“Kumwail karanihala Koht, oh e pahn ketin karanihala kumwail.”—Seims 4:8

Koht Kin Ketin Karonge Atail Kapakap kan?

Mie pak me ke kin medewe ma Koht kin ketin karongeiuk ni omw kin kapakap? Me tohto kin ahneki soangen madamadau wet. Me tohto kin kapakapkihong Koht duwen soangen kahpwal kei, ahpw kahpwal ko kin mihmihte. Ia duwe, met wehwehki me Koht kin ketin pohnsehsehla atail kapakap kan? Soh! Paipel kin kamehlelehiong kitail me Koht kin ketin karonge kitail ni atail kin kapakap ong ih ni ahl me konehng. Kitail pahn tehk dahme Paipel mahsanih.

**KOHT KIN KETIN KAROKARONGE.**

“Pwehki omwi kin ketin sapeng pekipek kan. Aramas koaros pahn pwarewei rehmwi.”—Melkahka 65:2.

Ekei aramas kin kapakap pwehki re kin nda me met kin kahrehiong irail en nsenamwahula, mendahki ar sohte kamehlele me mie me uhdahn rongorong irail. Ahpw kapakap kaidehn mehkot kitail en wia pwe kitail en ihte nsenamwahula oh eri kak dadaur pahn atail kahpwal kan. Paipel kin kamehlelehiong kitail me Siohwaa “kin ketiket limwahn irail kan me kin likweriong, irail akan me kin likweriong ni mehlel. . . . E kin ketin karonge ar likwer.”—Melkahka 145:18, 19.

Kahrehda kitail kak uhdahn kamehlele me Siohwa Koht kin ketin karonge kapakap en sapwellime tohnkaudok kan. Ni limpoak e ketin mahsanih: “Kumwail eri pahn likwerih ie. Kumwail pahn kapakap ong ie, a I pahn karongei kumwail.”—Seremaia 29:12.

**KOHT KETIN KUPWURKI KEN KAPAKAP ONG IH.**

Pahpa men mwomwohd limwahn nah kisin serepeino ni eh mwadomwadongki mehn mwadong kei.

“Poadidiong kapakap.”—Rom 12:12.

Paipel kin kangoange kitail en kin “poadidiong kapakap” oh en kin ‘pousehlahte kapakap . . . ahnsou koaros.’ E sansal me Siohwa Koht ketin kupwurki kitail en kapakap ong ih.—Madiu 26:41; Episos 6:18.

Dahme kahrehda Koht ketin kupwurki kitail en kapakap ong ih? Nna song medewehla met: Mie pahpa men me sohte pahn men nah seri tikitiko en nda “Ipa, ke kak sewese ie”? Ei, ele pahpa men eseier dahme nah serio anahne de ia eh pepehm, ahpw ni ahnsou me e rong soangen koasoio, met kin kasalehiong ih me nah serio kin likih ih oh ira ahneki nanpwungmwahu keren. Ih pil duwen atail kin kapakap ong Siohwa Koht, kitail kin kasalehiong ih me kitail likih ih oh men karanihala ih.—Lepin Padahk 15:8; Seims 4:8.

**KOHT UHDAHN KETIN NSENOHKIN UHK.**

Ohl emen me kin doadoahk nan pesines ehu mwomwohd ni kehndake en ihmw ehu wie nsensuwed. Koakon ehu me audaudki eh kepwe kan mi limwah.

‘Kumwail patohwanohng ih amwail pwunod akan koaros, pwehki eh kin ketin nsenohkin kumwail.’—1 Piter 5:7.

Koht ketin kupwurki kitail en kapakap ong ih pwehki e ketin poakohng kitail oh ketin nsenohkin kitail. E ketin mwahngih duwen atail kahpwal akan oh pwunod akan koaros, oh ketin kupwurki sewese kitail.

Erein eh mour pwon, Nanmwarki Depit kin kapakap ong Siohwa Koht pwehn peki sawas oh patohwanohng Ih eh madamadau oh pepehm kan. (Melkahka 23:1-6) Ia sapwellimen Koht pepehm duwen Depit? Koht ketin poakohng Depit oh kin ketin karonge eh kapakap tohto kan. (Wiewia 13:22) Pil duwehte, Koht kin ketin karonge atail kapakap kan pwehki e ketin nsenohkin kitail.

“I KIN POAKOHNG KAUN-O, PWEHKI EH KIN KETIN KARONGE IE”

Mahsen pwukat iei mahsen en sounnting en melkahka pwoat nan Paipel. E ese me Koht kin ketin karonge eh kapakap kan, oh met uhdahn kin sewese ih laud. E kin karanih Koht oh e diarada kehl pwehn dadaur pahn kahpwal oh pwunod kan en mour.—Melkahka 116:1-9.

Ni atail kamehlele me Koht kin ketin karonge atail kapakap kan, kitail sohte pahn uhdihsang kapakap ong ih. Medewe duwen dahme lelohng Pedro, me kin kousoan paliepeng en Spein. Nah pwutako sounpar 19 oh e mehla nan aksident ehu. Nan eh nsensuwed, Pedro patohwanohng Koht eh pepehm kan oh kin pwurupwurehng kapakap oh peki Koht en ketin kansenamwahwih oh sewese ih. Dahme wiawi? Pedro nda: “Siohwa ketin sapengala ei kapakap kan ni ahnsou me ngehi oh ei pwoudo alehdi sawas sang iangat Kristian kan oh pil ni arail kin kansenamwahwih kiht.”

Ohl pahtou men wie kolokol kilel ehu ni ahnsou me ekei kompoakepah kan kansenamwahwih ih. — Atail kapakap kan kin kalapw pasapengla ni kompoakepatail limpoak kan ar kin kansenamwahwih oh sewese kitail

Mendahki kapakap sohte kamourada nah pwutako, ahpw e sewese laud Pedro oh eh peneineio. Eh pwoudo, María Carmen kin tamanda, oh nda: “Kapakap kin sewese ie ien dadaur pahn ei nsensuwed laud. I ese me Siohwa Koht ketin wehwehkin ie pwehki ni ei kin kapakap ong ih, I pehm ei meleileidi.”

Paipel oh soahng kan me aramas tohto kin lelohng kin kasalehda me Koht kin ketin karonge kapakap kan. Ahpw e pil sansal me Koht sohte kin ketin karonge kapakap koaros. Dahme kahrehda Koht kin ketin sapeng ekei kapakap a ekei soh?

a Siohwa iei mwaren Koht.—Rom 10:13.