Nin Duwen Mwomwohdiso Ehu, Sewese Tohnsukuhl en Paipel kan en Kekeirda oh Papidaisla

1-2. Ihs me kak sewese tohnsukuhl en Paipel men en kekeirda oh papidaisla?

SISTER men sang Fiji me ede Amy nda: “I uhdahn perenki dahme I kin sukuhlki nan ei onop en Paipel. I ese me met iei padahk mehlel. Ahpw ni ei tepida patehng riei Kristian kan, e sewese ie en wiahda wekidekla kan oh papidaisla.” Dahme wiawihong Amy padahkihong kitail mehkot kesempwal: Tohnsukuhl en Paipel men ele pahn kekeirda oh papidaisla ni eh kin ale sawas sang meteikan nan mwomwohdiso.

² Emenemen sounkalohk kak sewese me kapw kan en wiahla kisehn mwomwohdiso. (Ep. 4:16) Pioneer men sang Vanuatu me ede Leilani nda: “Mie lepin kahs ehu me nda: ‘Koaros nan kousapw ehu kin sewese apwalihada seri men.’ I medewe met kin duwehte doadoahk en katohnpadahk; mwomwohdiso ehu kin sewese emen en pedolong nan padahk mehlel.” Eri koaros tohnpeneinei kan, kompoakparail kan, oh sounpadahk kan kin sewese seri men en keirda oh laudla. Irail kin wia met sang ni arail kangoange serio oh padahkihong ih mehn kasukuhl kesempwal kan. Duwehte met, sounkalohk kan kak kihda kaweid, kangoang, oh wiahda mehn kahlemeng mwahu ong tohnsukuhl en Paipel kan, pwehn sewese irail en kekeirda oh papidaisla.​—Lep. Pad. 15:22.

3. Dahme ke sukuhlkihsang dahme Ana, Dorin, oh Leilani koasoia?

³ Dahme kahrehda sounkalohko me wia onop en Paipel pahn perenki ni meteikan nan mwomwohdiso ar sewese nah tohnsukuhlo? Tehk dahme pioneer tohrohr men sang Moldova me ede Ana nda: “E uhdahn apwal ong emente en apwalihala anahn koaros en tohnsukuhl en Paipel men ni ahnsou me e tepida kekeirda.” Dorin, emen brother me wia pioneer tohrohr men sang wasaote, nda: “Pak tohto, sounkalohk teikan kin nda mehkot me kin sair mohngiong en tohnsukuhlo, mehkot me pein ngehi sohte medewehda en nda.” Leilani kihda pil ehu kahrepe: “Ni tohnsukuhlo eh kilang limpoak oh nsenoh me riatail Kristian kan kin kasalehiong ih, met kin sewese ih en wehwehki me kitail uhdahn sapwellimen Siohwa aramas kei.”​—Sohn 13:35.

4. Dahme kitail pahn koasoiapene nan iren onop wet?

⁴ Ahpw ele ke medewe, ‘Dahme I kak wia pwehn sewese tohnsukuhl en Paipel men en kekeirda mehnda ma kaidehn ngehi me kin onop reh?’ Kitail pahn koasoiapene dahme kitail kak wia ni atail iangih emen sounkalohk onop Paipel rehn nah tohnsukuhlo, oh dahme kitail kak wia ni tohnsukuhl en Paipelo eh tepida iang towehda mihting kan. Kitail pahn pil kilang ia duwen elder kan ar kak sewese tohnsukuhl en Paipel kan en kekeirda oh papidaisla.

NI OMW IANGIH EMEN NI EH ONOP PAIPEL REHN EMEN

5. Dahme ke anahne wia ma emen luke iuk en iangih ni eh wia onop en Paipel?

⁵ Ni onop en Paipel ehu, sounpadahko me keieu pwukoahki sewese tohnsukuhlo en wehwehki Mahsen en Koht. Ma sounpadahko peki ken iangih kohla ni onopo, ke iangete pwehn sewese ih. (Ekl. 4:9, 10) Dahme ke kak wia pwehn wia sounsawas mwahu men erein onop en Paipel ehu?

