Me Pwulopwul kan​—Pousehlahte Kekeirda Mwurin Papidais

1. Soahng mwahu dah kan me irail me pwulopwul tohto wiadahr?

PAHR koaros, Kristian pwulopwul kid kid kei kin papidaisla. Ke wiahier kahk wet? Ma ei, riomw Kristian kan kin iang uhk peren, oh Siohwa pil ketin kupwurperenki met! (Lep. Pad. 27:11) Medewehla soahng mwahu tohto me ke wiadahr. Ke kin pwerisekiong onopki Paipel erein sounpar tohto. Omw onop kin kamehlelehiong uhk me Paipel iei Mahsen en Koht. Ahpw laudsang met, ke poakohngala oh esehla Ih me ketin wiahda Paipel. Omw poakohng Siohwa uhdahn laudla me kahrehda ke pilada en papah ih oh papidaisla. Ke uhdahn wiahda pilipil mwahu ehu!

2. Dahme kitail pahn koasoiapene nan iren onop wet?

² Mwohn omw papidaisla, ele mie kahpwal kan me kahrehda e apwal ong uhk en lelepek ong Siohwa. Ahpw ni omw lalaudla, ke pahn lelohng kahpwal teikan. Sehdan pahn song en kauhdi omw poakohng oh papah Siohwa. (Ep. 4:14) Dehr mweidohng met en wiawi. Dahme kak seweseiuk en loalopwoatohngete Siohwa oh kapwaiada omw inou en papah ih? Ke anahne “nantihongete” wiahla Kristian koahiek men. (Ipru 6:1) Ahpw, ia duwen omw kak wia met? Ih met me kitail pahn koasoiapene nan iren onop wet.

DAHME KE KAK WIA PWEHN WIAHLA KRISTIAN KOAHIEK MEN?

3. Dahme Kristian koaros anahne wia mwurin arail papidaisla?

³ Mwurin papidais, kitail koaros anahne kapwaiada kaweid me wahnpoaron Pohl kihong Kristian kan nan Episos. E kangoange irail en wiahla Kristian “koahiek kei.” (Ep. 4:13) Met wehwehki me irail anahne ‘pousehlahte kekeirda.’ Kitail kak wehwehki dahme Pohl koasoia ni eh kapahrekihong kekeirdahn Kristian men ong keirdahn seri men. Pahpa nohno kan kin poakohng oh pohlki neirail seri pwelel men. Ahpw serio sohte kak wiahte seri pwelel men kohkohla. E kin ekisekis “solahr kin wia mwomwen seri.” (1 Kor. 13:11) Pil duwehte Kristian kan. Mwurin papidais, kitail anahne pousehlahte kekeirda. Kitail pahn koasoiapene ekei iren sawas me kak sewese kitail en wia met.

4. Dahme kak seweseiuk en kekeirda oh koahiekla? Menlau kawehwehda. (Pilipai 1:9)

⁴ Kalaudehla omw poakohng Siohwa. Ke kin uhdahn poakohng Siohwa. Ahpw ke kak kalaudehla omw poakohng ih. Ia duwen? Wahnpoaron Pohl kasalehda ehu ahl en wia met nan Pilipai 1:9. (Wadek.) Pohl kapakapki me ahn mehn Pilipai ko limpoak en kin “lalaudla.” Eri kitail kak kalaudehla atail limpoak ong Siohwa. Kitail kak wia met sang ni atail alehda “loalokong pwung oh wehwehkihla mwahu.” Atail kalaudehla atail ese Siohwa pahn kalaudehla atail poakohng ih oh kalahnganki sapwellime irair oh wiewia kan. Atail men kaperenda ih kin laudla oh kitail sohte men kansensuwedihada. Kitail kin wia uwen atail kak koaros en wehwehki kupwure oh ia duwen atail pahn kapwaiada.

5-6. Ia duwen atail kak kalaudehla atail poakohng Siohwa? Menlau kawehwehda.

⁵ Kitail kak kalaudehla atail poakohng Siohwa sang ni atail esehla mwahu sapwellime Ohlo, me kin kahlemengih en Semeo irair kaselel kan ni unsek. (Ipru 1:3) Ahl keieu mwahu en esehla Sises iei en onopki pwuhken Rongamwahu pahieu ko. Ma ke sohte kin wadek Paipel rahn koaros, ke kak tepida met sang ni omw wadek pwuhk ko. Ni omw wadek duwen Sises, tehk mwahu sapwellime irair kaselel kan. Aramas akan kin perenki mi reh oh koasoiong ih, oh e kin ketin poakohng kisin seri kan oh pwoaleiraildi. (Mark 10:13-16) Sises kin ketin kadek, oh sapwellime tohnpadahk kan sohte kin pweiek en padahkihong ih arail pepehm. (Mad. 16:22) Ni ahl wet, Sises kin ketin kahlemengih Semeo nanleng. Siohwa pil ketin sapwellimanki irair wet. Kitail kak kapakap ong ih. Ni atail kapakap, kitail kak padahkihong ih atail pepehm oh madamadau. Kitail kamehlele me e sohte pahn ketin kadeik kitail. E ketin poakohng oh nsenohkin kitail.​—1 Pit. 5:7.

