Koasoanehdi Ahnsoun Mwemweit en Dehr Nohn Daulihla Dahme Konehng
1 Nan ahnsou apwal pwukat, kitail koaros anahne ahnsoun mwemweit ekei pak. E konehng en mie ekis ahnsoun mwemweit ong emen emen kitail. Ahpw, ma atail ahnsoun mwemweit, mwadong oh koasokoasoi mwahl ong meteikan kin nohn daulihla, e kak kahrehda emen pahn solahr ah ahnsou ong soahng ngehnin kan. Kitail anahne koasoanehdi ahnsoun mwemweit en dehr nohn daulihla dahme konehng. (Madiu 5:3) Iaduwen met pahn kak wiawi? Ni atail pahn idawehn kaweid me diarekda nan Episos 5:15-17.
2 Koasoanehdi Pwehn Irehdi Dahme Sohte Konehng: Pohl ntingihdi me Kristian kan anahne “kanahieng” iaduwen re kin doadoahngki arail mour. Ma kitail men wia dahme konehng oh liksang dahme suwed, kitail pahn kanahieng pwehn koasoanehdi atail ahnsoun mwemweit en ihte ong dahme uhdahn anahn. E pahn mwahu en medemedewe iaduwen kitail kin doadoahngki atail ahnsoun kommoal kan likin ahnsou kan me kitail kin wia atail pwukoah kan. Kitail en tamataman me: kahrepe kitail kin doadoahngki ekis ahnsou ong mwemweit oh mwadong pwehki e pahn wia mehkot mwahu oh kansenamwahu ong kitail, kaidehn mehkot me mwuri, kitail pahn pehm me kitail kauwehla atail ahnsou de kitail pahn nohn pwang. Ma kitail iang mwemweit de mwadong, ahpw, mwuri kitail pehm me kitail kauwehla atail ahnsou de kitail ekis pehm me dahme kitail wia me sapwung, e sansal me kitail anahne kawekila atail koasoandi de pilipil kan me pid mehn kamweit oh mwadong.
3 Doadoahngki Ahmw Loalokong: Pohl kihda kaweid en “isaneki ahnsou mwahu koaros” ong soahng kan me keieu kesempwal nan atail mour oh pil en dehr wia soahng kan me “sohte konehng.” Kristian kan me inoukihong Siohwa arail mour sohte kak mweidohng pein irail en “mour en mwemweit” de “mour en mwadong.” Mehlel, soahng kan duwehte kommoal oh mwemweit kin kak kansenamwahu ong kitail pwe kitail en kak pwurehng kehlailda, kitail anahne tamataman me utupen atail kehl ni pali ngehn iei sapwellimen Koht ngehn sarawi. (Aiseia 40:29-31) Kitail kin ale sapwellime ngehn sarawi ahnsou me kitail kin wia soahng ngehnin kan—onop Paipel, iang towehda mihding kan oh iang kalohk—kaidehn ahnsoun mwemweit, mwadong oh kommoal.
4 Koasoanehdi Dahme Ke Pahn Kihda en Keieu Nan Ahmw Mour: Pohl kaweidki Kristian kan en “rapahki dahme Kauno [“Siohwa,” New World Translation] ketin kupwukupwure kumwail en kin wia.” Ni en Sises kin wia sapwellime padahk kan, e kin kasalehda me soahng kan me pid Wehin Koht pahn wia dahme keieu kesempwal nan atail mour. (Madiu 6:33) E inenen kesempwal me kitail pahn kihong keieu nan atail mour soahng kan me pahn sewese kitail en kapwaiada atail inou me kitail wia ong Siohwa. Mwurin mwo, kitail kak kihda ekis atail ahnsou ong mwemweit, mwadong oh kommoal—ahpw, ahnsou pwukat anahne en konehng. Ni ahnsou me met pahn wiawi, e pahn imwila mwahu oh kitail pahn uhdahn perenki ahnsou pwukat.—Ekl. 5:12.