Kalaudehla Atail Koahiek nan Doadoahk en Kalohk​—Sewese Tohnsukuhl en Paipel kan en Kekeirda Inoukihong Siohwa Arail Mour oh Papidaisla

DAHME KAHREHDA E KESEMPWAL: Tohnsukuhl en Paipel kan anahne inoukihong Siohwa arail mour oh papidaisla pwe Siohwa en ketin kupwurkin irail. (1Pit 3:21) Eri Siohwa ahpw pahn ketin sewese irail kan me kin mour pahrekiong dahme irail inoukihda. (Mel 91:1, 2) Inou me Kristian men pahn wiahda pahn ongete Siohwa, kaidehn aramas, doadoahk ehu, de pwihn ehu. Ihme kahrehda, tohnsukuhl en Paipel kan anahne kakairada arail limpoak oh kalahngan ong Koht.​—Rom 14:7, 8.

IA DUWEN OMW PAHN WIA MET:

• Erein amwa onop, koasoia dahme ireo kin kasalehda duwen Siohwa. Koasoia uwen kesempwal en kaukaule wadek Paipel ehuehu rahn oh kapakapohng Siohwa “ahnsou koaros.”​—1Des 5:17; Seims 4:8

• Kangoange noumw tohnsukuhl en Paipelo en wiahda eh mehn akadei en inoukihong Siohwa eh mour oh papidaisla. Pil sewese ih en kak kapwaiada kisin mehn akadei kan, duwehte iang pasapeng ahnsoun mihting kan de kalohkong mehn mpe kan oh ienge tohndoadoahk kan. Tamataman me Siohwa sohte kin ketin idingkihong emen en papah ih. Emenemen anahne pein wiahda eh inou en papah ih.​—Deud 30:19, 20

• Kamwakid noumw tohnsukuhlo en wiahda wekidekla anahn kan pwehn kak kaperenda Siohwa oh warohng papidaisla. (Lep Pad 27:11) Pwehki ekei wiewia kan oh soahng kan me re ahnla wia kakete apwal en wekidala, tohnsukuhl en Paipelo pahn anahne kaukaule ale sawas pwehn kesehla eh mour en mahso oh wiliakapwala. (Ep 4:22-24) Ehukihong ih ekei ire kan sang nan Kahn Iroir me oaralape “Paipel Kin Wekidala Mouren Aramas”

• Koasoiaiong ih peren me ke kin ahneki nan omw papah Siohwa.​—Ais 48:17, 18