⁶ Sises kin ketin poakehla aramas akan. Wahnpoaron Madiu koasoia: “Ni eh ketin mahsanihada pokon ehu, e ketin poakeirailla pwehki irail wiakaula oh sohte epwelparail rasehng sihpw kan me sohte sileparail.” (Mad. 9:36) Oh ia sapwellimen Siohwa pepehm? Sises mahsanih: “Semei me ketiket nanleng pil sohte ketin kupwurki emen rehn me tikitik pwukat en sohrala.” (Mad. 18:14) Kitail uhdahn perenki mahsen pwukat! Ni atail esehla mwahu Sises, atail poakohng Siohwa kin laudla.

7. Ia duwen omw werekiong Kristian koahiek kan eh kak seweseiuk?

⁷ Ke pil kak sukuhlki en kalaudehla omw limpoak oh wiahla Kristian koahiek men ni omw wiahda ahnsou oh esehla riomw Kristian kan nan omw mwomwohdiso. Tehk ia uwen arail kin peren. Irail sohte koluhkihla arail pilada en papah Siohwa. Peki irail en padahkihong uhk ekei soahng kan me re lelohng ni arail papah Siohwa. Ni omw pahn anahne wiahda pilipil kesempwal ehu, peki arail kaweid. Tamataman me “sounkaweid tohto kin kahrehda onepek mwahu.”​—Lep. Pad. 11:14.

8. Dahme ke kak wia ma ke ekis peikasalki dahme Paipel mahsanih?

⁸ Powehdi omw peikasal. Nin duwen me parakrap keriau kasalehda, Sehdan pahn song en kauhdi omw nantihong en kakehlakahla omw pwoson oh karanihala Siohwa. Ehu ahl me e kak wia met iei sang ni eh kahrehiong uhk en peikasalki ekei soahng kan me ke sukuhlkihsang nan Paipel. Karasepe, mwein ekei pahn song en kamehlelehiong uhk me Koht sohte ketin kapikkitailda, me mour pein miehla, oh aramas kohsang mahn. Ni ahnsou me ke serihte, mwein ke sohte kin medewe duwen met, ahpw mwein met, ke kin sukuhlki nan sukuhl. Mwein dahme omw sounpadahk kan kin padahngki kin mwomwen uhdahn mehlel. Ahpw ele irail sohte kin song en esehda ma mie Sounkepikipik men. Tamataman kaweido nan Lepin Padahk 18:17: “Aramas me kin tepin koasoi nan mwoalen kopwung kin mwomwen pwung lao me uhwongo pahn wiahiong eh peidek kan.” Ke dehr kamehlele soahng koaros me ke sukuhlki nan sukuhl, ahpw onopki kanahieng dahme Paipel mahsanih. Wia roporop nan neitail sawasepen Paipel kan. Koasoiong riatail Kristian kan me mahso re kin kamehlele me aramas kohsang mahn. Idek rehrail dahme kamehlelehiong irail me mie Sounkepikipik men me ketin poakohng kitail. En koasoiapene met kak sewese en kadehdehda me mie Sounkepikipik men.

9. Dahme ke sukuhlkihsang dahme wiawihong Melissa?

⁹ Sister men me adaneki Melissa onopki oaralapo duwen kepikipik, oh met sewese ih en powehdi eh peikasal.b E koasoia: “Nan sukuhl, sounpadahk kan kin kawehwehda padahk me dene aramas kohsang mahn ni ahl me kin kahrehiong aramas akan en medewe me e mehlel. Nin tapio, I sohte men wia roporop pwehki I perki me I de diarada me padahko mehlel. Ahpw I esehda me Siohwa ketin kupwurki kitail en ahneki kahrepe mwahu en papah ih. Eri I tepida roporop. I wadekala pwuhko Is There a Creator Who Cares About You? oh kisin pwuhk ko Was Life Created? oh The Origin of Life​—Five Questions Worth Asking. Ih met me I uhdahn anahne. I koluhkihla ei sohte mwadang wia met.”

