Wiahla Aramas Mwahu Pahn Kihong Uhk Mour Mwahu ni Ahnsou Kohkohdo?
Erein sounpar tohto, aramas tohto kin medewe me en wiahla aramas mwahu iei me pahn kahrehiong emen en ahneki mour mwahu ni ahnsou kohkohdo. Karasepe, aramas tohto nan Eisia pwungki dahme sounpadahk ndand me adaneki Confucius (pahr 551-479 Mwohn Krais) koasoia: “Dahme ke sohte men en wiawihong uhk, ke dehr wiahiong meteikan.”a
AHL EHU ME TOHTO KIN IDAWEHN
Aramas tohto kamehlele me ma re pahn kin tiahk mwahu re pahn ahneki mour mwahu ni ahnsou kohkohdo. Re kin song en kasalehda wahu, kakairada tiahk mwahu kan, oh pohnese ar pwukoa oh ahnekihte nsenmwakelekel. Linh, lih emen me kin mi nan Vietnam koasoia, “Ahnsou koaros I kin kamehlele me ma I pahn kin mehlel oh kin tiahk mwahu, I pahn ahneki mour mwahu.”
Ekei aramas kin song wia soahng mwahu kan pwehki dahme ar pelien lamalam kan kin padahngki. Ohl emen me adaneki Hsu-Yun me kin mi nan Taiwan koasoia, “I kin rong me ma aramas emen kin wia soahng mwahu kan e pahn nsenamwahu mwurin eh mehla ahpw ma e kin wia soahng suwed kan, e pahn lokolok mwurin eh mehla.”
IA IMWILA KAN?
E mehlel me ni atail kin wiahiong meteikan soahng mwahu kan, kitail kin paiekihda soahng tohto. Ahpw aramas tohto me kin nantihong wiahiong meteikan soahng mwahu kan kin diarada me ahnsou koaros re sohte kin alehdi dahme re kasik. Lih emen me adaneki Shiu Ping me kin mi nan Hong Kong, koasoia, “Sang ni dahme I lelohngehr, I esehda me irail akan me kin wia soahng mwahu kan sohte kin alehdi dahme re kasik ahnsou koaros. I kin song wia uwen ei kak en apwalih ei peneinei oh wia me mwahu. Ahpw ei mouren pwopwoud sohte pweida oh ei pwoudo kesehla ngehi oh nei pwutako.”
Me tohto diarada me pelien lamalam kan sohte kin wiahiong aramas en mwahula ahnsou koaros. Etsuko, lih emen me kin mi nan Sapan koasoia, “I iangala pelien lamalam ehu oh I ahneki pwukoa en apwalih me pwulopwul kan. I pwuriamweikihla ni ei kilang me ekei tohn sarawio kin wia tiahk samin kan, kin siaiki ihs me pahn kaunda oh kin doadoahngki mwohnihn sarawio ni ahl sapwung.”
“I kin song wia uwen ei kak en apwalih ei peneinei oh wia me mwahu. Ahpw ei mouren pwopwoud sohte pweida oh ei pwoudo kesehla ngehi oh nei pwutako.”—SHIU PING, HONG KONG
Ekei aramas me kin poadidiong pelien lamalam kin song wia me mwahu ahpw re kin nsensuwedla ni soahng suwed kan eh kin lelohng irail. Ih met me Van emen lih me kin mi nan Vietnam pehm, “E koasoia, rahn koaros I kin pwainda wahnsahpw, wahnrohs oh mwenge oh meirongki mepwukat pohn pei sarawi en ei peneinei me melahr akan oh I kin koapworopworki me I pahn ahneki mour mwahu ni ahnsou kohkohdo. Mendahki ei wiewia mwahu koaros oh tiahk en pelien lamalam me I kin wiewia erein sounpar tohto, ei pwoudo ahnekihda soumwahu laud ehu. Mwuri, nei serepeino mehla ni eh pwulopwulte, ni ahnsou me e sukusukuhl nan ehu sahpw tohrohr.”
Ma atail wiahla aramas mwahu men sohte itar en ahneki mour ni ahnsou kohkohdo, a dahme pahn itar? Pwehn sapengala peidek wet, kitail anahne kaweid likilik ehu—me pahn kak sapengala atail peidek kan oh kasalehiong kitail elen mour nsenamwahu ni ahnsou kohkohdo. Ia wasa kitail kak diar soangen kaweid wet?
a Pwehn kalaudehla omw wehwehki dahme Confucius padahngki, menlau kilang pwuhken Mankind’s Search for God, irelaud 7, parakrap 31-35, me Sounkadehdehn Siohwa kan wiahda oh e mi nan online nan www.jw.org.