6. Ni omw pahn iang emen nan eh onop en Paipel, ia duwen omw kak doadoahngki kaweid me mi nan Lepin Padahk 20:18?

⁶ Kaunopada ong onop en Paipelo. Keieu, peki rehn sounpadahko en padahkihong uhk duwen tohnsukuhlo. (Wadek Lepin Padahk 20:18.) Ke kak idek: “Dahme ke ese duwen tohnsukuhlo? Iren mehn kasukuhl dah me ke pahn onopki reh? Dahme ke men tohnsukuhlo en sukuhlkihsang onop wet? Mie mehkot me I anahne wia de dehr wia de nda erein onopo? Ia duwen ei kak kangoange tohnsukuhlo en kekeirda?” Sounpadahko sohte pahn ndaiong uhk soahng kan me e sohte anahne nda duwen tohnsukuhlo, ahpw dahme e pahn ndaiong uhk kak sawas. Emen misineri me adaneki Joy kin koasoia ire pwukat rehn irail kan me kin iangih kohla ni eh onop en Paipelo. E nda: “At koasoiapene met kin sewese iengeo en men sewese tohnsukuhlo oh pilada dahme e pahn nda erein onopo.”

7. Dahme kahrehda ke anahne kaunopada ma ke pahn iangih emen nan eh onop en Paipel?

⁷ Ma emen luke iuk en iangih wia onop en Paipel rehn emen, e pahn mwahu ma ke kak kaunopada iren mehn kasukuhlo me kumwail pahn koasoiapene. (Esra 7:10) Dorin, brother me kitail koasoiapene mwoweo, nda: “I kalahnganki ni iengeio eh kin kaunopada ong onopo. Eri e kak iang koasoia soahng kan me kak sawas.” Patehng met, tohnsukuhlo ele pahn kilang me kumwa koaros kaunopada mwahu, oh met pahn wia mehn kahlemeng mwahu ong ih. Mehnda ma ke sohte kak kaunopada mwahu ong iren mehn kasukuhlo, ke kak wiahda ahnsou en rapahkihda ire kesempwal ko.

8. Ia duwen omw kak tehk mwahu me omw kapakap nan onop en Paipel ehu kin katapan?

⁸ Nan onop en Paipel ehu, kapakap kin kesempwal. Eri medewe dahme ke pahn nda ma sounpadahk en Paipelo peki ken kapakap. Eri omw kapakapo ele pahn katapan. (Mel. 141:2) Hanae, sang Sapan, tamatamante kapakap kan en sister men me kin iang eh sounpadahk en Paipelo. E nda: “I kilang me eh nanpwungmwahu rehn Siohwa uhdahn kehlail, oh I men duwehte ih. I pil pehm me mie me poakohng ie ni eh kin nda edeio nan eh kapakap kan.”

9. Nin duwen me Seims 1:19 mahsanih, ia duwen omw kak sawas ma ke iang emen nan eh onop en Paipelo?

⁹ Sewese sounpadahko erein onopo. Pioneer tohrohr men sang Nigeria me ede Omamuyovbi nda: “Emen me kin iang onopo kin sawas ni eh rong mwahu ahnsoun onopo. E kin kihda iren sawas mwahu kan oh sohte kalapw koasoakoasoi pwehki e wehwehki me sounpadahko me pwukoahki wia onopo.” Eri iahd me ke pahn nda mehkot, oh dahme ke pahn nda? (Lep. Pad. 15:23) Rong kanahieng ni ahnsou me sounpadahko oh tohnsukuhlo koasoakoasoi. (Wadek Seims 1:19.) Eri ke pahn onopada en sawas ni ahnsou me konehng. Ke anahne medewe mahs mwohn omw koasoi. Karasepe, ke sohte pahn men koasoakoasoi ahnsou reirei, sopuk sounpadahko ni eh kaukawehwe ire ehu, de tepida koasoia ehu ire tohrohr. Ahpw ni omw koasoi ni mwotomwot, kihda karasaras de peidek ehu, ke kak sewese kasansalehda ire kesempwalo me kumwail koasoia. Ekei pak ele ke kin medewe me sohte mehkot ke kak koasoia nan onopo. Ahpw ma ke kin kapinga tohnsukuhlo oh kasalehda omw nsenohki ih, ke pahn uhdahn sewese ih en kekeirda.

