Ia Duwen Omw Kak Kapakap Pwe Koht en Ketin Karongeiuk?
Siohwa Koht “kin ketin sapeng pekipek kan.” (Melkahka 65:2) Kitail kak patohong ih wasa oh ahnsou sohte lipilipil, oh pil ma ni ngihl laud de tikitik. Siohwa ketin kupwurki kitail en likwerihki ih “Samat,” oh e uhdahn ketin wia Sahm men me keieu mwahu me kitail kak samanki. (Madiu 6:9) Ni limpoak, Siohwa ketin padahkihong kitail ia duwen atail pahn kapakap pwe en ketin karonge kitail.
KAPAKAP ONG SIOHWA NI MWAREN SISES
“Ma kumwail peki rehn Sahmo mehkot, e pahn ketikihong kumwail ni edei.”—Sohn 16:23.
Mahsen en Sises kasalehda ni sansal me Siohwa ketin kupwurki kitail en kapakap ong ih, ahpw kaidehn kapakap doadoahngki sansal kan, aramas sarawi kan, tohnleng kan, de aramas melahr kan, ahpw ni mwaren Sises Krais. Ni atail kin kapakap ong Koht ni mwaren Sises, kitail kin kasalehda me kitail wehwehki me Koht pahn ketin karonge atail kapakap pwehki dahme Sises ketin wiadahr ong kitail. Sises mahsanih: “Sohte me kak kohla rehn Sahmo ma sohte ngehi.”—Sohn 14:6.
KOASOI SANG NAN MOHNGIONG
“Kumwail kasalehiong amwail apwal kan koaros.”—Melkahka 62:8.
Ni ahnsou me kitail kin kapakap ong Siohwa, kitail anahne koasoi duwehte me kitail koasoakoasoiong pahpa limpoak men. Kitail anahne koasoiong ih ni wahu oh sang nan mohngiong, ahpw kaidehn en wadek sang nan pwuhk ehu de ndinda mehkot me kitail wadlikihala.
KAPAKAP ME PAHREKIONG KUPWUREN KOHT
“Sohte lipilipil dahme kitail kin peki nin duwen kupwure, e pahn ketin karonge kitail.”—1 Sohn 5:14.
Nan Paipel, Siohwa Koht ketin padahkihong kitail dahme e pahn ketin wia ong kitail oh dahme e ketin kupwurki kitail en wia. Pwe Koht en ketin kupwurperenki atail kapakap kan, kitail anahne kapakap “nin duwen kupwure.” Pwehn wia met, kitail anahne onopki Paipel pwe kitail en kak esehla mwahu duwen ih. Ma kitail wia met, atail kapakap kan pahn kaperenda ih.
DAHME KITAIL KAK KAPAKAPKI?
Kapakapki Dahme Kitail Anahne. Kitail kak kapakapki atail anahn en ehuehu rahn—mwenge, likou, oh wasahn kousoan. Kitail pil kak kapakapki erpit en wiahda pilipil mwahu kan oh kehl en dadaur pahn atail kahpwal kan. Kitail kak kapakapki pwoson, mahkpen dihp, oh sapwellimen Koht sawas.—Luk 11:3, 4, 13; Seims 1:5, 17.
Kapakapki Meteikan. Pahpa nohno limpoak kan kin perenkihda ni ahnsou me neirail seri kan kin limpoakpene. Kitail iei sapwellimen Siohwa seri kan, oh e ketin kupwurki kitail en nsenohki emenemen oh sawaspene. E konehng kitail en kapakapki atail pwoud, neitail seri kan, atail peneinei, oh kompoakepatail kan. Tohnpadahk Seims ntingihedi: “Kapakapki emenemen.”—Seims 5:16.
Kasalehda Kalahngan. Me pid Sounkapikpatail, Paipel mahsanih: “Sang ni eh ketin wia me mwahu, e ketikihong kumwail keteu sang nanleng oh ahnsoun rahk oh ketikihong kumwail diren mwenge oh audehkihda mohngiongimwail peren.” (Wiewia 14:17) Ni atail kin medewe duwen soahng koaros me Koht ketin wiadahr ong kitail, kitail pahn mwekidki en kasalehda atail kalahngan ong ih ni kapakap. Kitail pil anahne kasalehda kalahngan ong Koht sang ni atail kin peikiong ih.—Kolose 3:15.
