Dahme Ke Kin Mwohneki?
1 Iaduwen ahmw pahn sapeng peideko? Uhdahn e sansal me kitail koaros kin men kihong Wehio en keieu nan atail mour. (Madiu 6:33) Ahpw kitail kak idek rehtail, ‘Pilipil kan me I kin wia kin kasalehda me I kin mwohneki Wehio?’ Paipelo kangoangehkin kitail: “Kumwail kalelapak oh wia keseupen pein kumwail ma kumwail weweidki pwoson.” (2 Korint 13:5) Iaduwen atail kak kamehlelehong pein kitail me kitail kin mwohneki mahs Wehio?
2 Atail Ahnsou: Kitail kak tepiada wia met sang ni atail pahn tehk iaduwen atail kin doadoahngki atail ahnsou. (Episos 5:15, 16) Ia uwen ahnsou kitail kin kihong ong werekiong meteikan, kilang kasdo, doadoahngki Internet, de pil wia mehn kamweit teikan? Ma kitail pahn ntingihdi uwen ahnsou me kitail kin doadoahngkihla ohng soahng pwukat oh kapahrekiong uwen ahnsou laud me kitail kin doadoahngkihla ohng mehkan en pali ngehn, kitail kak pwuriamweikihla.Kitail kin doadoahngkihla awa tohto ohng atail doadoahk en war oh kihsang ahnsou ohng atail doadoahk en papah Siohwa, ihte pwe kitail en ale kepwe tohto? Pak depe kitail kin tounmeteikihla atail ahnsou mihding oh kalohk pwehn kohla mwemweit ni imwi wihk kan?
3 Koasoanehdi Dahme Keieu Kesempwal: Pali laud en kitail sohte kin ahneki ahnsou itar en wia soahng koaros me irail mwahuki. Eri pwehn mwohneki mahs Wehio, kitail anahne kousapahlih dahme kitail kin mwohneki oh en koasoanehdi ahnsou ohng “dahme keieu kesempwal.” (Pilipai 1:10) Met kin pidada onopki Mahsen en Koht, iang doadoahk en kalohk, apwalih peneinei, oh towehda mihding en Kristian kan. (Melkahka 1:1, 2; Rom 10:13, 14; 1 Timoty 5:8; Ipru 10:24, 25) Wiewia teikan me duwehte eksersais me itar oh mehn kamweit mwahu me kitail kak paiekihsang. (Mark 6:31; 1 Timoty 4:8) Ahpw soahng kan me sohte nohn kesempwal anahne en dehr wiahla mehkot me kesempwal.
4 Emen brother pwulopwul nantihong mwohneki Wehio sang ni ah iang doadoahk en kalohk kaukaule oh e sohte kalaudehla ah sukuhl pwehn ahneki doadoahk mwahu. E sukuhliki ehu lokaia oh kohla papah wasa me anahn laud. E nda “I inenen peren wasaht. Doadoahk en kalohk kin inenen wia mehn kakehl en peren! I men irail me pwulopwul kan koaros en wia soahng wet oh pehm dahme I pehm.Sohte mehkot mwahusang en papah Siohwa ki soahng koaros me kitail en ahneki.” Eri mwohneki Wehio kin wahdo kapai, ahpw me keieu kesempwal, e kin kaperenih Samatail nanleng, Siohwa.—Ipru 6:10.