10. Ia duwen omw koasoiahda soahng kan me wiawihong uhk eh kak sewese tohnsukuhl en Paipel men?

¹⁰ Koasoiahda soahng kan me wiawihong uhk. Ma konehng, ke kak koasoiaiong tohnsukuhlo ni mwotomwot ia duwen omw esehla padahk mehlel, ia duwen omw powehdi kahpwal ehu, de ia duwen Siohwa eh kin ketin sewese iuk. (Mel. 78:4, 7) Mwein ele ih met me tohnsukuhlo anahne rong. Met ele kak kakehlakahda eh pwoson de kangoange ih en pousehlahte kekeirda oh papidaisla. Oh met pil kak kasalehiong ih ia duwen eh pahn powehdi kahpwal ehu me e ahneki. (1 Pit. 5:9) Gabriel sang Brazil me met wia pioneer men, tamataman dahme sewese ih ni ahnsou me emen kin onop Paipel reh. E nda: “Ni ei kin rong duwen dahme kin wiawihong riatail Kristian ko, I esehda me Siohwa kin ketin mwahngih soangen kahpwal kan me kitail ahneki. Eri ma irail kak powehdi kahpwal pwukat, I pil kak.”

NI TOHNSUKUHL EN PAIPELO EH IANG TOWEHDA MIHTING KAN

11-12. Dahme kahrehda kitail en kasamwo ni limpoak tohnsukuhl en Paipel men me iang towehda mihting?

¹¹ Pwe tohnsukuhl en Paipel men en kekeirda oh papidaisla, e anahne kaukaule iang towehda mihting en mwomwohdiso kan oh paiekihda. (Ipru 10:24, 25) Ele sounpadahko pahn luke ih en tepida iang mihting. Ni ahnsou me e iang, kitail koaros kak kangoange ih en pousehlahte kohdo ni Wasahn Kaudoko. Ia duwen atail kak wia met?

¹² Kasamwo tohnsukuhlo ni limpoak. (Rom 15:7) Ma tohnsukuhlo pehm me kitail kin kasamwo ih ni mihting kan, ele e pahn men pwurupwurehng kohdo ni atail Wasahn Kaudoko. Kitail en dehr kahrehiong ih en soansuwedda, ahpw kasamwo ih ni limpoak, oh kahrehla ih en tuhwong meteikan. Koasoiong ih pwehki mwein eh sounpadahko saik kohdo de e soupisengki pwukoa kan nan Wasahn Kaudoko. Rong kanahieng dahme tohnsukuhlo nda oh kasalehiong me ke nsenohki ih. Ni omw kasamwo tohnsukuhl men ni limpoak, ia duwen met eh kak sewese ih? Tehk dahme wiawihong Dmitrii me papidaisla sounpar kei samwalahro oh met wia emen sounsawas. Ni eh medewehla tepin eh iang towehda mihting, e nda: “Brother men kilang ei saloh oh kesikesihnen likin Wasahn Kaudoko oh ni kadek e iang ie pedolongala loaleo. Me tohto kohdo oh kasamwo ie. I uhdahn pwuriamweikihla. I uhdahn perenki met oh men mihting kan en wiawi rahn koaros nan wihk ehu. Saik pak ehu soahng wet wiawihong ie.”

