Kalohk Anahne Kanengamah
1 Daulih sounpar silihsek, wahnpoaron Pohl ahneki peren sang eh doadoahk en kalohk. Ahpw eh doadoahk en kalohk kin lelohng ekei kahpwal kan. (2 Kor. 11:23-29) Mendahki met, Pohl sohte kin uhdihsang eh doadoahk en kalohk. (2 Kor. 4:1) E wehwehki me kehl en dadaur pwehn kapwaiada eh doadoahk en kalohk pahn kohsang rehn Siohwa. Pwehki eh mehn kahlemeng en kanengamah, Pohl kak koasoia: “Eri, kumwail kahlemengih ie, duwehte ei kin kahlemengi Krais.”—1 Kor. 11:1.
2 Kanengamah Pahn Kahpwal kan Rahnwet: Rahn koaros riatail kan tohto kin lelohng kapailok, uhwong kan. Oh arail peneinei kan, iengerail tohndoadoahk kan, iengerail tohnsukuhl kan mwamwahlikin irail. (Mad. 10:35; Sohn 15:20) Mwein met kin mehlel rehmw. Ni pali teio, ke ele ahneki kahpwal en soumwahu, de ke nantihong kihsang mehkan me soh katepe oh kasongosong kan me kin kauwe omw pwoson oh omw dadaur. Kitail kak ale kehl sang ni atail medemedewe mehn kahlemeng en irail kan me lelepek mahs oh pil irail Kristian kan rahn pwukat me pil lelohngehr oh powehdi kahpwal pwukat.—1 Pit. 5:9.
3 Kitail kak ale kehl en tengediong nan atail doadoahk en kalohk sang ni atail “pwuhriong nan tehtehn mahwen koaros me Koht ketikihong” kitail. (Ep. 6:10-13, 15) Pwehn kanengamah, kapakap uhdahn kesempwal. Koht ketikihong sapwellime manaman pwe kitail en kak kanengamahiong kahpwal kan. (2 Kor. 6:4-7) Pwehn pweida nan atail mahwen ong Sehdan oh eh sampah, kitail anahne doadoahngki sapwellimen Koht kaweid kan pwehn kakehlahda kitail. (Mel. 119:24, 85-88) Duwehte seri men me kin wadewadek kisinlikou sang eh pahpa, atail kaukaule wadewadek Paipel pahn kakehlail atail nanpwungmwahu rehn Siohwa. Kitail ale erpit en powehdi kahpwal kan sang atail kin pein onop Paipel, met mweidohng sapwellimen Siohwa madamadau en kahluwa atail pilipil oh kakehlailih atail lelepek ong ih.—Lep. Pad. 2:10, 11.
4 Kanengamah Wahdo Kapai kan: Duwehte dahme wiawihong Pohl, atail kanengamah ni lelepek ni ahnsou me kitail kapwaiada doadoahk en kalohk pahn kaperenda mohngiong en Siohwa oh wahdo kapai kan ong kitail oh meteikan. (Lep. Pad. 27:11) Kitail en wia uwen atail kak en dadaurete nan atail doadoahk en kalohk oh kasalehda me atail pwoson kehlail oh kesempwalsang “kohl me kin kak ohla” mendahki “e kin mwakelekelkihla kisiniei.”—1 Pit. 1:6, 7.