Ke Kak Pilada Mwomwen Omw Mour ni Ahnsou Kohkohdo

Mpen sounpar 3,500 samwalahro, Siohwa Koht ketin mahsanihong irail kan me kin kaudokiong ih dahme re anahne wia pwe ren ahneki mour mwahu ni ahnsou kohkohdo: “Kumwail en pilada nanpwungen mour oh mehla, nanpwungen sapwellimen Koht kupwuramwahu de sapwellimen Koht keria. Eri, pilada mour.”​—Deuderonomi 30:19.

Aramas ako anahne wiahda pilipil pwung pwe ren ahneki mour mwahu ni ahnsou kohkohdo. Rahnwet kitail pil anahne wiahda soangen pilipilohte. Paipel kawehwehda ia duwen atail kak pilada en ahneki mour mwahu ni ahnsou kohkohdo: “Poakohng KAUN-O, amwail Koht, kapwaiada sapwellime mahsen.”​—Deuderonomi 30:20.

IA DUWEN ATAIL KAK POAKOHNG SIOHWA OH RONG KAPITIE?

SUKUHLKI NAN PAIPEL: Pwe ken poakohng Siohwa, ke anahne sukuhlki mahs duwen ih sang nan Paipel. Ni omw wia met ke pahn tehkada me e wia Koht limpoak men me ketin kupwurki dahme keieu mwahu ong uhk. E ketin lukeiuk ken kin kapakapohng ih, ‘pwehki e kin ketin nsenohkin uhk.’ (1 Piter 5:7) Paipel inoukihda me ma ke pahn nantihong karanihala ih, ‘e pahn ketin karanihiukala.’​—Seims 4:8.

KAPWAIADA DAHME KE SUKUHLKI: En rong Koht kin wehwehki en idawehn sapwellime kaweid erpit kan me mi nan Paipel. Ni omw wia met, ke pahn pweida oh kin mwekid ni elen erpit.​—Sosua 1:8.