peidek kan ahnsou koaros. (4) Doadoahngki karasaras kan me pahn lel eh mohngiong pwe e pahn uhdahn wehwehki mour en ahmw kawehwehda duwen eh peidek.—Kilang Watchtower (lokaiahn wai) en March 1, 1986, pali 27-28, parakrap 8-10.
5 Doadoahngki Mehn Doadoahk kan me Kitail Aleier: Reasoning From the Scriptures wiawihda pwehn sewese kitail ni atail pahn wia atail doadoahk en kalohk. Nan pwuhk wet, e kin koasoia tepin koasoi kan me kitail kak doadoahngki, oh pil dahme kitail kak nda ma aramas akan men kauwehla atail koasoiong irail, oh pil ire kan me kitail kak doadoahngki pwehn kawehwe ong aramas akan soahng ngehnin kan. Pwuhken Reasoning kin wia mehn doadoahk kesempwal me kitail en weuwa ahnsoun kalohk koaros oh kitail pil kak doadoahngki pwuhk wet ni atail kin koasoiong aramas akan. Kousapahlih pali 7 oh 8 en pwuhk wet pwehn kilang iaduwen ke kak doadoahngki pwuhk wet ni ahl me keieu mwahu.
6 En koahiekla ni ahmw kawehwe soahng ngehnin kan pahn sewese iuk nan ahmw doadoahk en kalohk oh padahkiong aramas akan padahk mehlel. Met pahn imwikihla kapai laud kan ong pein kowe oh irail akan me ke kin tuhwong nan kalohk.