Dahme Pwung oh Sapwung: Dahme Kin Kaweid Aramas Tohto

Pali laud en aramas pwungki me ekei wiewia kan uhdahn pwung de uhdahn sapwung. Karasepe, aramas tohto kin sapwungki kamaramas, angkehlail oh tiahk suwedih seri, ahpw re kin kapinga pwung pahrek, kadek oh poakehla meteikan. Ahpw ia duwen pilipil kan me duwehte ihs me ke pahn wendi reh, ma ke pahn lokaia mehlel de soh de duwen omw pahn apwalihada seri kan, aramas tohto medewe me sohte pilipil pwung de sapwung duwen mepwukat. Irail medewe me soahng koaros me ke pilada kin mwahu. Aramas akan kin kalapw wiahda ar pilipil sang ar pepehm oh dahme irail kan me re kin karanih kin medewe. Ia duwe, met mwahu?

ATAIL PEPEHM

Kitail kin kalapw wiahda pilipil me poahsoankihda atail pepehm duwen dahme pwung oh sapwung, me aramas kin nda kadeikpen loalatail. (Rom 2:​14, 15) Kisin seri kan pil kin ese ma mehkot kin sapwung, re kin kak ahneki pepehm suwed ma re wiahda mehkot sapwung. Ni atail kin lalaudla, kitail kin esehla dahme pwung oh dahme sapwung sang aramas akan me kitail kin patehng, atail wasahn kousoan de atail pelien lamalam. Ni atail kin wiahda pilipil kan, kadeikpen loalatail kin padahkihong kitail ma atail pilipilo kin pwungiong dahme kitail ese duwen me pwung oh sapwung.

Atail pepehm duwen dahme pwung oh sapwung kak kamwakid kitail en kasalehda kalahngan, pwung pahrek oh poakehla meteikan. Met pil kak ireikitailsang wia soahng kan me pahn kamedekihala irail kan me kitail nsenohki de me kak kanamenekeikitailla oh kamworuseikitailla.

Ahnsou koaros atail pepehm kin wia kaweid likilik? Garrick, mwahnakapw men me pilada soangen mour ehu, koasoia: “I kak wia soahng koaros me I men wia.” Ahpw, e diarada me dahme e kin medewe me pwung sohte kin pweida mwahu. E kawehwehda me e sohte douluhl kin nsenamwahuki eh mour pwehki eh mour kin direki tiahk samin, mehn kasahliel, kamamsakau oh tiahk lemei.

EN METEIKAN PEPEHM

Pil patehng pein atail pepehm kan, kitail kin kalapw mwekidki dahme meteikan pahn medewehki atail pilipil kan. Met kak sewese kitail en paiekihda ar koahiek oh erpit. Atail peneinei, kompoakepatail kan oh tohn atail kousoan kan kin waunekin kitail ni atail kin wia dahme re medewe me pwung.

Ahnsou koaros en meteikan pepehm kin wia kaweid likilik? Priscila, peinakapw men, wia dahme pali laud en ienge kan kin wia oh e wia nsenen pwopwoud mwohn eh pwopwoudida. Ahpw e diarada me ni eh kin wia dahme meteikan kin medewe me pwung, met sohte kin kahrehiong ih en nsenamwahu. E nda: “Ni ei kin wia dahme koaros kin wia, met sohte kin kihong ie nsenamwahu. E kin kahrehiong ie I en wia soahng kan me pweipwei oh keper.”

MIE EHU AHL MWAHUSANG MET?

Ni atail kin pilada nanpwungen me pwung oh sapwung, atail pepehm oh en meteikan pepehm kin kesempwal. Ahpw, met sohte kin imwila mwahu ahnsou koaros. Ekei pak kitail kakete kamedekeikitailla de meteikan, pwehki kitail sohte kak kilang imwilahn atail pilipil kan. (Lepin Padahk 14:12) Oh pil ma kitail oh pil meteikan kin medewe mehkot ehu me pwung met kakete keper oh pil madamadau pwukat kakete wekila. Ekei wiewia kan me tohto kin medewe me sapwung mahso, met me tohto kin pwungki, a ekei wiewia kan me tohto kin medewe me mwahu mahso, met re kin medewe me e sohte konehng.

Mie kaweid me mwahusang met ong pilada dahme pwung oh dahme sapwung? Rahnwet mie kosonned en tiahk kan me kitail kak idawehn me kitail sohte pahn mworuskihla erein sounpar kan?

Kitail kalahnganki me mie kaweid ong wiewia kan me sohte kin wekila oh likilik, me kin mwahuong aramas akan nan wasa koaros. Iren mwurin met pahn koasoia ia wasa kitail kak diarada kaweid me kitail kak uhdahn likih pwehn pilada dahme pwung oh sapwung.