Iaduwen Atail Kak Sawas?
1 Sounkadehdehn Siohwa kan kin kalap wia peidek wet: “Iaduwen atail kak sawas?” ni ahnsou me irail kin rong duwen melimel, de rerrer en sahpw, de lapake kin wiawi ekei wasa nan sampah. Nin duwen me Wiewia 11:27-30 kasalehda, Kristian kan nan keieun senturi kihda arail sawas ong riarail me pwoson akan me kin mihmi nan Sudia pwehki lehk laud ehu me wiawi wasao.
2 Nan atail ahnsou, pwihn en Sounkadehdehn Siohwa kan wiahda koasoandi me mweidohng irail en doadoahngki sawas en mwohni ong sewese aramas akan me lelohng kahpwal sang melimel, de rerrer en sahpw, de lapake de soangen kahpwal teikan.
3 Karasepe, nan pahr me ahpwtehn nek, riatail brother oh sister tohto kihda arail sawas pwehn sewese irail me lelohng apwal laud pwehki ilok laud me wiawi nan South Asia. Se inenen kalahnganki sawas me kumwail mwadang kihda. Ahpw, ni ahnsou me aramas emen kihda ah sawas oh kasalehda me ah sawas ongete wasakis nan sampah oh e pil kileledi wasao, kosonned en ekei sahpw kan kin koasoanehdi me sawas pwukat en kohwongete wasakis oh erein ahnsoukis, mehnda ma riatail wasao anahne de solahr anahne sawas.
4 Ihme kahrehda, se men kangoange irail koaros me men kihda arail sawas ong melimel, de rerrer en sahpw, de lapake, de apwal teikan en kihong nan koakon me kileledi “Sawas ong Doadoahk me Wiawi Nan Sampah Pwon” (“Society’s Worldwide Work”). Sawas me kin kohlahng koakon wet kin sewese wasa kan me lelohng apwal (melimel, de rerrer en sahpw, de lapake, de apwal teikan) oh pil sewese brother oh sister kan me anahne sawas en pali ngehn. Ma aramas emen pahn kihda ah sawas oh e kasalehda me ah sawas pahn kohwong sewese irail me lelohng kahpwal duwehte melimel, lapake, soahng pwukat (mehkot likin Society’s Worldwide Work), se pahn ale ah sawas oh doadoahngki ah sawas ongete sewese irail me lelohng soangen kahpwal pwukat. Ahpw, e pahn mwahu ma, ni ahnsou me kitail pahn kihda atail sawas, kitail en dehr kileledi iawasa de iaduwen Society pahn doadoahngki atail sawas.
5 E pahn wia sawas laud ma ahnsou me kitail kihda atail sawas, kitail en kihong nan koakon en “Society’s Worldwide Work” oh kitail sohte pahn kileledi dahme pahn wiawiong atail sawas, ahpw kitail en mweidohng Society en doadoahngki atail sawas ong sohte lipilipil wasa me irail lemeleme me anahn. Ma kitail pahn wia met, e pahn kasalehda me kitail pwungki kaweid en Episos 4:16 me kasalehda me kitail kin sawaspene nanpwungatail pwehn “keirda oh laudla ni limpoak.”