Koakon En Peidek
◼ Mwohn sounkalohk men me saikinte papidais h kakehr papidais, dahme eh kin iang towehda mihting en mwomwohdiso oh kalohk kin kasalehda?
En papidais iei pilipil me keieu kesempwal me emen pahn wia. Kahrehda mwohn emen eh pahn kakehr papidais, e anahne wehwehki dahme Koht kupwurki en wia. Patehng met, e anahne kasalehda me e koasoanehdi teng en mourki sapwellimen Koht koasoandi kan.
Paipel kin kehkehlingkihong Kristian kan en dehr tokedihsang arail pokonpene, kahrehda sounkalohk men me saikinte papidais anahne pwerisekiong towehda mihting en mwomwohdiso. (Ipru 10:24, 25) E pil pahn kin iang pasapeng. Ele e pahn iang Sukuhl ong Sapwellimen Koht Doadoahk, ahpw met kaidehn kosonned ehu.
Patehng met, pwehki Kristian kan kin alehier kehkehlik ren kalohki rongamwahu oh katohnpadahk, sounkalohk men me saikinte papidais anahne kaukaule iang kalohk mwohn eh pahn papidais. (Mad. 24:14; 28:19, 20) Sounpwong depe e anahne kalohk mwohn eh pahn kak papidaisla? Ahnsou itar pahn kohwong ih en kasalehda me eh pahn loalopwoatohng kaukaule oh ngoangki iang kalohk sounpwong koaros. (Mel. 78:37) Ahpw sohte anahne ahnsou werei sang eh tepida iang kalohk lao lel eh kakehr papidais, ele mwein sounpwong keite. Awa depe ong kalohk e anahne ripohtki? Sohte mie kosonned me pid ire wet. Elder kan anahne toupahrek ni ar tehk irair en emenemen sounkalohk.—Luk 21:1-4.
Elder kan (de sounsawas kan nan mwomwohdiso me malaulau elder) me kin tuhwong emen me pahn papidais pahn tamataman me emenemen aramas wekpeseng, oh irail anahne tehkada mwahu ma aramaso kakehr papidais. Re pahn kilang ma e uhdahn inengieng wiahla emen Sounkadehdehn Siohwa kan oh kin kasalehda eh kin kesempwalki eh kak patehng sapwellimen Siohwa pwihn oh iang wia doadoahk en kalohk. Elder kan wehwehki me e saikinte koahiengkihla doadoahngki Paipel de koahiekla duwehte sounkalohk kan me papidaislahr. Ma elder kan medewe me aramaso saikinte kak papidais, re pahn padahkihong ih ni kadek kahrepen ar wia pilipil wet sang nan Paipel oh sewese en ale sawas pwehn kekeirda.