Kasalehda Nsenoh oh Limpoak ong “Irail me Sepwoupwou kan”
1 Siohwa kin wia “pahpa men ong irail me sepwoupwou kan.” (Melkahka 68:5) Sapwellime nsenoh me pid irail akan kin sansal nan kehkehlik me E ketikihong mehn Isreal en mahs akan: “Kumwail dehr wiakauwe liohdi men de me sepwoupwou men. Ma kumwail pahn wia met, ngehi, Kauno, I pahn rong irail ni ar pahn likweriong ie pwe I en sewese irail.” (Eksodus 22:22, 23) Nan sapwellimen Koht Kosonned akan, mie koasoandi kan me kin pid duwen sewese irail liohdi kan oh sepwoupwou kan ong arail anahn akan en paliwar. (Deud. 24:19-21) Oh pil, nan koasoandi en Kristian, tohnkaudok mehlel kan kin ale kaweid en “apwalih me sepwoupwou kan oh liohdi kan nan ar apwal akan.” (Seims 1:27) Iaduwen kitail kak kahlemengih sapwellimen Siohwa limpoak oh nsenoh ni atail pahn kasalehda irair pwukat ong irail me sohte arail pahpa de nohno oh pil irail me arail pahpa de nohno sohte iang padahk mehlel?
2 Kaiahn en Pali Ngehn: Ma ke wia emen pahpa de nohno me ahmw pwoud sohte iang padahk mehlel, mwein ahmw kaukaule wia onop Paipel rehn noumw seri kan kin wia koasoandi me apwal en kolokol. Ahpw, ni mehlel, koasoandi en onop Paipel me kin kaitarala anahn en peneinei oh me pil kin wiawi ahnsou koaros—soangen koasoandi wet kin inenen kesempwal ma noumw seri kan pahn wiahla aramas laud me toupahrek oh mah ni pali ngehn. (Lepin Padahk 22:6) E pil kesempwal ken koasoiaiong noumw seri kan duwen soahng ngehnin kan. (Deud. 6:6-9) Mwein ekei pak, ke pahn nsensuwedla, ahpw ken nannantihte. Sohpeiong Siohwa pwehn ale kehl oh kaweid ni ahmw nantihong “kekeirirailda ni kaiahn oh madamadau en Siohwa.”—Episos 6:4, NW.
3 Ma ke anahne sawas en kapwaiada pwukoah en pali ngehn kan, ken kehsehkin elder kan duwen ahmw anahn akan. Mwein irail kak kihda iren sawas kan de pil kihda pein arail sawas me pahn sewese iuk en koasoanehdi oh kolokol koasoandi mwahu en pali ngehn nan ahmw peneinei.
4 Iaduwen Meteikan Kak Sawas: Nan keieun senturi, Timoty wiahla sapwellimen Siohwa ladu ngoang men mendahki e tikida nan peneinei me ah pahpa sohte iang padahk mehlel. Pwehki ah nohno oh nohno kahlap kin padahkiong ih duwen nting sarawi kan ahnsou me e tikitik, e sansal me met kahrehong Timoty en pweida mwahu ni e mourki soahng ngehnin kan. (Wiewia 16:1, 2; 2 Tim. 1:5; 3:15) Ahpw, e pil kin ale kamwahu kan sang eh werekiong Kristian teikan, iangahki Wahnpoaron Pohl, me kin kahdeneki Timoty “nei sei kompoake mehlel oh loalopwoat rehn atail Kaun.”—1 Kor. 4:17.
5 Pil duwehte rahnwet, e kin wia mehkot mwahu ahnsou me irail brother oh sister me mah ni pali ngehn pahn nsenohki irail me pwutak kan oh serepein kan me sepwoupwou nan mwomwohdiso oh kasalehong irail limpoak! Ke kin ese eden emenemen irail? Ke kin koasoi ong irail ansoun mihding kan oh pil ahnsou teikan? Ken luhke irail en iang uhk nan kalohk. Mwein, ekei pak, ke kak luhke irail, iangahki arail pahpa/ nohno kan me mihmi nan padahk mehlel, en iang amwail onop en peneinei de ahnsou me kumwail kin kohla mwemweit de ansoun mwadong. Ni ahnsou me irail me pwulopwul kan pahn kilangwong uhk nin duwen kompoakparail, irail pahn kak alasang ahmw mehn kahlemeng mwahu oh rong ahmw kangoang oh kaweid.—Pilipai 2:4.
6 Siohwa kin inenen nsenohki irail pwutak oh serepein sepwoupwou kan, oh E kin kapaiada atail limpoak me kitail kin kasalehong irail pwehn kak sewese irail en mourki padahk mehlel. Irail tohto me tikida nan peneinei me arail pahpa de nohno kin mihmi rehrail de tikida nan peneinei me arail pahpa te de nohno te me iang padahk mehlel kin ale soangen kangoang sang meteikan oh met re doadoahk ni lelepek nin duwen pioneer kan, ministerial servant kan, elder kan, sounapwalih en mwemweit kan, misineri kan, de peneinei en Bethel kan. E pahn mwahu ma kitail koaros pahn rapahki ahl akan en kasalehong irail sepwoupwou kan limpoak, duwehte me Samatail nanleng kin wia.—2 Kor. 6:11-13.