13. Ia duwen omw mehn kahlemeng mwahu eh kak sewese tohnsukuhl en Paipel men?

¹³ Wiahda mehn kahlemeng mwahu. Omw mehn kahlemeng mwahu kak sewese tohnsukuhl en Paipelo en kamehlele me kitail Kristian mehlel kei. (Mad. 5:16) Vitalii, me met wia pioneer men nan Moldova, nda: “I kin kilang mwomwen mour, madamadau oh wiewia en meteikan nan mwomwohdiso. Met kamehlelehiong ie me Sounkadehdehn Siohwa kan kin uhdahn wia kaudok mehlel.”

14. Ia duwen omw mehn kahlemeng eh kak sewese emen en doulahte kekeirda?

¹⁴ Mwohn eh kak papidaisla, tohnsukuhlo anahne kapwaiada dahme e kin sukuhlki. Met sohte kin mengei ahnsou koaros. Ahpw ni tohnsukuhlo eh kilang uwen omw kin paiekihda omw doadoahngki kaweid kan en Paipel, e pahn men alasang uhk. (1 Kor. 11:1) Tehk mehn kahlemeng en Hanae me kitail koasoiapene mwoweo. E nda: “Riatail Kristian kan kin wiewia soahng kan me I kin sukuhlki ien wia. I kilang ia duwen ei kak kangoange, mahkohng, oh kasalehda limpoak ong meteikan. Irail kin ahnsou koaros nda soahng mwahu kan duwen meteikan. I men alasang irail.”

15. Ia duwen Lepin Padahk 27:17 eh sewese kitail en kilang kahrepen atail en kompoakepahnkihla tohnsukuhl en Paipel men ni eh kin pousehlahte towehda mihting kan?

¹⁵ Kompoakepahnkihla tohnsukuhlo. Ni tohnsukuhlo eh pousehlahte towehda mihting kan, kasalehdahte omw kin nsenohki ih. (Pil. 2:4) Ke kak song en esehla mwahu ih. Ke kak ndaiong uwen omw perenki kilang eh wiahda wekidekla kan. Ke pil kak idek reh ia iren eh onop en Paipel, eh peneinei, oh eh doadoahko. Ahpw kanahieng ken dehr idek peidek kan me kakete kanamenekihala ih. Soangen koasoakoasoipene wet kak kahrehiong kumwa en karanihala emenemen. Ni omw kompoakepahnkihla tohnsukuhlo, ke kin sewese ih en kekeirda oh papidaisla. (Wadek Lepin Padahk 27:17.) Met Hanae wia pioneer men. Ni eh tamanda tepin eh iang towehda mihting, e nda: “Ni ei kin wiahda kompoakepahi kan nan mwomwohdiso, I tepida kasikasik mihting kan, oh I kin iang towehda mehnda ma I pwang. I perenki werekiong kompoakepahi kapw kan, oh met sewese ie en uhdihsang werekiong irail kan me sohte kin kaudokiong Siohwa. I men karanihala Siohwa oh riei Kristian kan. Eri I pilada en papidaisla.”

16. Dahme ke pil kak wia pwehn sewese tohnsukuhl en Paipel men en perenki wia kisehn mwomwohdiso?

¹⁶ Ni tohnsukuhlo eh pousehlahte wiahda wekidekla kan, sewese ih en pehm me e wia kisehn mwomwohdiso. Ke kak wia met sang ni omw kin kasamwo ih. (Ipru 13:2) Ni eh kin tamanda ahnsou me e wia tohnsukuhl en Paipel men, Denis, me kin papah nan Moldova, nda: “Pak tohto, ngehi oh ei pwoudo kin ale luhk en patehng riat Kristian kan. Irail kin ndaiong kiht duwen Siohwa eh kin ketin sewese irail. Met kin kangoange kiht. E kamehlelehiong kiht me se men papah Siohwa oh me se pahn ahneki mour nsenamwahu ma se wia met.” Ni ahnsou me tohnsukuhl en Paipelo wiahla sounkalohk, ke pil kak luke ih en iang uhk kalohk. Sounkalohk men sang Brazil me ede Diego nda: “Brother tohto luke ie en iang irail kalohk. Met iei ahl keieu mwahu en esehla mwahu irail. Ni ei wia met, I sukuhlki soahng tohto, oh I pehm ei karanihala Siohwa oh Sises.”