KANENGAMAH OH DEHR UHDIHSANG KAPAKAP
Ele ekei pak kitail kin nsensuwed pwehki atail kapakap sang mohngiong sohte mwadang pasapengla. Ia duwe, met wehwehki me Koht sohte ketin nsenohki kitail? Soh douluhl! Medewehla dahme wiawihong ekei, me kasalehda me kitail en dehr uhdihsang kapakap.
Steve, me koasoiepe pwarada ni keieun oaralapo koasoia, “Ma I uhdihsang kapakap, e pahn sohla ei koapworopwor en pwurehng ahneki peren.” Dahme wekidala eh madamadau? E tepida onopki Paipel oh sukuhlki duwen anahnepen kapakap oh sohte uhdihsang kapakap. Steve nda: “I kin kapakap ong Koht oh kalahngankihong ih sawas en limpoak koaros me I alehdi sang kompoakepahi mwahu kan. Met I kin uhdahn peren laudsang mahs.”
Ia duwen Jenny me kin medewe me e sohte warohng Koht en ketin karonge ih? E nda, “Ni ahnsou me I keieu pehm sohte katepei, I peki Koht ni ngidingid en ketin sewese ie en wehwehki ia kahrepen ei pehm me sohte katepei.” Ia duwen met eh sewese ih? “Ei kin koasoiong Koht kin sewese ie en kilang pein ngehi duwehte me e kin ketin wia, me e sohte kin ketin kadeik ie mehnda ma ei mohngiong kin kadeik ie. Met pil sewese ie en dehr kesehla ei koapworopwor.” Ia imwilahn met? “Kapakap kin sewese ie en kilang Siohwa nin duwen Koht, Sahm oh Kompoakepahi men me uhdahn mie, oh poakohng oh nsenohkin ie, oh me pahn ahnsou koaros sewese ie ma I nantihongete wia dahme e ketin kupwurki.”
Ni Isabel eh kilang nah pwutak Gerard eh pereperenki mour mendahki eh kahpwal en paliwar, e nda: “I esehda me e wia pasapengpen ei kapakap kan me keieu mwahu.”
Pil medewe dahme wiawihong Isabel. Ni ahnsou me e liseianda, eh toahkte ko ndaiong ih me nah serio pahn ipwidi pakalong. E uhdahn nsensuwedla. Ekei pil kaweidki en kauwehla eh liseiano. “I pehm me likamw I pahn mehkihla pwunod en nan kapehdi.” Dahme e wia? E nda, “I kin pwurupwurehng kapakapki sawas sang rehn Koht.” Kedekedeo, e naitikihedi pwutak emen, Gerard, oh e pakalong. Ia duwe, Isabel medewe me Koht ketin sapengala eh kapakap kan? Ei, ih met me e medewe! Ni ahl dah? Isabel nda, “Ni ei kin kilang nei pwutako me met sounparehr 14 eh pereperenki mour mendahki eh kahpwal en paliwar, I esehda me e wia pasapengpen ei kapakap kan me keieu mwahu, kapai keieu laud me Siohwa Koht ketikihong ie.”
Soangen koasoi pwukat me kohsang nan mohngiong kin kahrehiong kitail en medewe duwen mahsen en sounmelkahkao: “Maing KAUN, komw pahn ketin karonge kapakap en me tikitik kan; komw pahn ketin kakehlahda nan kapehdirail.” (Melkahka 10:17) Uhdahn kahrepe mwahu kei met kitail en dehr uhdihsang kapakap!
Kitail kak diarada sang nan Paipel kapakap tohto me Sises ketin wia. Kapakap me aramas tohto kin ese iei me e ketin padahkihong sapwellime tohnpadahk ko. Dahme kitail sukuhlki sang kapakap wet?