10-11. Dahme kak seweseiuk en mwakelekelte? (1 Deselonika 4:3, 4)

¹⁰ Soikala tiahk sapwung. Ni omw pwulopwul, ineng en wia tiahk samin me pid wia nsenen pwopwoud kak uhdahn kehlail, oh ekei pak meteikan pahn song en kasongeiuk en wia met. Ih met me Sehdan men ken wia. Dahme kak seweseiuk en mwakelekelte? (Wadek 1 Deselonika 4:3, 4.) Nan omw kapakap kan, padahkihong Siohwa omw pepehm oh peki en ketin kakehlakaiuk. (Mad. 6:13) Tamataman me Siohwa ketin kupwurki seweseiuk a kaidehn kadeik uhk. (Mel. 103:13, 14) Paipel pil kak seweseiuk. Melissa me kitail koasoiapene mwoweo, kin nantihong pelianda eh madamadau samin kan. E koasoia: “Wadawad Paipel ehuehu rahn sewese ie en pelianda ei ineng sapwung kan. E kin katamankihong ie me Siohwa ketin sapwellimankin ie oh me I men papah ih.”​—Mel. 119:9.

¹¹ Dehr kelehpwki omw kahpwal kan. Padahkihong omw papah nohno duwen omw kahpwalo. E sohte mengei en koasoia soangen kahpwalo, ahpw e kesempwal ken wia met. Melissa koasoia: “I kapakapki eimah oh eri koasoiaiong ei pahpao duwen ei kahpwalo. Mwurin mwo, I uhdahn nsenamwahula. I ese me I kaperenda Siohwa.”

12. Ia duwen omw kak wiahda pilipil mwahu kan?

¹² Doadoahngki kaweid en Paipel kan. Ni omw lalaudla, omw pahpa nohno pahn mweidohng uhk en pein wiahda omw pilipil kan. Ahpw miehte soahng tohto me ke sehse. Ia duwen omw kak soikala wiahda sapwung me pahn kauwehla omw nanpwungmwahu rehn Siohwa? (Lep. Pad. 22:3) Sister men me adaneki Kari kawehwehda dahme sewese ih en wiahda pilipil mwahu kan. Kari wehwehki me Kristian koahiek kan sohte anahne kosonned ong irair koaros. E koasoia: “I anahne wehwehki kaweid oh ire mehlel en Paipel kan a kaidehn kosonnedte.” Ni omw wadek Paipel, pein idek rehmw: ‘Dahme ire wet padahkihong ie duwen sapwellimen Siohwa madamadau? Mie iren kaweid kan wasaht me kak sewese ie en wia dahme pwung? Ma ei, ia duwen ei pahn paiekihda ma I kapwaiada?’ (Mel. 19:7; Ais. 48:17, 18) Sang ni omw wadek Paipel oh doudouloale eh kaweid kan, e pahn mengei ong uhk en wiahda pilipil kan me kin kaperenda Siohwa. Ni omw pousehlahte kekeirda, ke pahn esehda me ke sohte anahne kosonned ong irair koaros pwehki ke pahn wehwehki sapwellimen Siohwa madamadau ong irair kan.

13. Ia duwen kompoakepah mwahu kan ar kak seweseiuk? (Lepin Padahk 13:20)

¹³ Kompoakepahnki irail kan me poakohng Siohwa. Kompoakepahmw kan me ke pilada kak seweseiuk en wiahla Kristian koahiek men. (Wadek Lepin Padahk 13:20.) Sister men me adaneki Sara sohla kin peren. Ahpw mehkot wiawi me sewese ih en pwurehng ahneki peren. Sara koasoia: “I diarada kompoakepahi kan ni ahnsou me I anahne. Ngehi oh emen sister pwulopwul kin kaunopada nait Kahn Iroir ehuehu wihk. Emen kompoakepahi sewese ie en tepida pasapeng nan mihting kan. Pwehki sawas sang kompoakepahi kan, I tepida nsenohkihla pein ei onop oh kapakap. I tepida kakairada nanpwungmwahu kehlail rehn Siohwa, oh tepida pwurehng ahneki peren.”

14. Ia duwen Julien eh wiahda kompoakepah mwahu kan?

¹⁴ Ia duwen omw kak kompoakepahnki irail kan me pahn wia mehn kahlemeng mwahu ong uhk? Julien me met wia elder men, koasoia: “Ni ahnsou me I pwulopwul, I wiahda kompoakepahi mwahu kan ni ei iang irail kalohk. Irail uhdahn ngoang, oh sewese ie en kilang uwen kaperen en kalohk. I tepida akadeiong en wiahla pioneer. I pil esehda me pwehki ei kin kompoakepahnkihte irail me uwe ie, met kahrehda sohte kompoakepahi mwahu tohto. Mwuhr, I pil wiahda kompoakepahi kan nan Pedel. Arail mehn kahlemeng sewese ie en pilada mehn kamweit mwahu kan oh kakerenihiehla rehn Siohwa.”