IA DUWEN ELDER KAN AR KAK SAWAS?

17. Ia duwen elder kan ar kak sewese tohnsukuhl en Paipel kan?

¹⁷ Wiahda ahnsou ong tohnsukuhl en Paipel kan. Elder kan, ni amwail kin kasalehda limpoak oh nsenohki tohnsukuhl kan, kumwail kak sewese irail en kekeirda oh papidaisla. Ia duwe, kumwail kin kak kaukaule koasoiong tohnsukuhl en Paipel kan nan mihting kan? Irail pahn pehm me kumwail kin nsenohkin irail ma kumwail tamataman adarail kan, ahpw mehlel ni ahnsou me irail tepida iang pasapeng. Ia duwe, kumwail kak wiahda ahnsou en iang sounkalohk men ni eh wia onop en Paipel rehn emen? Ele kumwail kak sewese tohnsukuhl men laudsang me kumwail medewe. Pioneer men me adaneki Jackie sang Nigeria nda: “Tohnsukuhl tohto kin pwuriamweila ni arail esehda me brother me iang ie onop Paipel rehrailo iei elder men. Emen tohnsukuhl ko nda: ‘Ei pastoro sohte douluhl pahn wia met. E kin mwemweitlahte rehn me kepwehpwe kan oh ihte ma irail pahn pwain ih!’” Tohnsukuhl menet kin iang towehda mihting kan ahnsou wet.

18. Ia duwen elder kan ar kak kapwaiada kaweid me kileldi nan Wiewia 20:28?

¹⁸ Kaiahne oh kangoange sounpadahk en Paipel kan. Elder kan, kumwail ahneki pwukoa kesempwal en sewese sounkalohk kan en wia sounkalohk oh sounpadahk koahiek kei. (Wadek Wiewia 20:28.) Ma emen kin namenek en wia onop en Paipel rehn emen ma kumwail iang ih, peki reh ma kumwail kak wia onopo. Jackie, me kitail koasoiapene mwoweo, nda: “Elder kan kin kalapw idek rehi ia iren nei tohnsukuhl en Paipel kan. Ni ei kin lelohng apwal ni ei wia onop en Paipel, irail kin sewese kaweidihie.” Elder kan kak wia soahng tohto pwehn kangoange sounpadahk en Paipel kan ren nantihong. (1 Des. 5:11) Jackie pil nda: “I kin perenki ni elder kan ar kin kangoange ie oh nda me irail kalahnganki ei kin doadoahk laud. Soangen lokaia pwukat kin kansenamwahwihela duwehte pihl lemwulemwur ni ahnsou karakar ehu. Arail lokaia kadek kin kalaudehla ei peren oh sewese ie en pehm me I wiewia doadoahk mwahu nan ei onop en Paipel kan.”​—Lep. Pad. 25:25.

19. Soangen peren dah me kitail koaros kak ahneki?

¹⁹ Mehnda ma kitail sohte kin onop Paipel rehn emen ahnsou wet, kitail pil kak sewese emen en kekeirda oh papidaisla. Kitail sohte pahn koasoakoasoi ahnsou werei erein onopo ahpw sang atail nda soahng kan me kitail kaunopada mwahu, kitail kak sewese sounpadahko. Kitail kak kompoakepahnkihla tohnsukuhl kan ni arail kin kohdo ni atail Wasahn Kaudoko, oh kak wia mehn kahlemeng mwahu ong irail. Oh elder kan kak kangoange tohnsukuhl kan sang ni arail kin wiahda ahnsou ong irail, oh sounpadahk kan sang ni arail kaiahne oh kapinga irail. Kitail kin uhdahn perenki ni atail kak wiahda mehkot, mehnda ma tikitik, pwehn sewese emen en poakohng oh papah Siohwa!