Kalaudehla Atail Koahiek nan Doadoahk en Kalohk—Mwomwen Omw Pahn Sapeng Tohnihmw Men me Lingeringer

Dahme Kahrehda E Kesempwal: Me tohto me kitail kin tuhwong nan kalohk kin kadek. Ahpw, Sises ketin kohpadahr me ekei aramas pahn kailongkin kitail. (Sohn 17:14) Ihme kahrehda, e sohte kapwuriamwei ong kitail ma kitail kin tuhwong tohnihmw kan me kin lingeringer. Ni ahnsou me met kin pwarada, kitail men sapeng ni ahl ehu me kadek pwehn kaperenda emen me kitail kin wilian, Siohwa. (Rom 12:17-21; 1 Pit. 3:15, 16) Ni atail pahn wia met, e pahn kak pere irairo en deh laudla. E pahn pil wia mehn kadehde ong tohnihmwo oh meteikan me kilang oh kahrehiong ren men rong mwuhr ma emen Sounkadehdehn Siohwa mwemweitla rehrail.—2 Kor. 6:3.

Ia Duwen Omw Pahn Wia Met:

Kolokol meleilei oh kasalehda tiahk kadek. Met pahn sewese irairo en meleileidi. Dehr nsensuwedkihla mwomwen ahn tohnihmwo mwekid. (Ekl. 7:9) Mwein e lingeringer pwehki mie pein eh kahpwal kan de pwehki kitail pwarala ni ahnsou me sohte konehng. Ma rohng me kitail wahla reh me e lingeringerki, met kin kalapw wiawi pwehki mwein dahme e rong duwen kitail sapwung.—2 Kor. 4:4.
Sapeng ih ni kadek oh lokaia mwahu kan. (Lep. Pad. 15:1) Iet kahrepe siluh me tohnihmw men kakete lingeringerda pahn emen Sounkadehdehn Siohwa: (1) Ke kauwehla eh meir? Mendahki kitail sohte kin peki mahki atail doadoahk, ke kak ni karakarahk peki mahki omw pwarala ni ahnsou me sohte konehng. (2) E lingeringer pwehki dahme e rong sang meteikan me sohte mehlel duwen kitail? Ma iei, ke kak nda: “I kak wehwehki dahme kahrehda ke lingeringerki met. Ahpw, e mwomwen dahme ke rong duwen kiht sohte pwung. I kak menlau kawehwehda?” (3) Ia duwe, e sohte pwungki ekei soahng kan me kitail kin kamehlele, mwein duwen piskenla de nta? Ele ke kak nda: “I wehwehki. Mie ekei me kin kasalehda soangen pepehm en. I kak kasalehiong uhk sang nan Paipel poahsoanpen padahk wet?”
Ma tohnihmwo uhdahn lingeringer, e pahn keieu mwahu en kohkohla oh sohte sapeng. Ma e nda me Sounkadehdehn Siohwa kan en dehr pwurehng kohla ni imwe, ke kak kamehlelehiong me kitail pahn wauneki dahme e nda.

Song Wia Met Erein Sounpwongo:

Praktiski met erein kaudok en peneinei.
Mwurin omw kohkohlahsang tohnihmw men me lingeringer, kowe oh iengomw sounkalohko kak koasoiapene ia duwen omw pahn kak sapeng ni ahl ehu me pahn mwahusang mwo.