15. Dahme Pohl katamankihong Timoty me pid eh werek kan? (2 Timoty 2:20-22)

¹⁵ Ia duwen ma ke esehda me emen nan mwomwohdiso sohte wia werek mwahu ong uhk? Pohl ese me ekei nan mwomwohdiso sohte kin kasalehda madamadau oh wiewiahn Kristian, eri e ndaiong Timoty en dehr patehng irail. (Wadek 2 Timoty 2:20-22.) Atail kompoakepahnki Siohwa uhdahn kesempwal. Kitail kin doadoahk laud pwehn karanihala Siohwa, eri kitail en dehr kompoakepahnki irail kan me pahn kauwehla nanpwungmwahu wet.​—Mel. 26:4.

IA DUWEN WIAHDA MEHN AKADEI EH KAK SEWESEIUK EN KEKEIRDA?

16. Mehn akadei dah kan me ke anahne pilada?

¹⁶ Wiahda mehn akadei kan me pahn sawas. Wiahda mehn akadei kan me pahn kakehlaka omw pwoson oh seweseiuk en wiahla Kristian koahiek men. (Ep. 3:16) Karasepe, ele ke kak pilada en kamwahwihala omw koasoandi en onop oh wadawad en Paipel. (Mel. 1:2, 3) De ke kak kamwahwihala oh kalaudehla omw ahnsoun kapakap. Mwein ke anahne kalaudehla omw kanahieng omw pilada mehn kamweit kan de omw doadoahngki omw ahnsou. (Ep. 5:15, 16) Siohwa pahn ketin kupwurperenkihda omw kin nannanti en kekeirda.

17. Ia duwen omw sewese meteikan eh pahn seweseiuk?  

¹⁷ Ke pahn wiahla Kristian koahiek men ni omw kin sewese meteikan. Sises mahsanih: “Kihwei kin kaperen sang ale.” (Wiewia 20:35) Ke pahn uhdahn paiekihda ni omw doadoahngki omw ahnsou oh kehl pwehn sewese meteikan. Karasepe, ke kak akadeiong en sewese me mah oh me soumwahu kan nan omw mwomwohdiso. Mwein ke kak netinet ong irail de sewese irail en doadoahngki tablet ape. Ma kowe emen brother, akadeiong ken wiahla sounsawas men, pwe ken kak kalaudehla omw sewese riomw Kristian kan. (Pil. 2:4) Ke pil kak kasalehda omw limpoak ong irail kan likin mwomwohdiso sang ni omw ehukihong irail rongamwahu en Wehio. (Mad. 9:36, 37) Ma kak, akadeiong ken wiahla pioneer, papah nan Pedel, de iang sewese kauwada atail wasahn kaudok kan.

18. Ia duwen kalaudehla omw papah Siohwa eh kak seweseiuk en kekeirda?

¹⁸ Omw kalaudehla omw kin papah Siohwa kak kihong uhk ahnsou mwahu tohto en karanihala Siohwa. Ma kowe pioneer men, ke kak iang Sukuhl ong Sounkalohki Wehio kan. Ke kak iang papah nan Pedel de kauwada atail wasahn kaudok kan. Pioneer pwulopwul men me adaneki Kaitlyn koasoia: “Ei iang riei Kristian koahiek kan nan kalohk kin uhdahn sewese ie laud mwurin ei papidaisla. Arail mehn kahlemeng kamwakid ie en kalaudehla ei onopki Paipel oh kamwahwihala ei koahiek en padahk nan kalohk.”

19. Soahng mwahu dah kan me ke pahn ahneki ni omw pousehlahte kekeirda?

¹⁹ Ni omw pousehlahte kakairada omw nanpwungmwahu rehn Siohwa, e pahn ketikihong uhk soahng mwahu tohto. Ke sohte pahn doadoahngki mwahl omw kehl pwehn wia soahng kan me sohte katepe. (1 Sohn 2:17) Ke sohte pahn wiahda pilipil sapwung kan me pahn kansensuwedihiukala mwuhr. Ahpw, ke pahn nsenamwahu oh pweida mehlel. (Lep. Pad. 16:3) Omw mehn kahlemeng mwahu pahn kangoange riomw Kristian kan, me pwulopwul oh me mah. (1 Tim. 4:12) Oh me keieu kesempwal, ke pahn ahneki popohl oh nsenamwahu me kohsang omw kaperenda Siohwa oh ahneki nanpwungmwahu keren reh.​—Lep. Pad. 23:15, 16.