Peidek kan Sang Sounwadawad kan
Lepin lokaia kan “Komw pahn ketin sile irail,” me sansalda nan Melkahka 12:7 (NW), kin dokedoke “me lokolok kan” nan (iretikitik 5) de “Mahsen en Siohwa kan” (iretikitik 6)?
Nan irelaud o kasalehda me nan iretikitik wet kin dokedoke aramas.
Nan Melkahka 12:1-4 (NW), kitail wadek me “aramas lelepek kan sohrasangehr nanpwungen aramas akan.” Oh nan Melkahka 12:5-7 (NW), e koasoia.
“‘Pwehki me lokolok kan kin wiakaula,
Me semwehmwe kin sengloal,
I pahn kesihnenda pwehn doarehla me semwehmwe,
‘I pahn kapitirailla sang me kin mwamwahlikin irail,’ Siohwa me ketin mahmahsen.
Mahsen en Siohwa kan me min;
Re rasehng silper me kamwakelda nan wasahn kisiniei mwehl, me kamwakeldahr pak isuh.
Maing Siohwa, komw pahn ketin sile irail;
Komw pahn ketin pere emenemen irail sang dih wet kohkohlahte.”
Iretikitik 5 kin koasoia dahme Koht pahn ketin wiawihong me kin “lokolok kan.” E pahn ketin doareirailla.
Iretikitik 6 pil koasoia “mahsen en Siohwa kan me min,” ‘rasehng silper me kamwakelda.’ Met kasalehda ia atail pepehm ong sapwellimen Siohwa mahsen.—Mel. 18:30; 119:140.
Met medewehla iretikitik en mwurio, nan Melkahka 12:7 (NW): “Maing Siohwa, komw pahn ketin sile irail, komw pahn ketin pere emenemen irail sang dih wet kohkohlahte.” Ihs “irail” me wasaht koasokoasoia?
Pwehki iretikitik 7 koasoia duwen “mahsen en Siohwa kan,” ekei kakete medewe me “irail” kin wehwehki mahsen en Koht. Oh kitail ese me Koht kin ketin sile Paipel mendahki sounuhwong tohto kin song en keinapwihdi oh kasohrehla.—Ais. 40:8; 1 Pit. 1:25.
Ahpw pil mehlel, Siohwa kin ketin sile sapwellime aramas akan nin duwen me iretikitik 5 mahsanih. Siohwa kin ketin sewese oh doarehla “me lokolok kan” oh me kin “wiakaula” oh e pahn pousehlahte wia met.—Sohp 36:15; Mel. 6:4; 31:1, 2; 54:7; 145:20.
Ihs “irail” me iretikitik 7 koasokoasoia?
Ni omw tehk mwahu melkahka wet e sansal me “irail” kin dokedoke aramas.
Tepin Melkahka 12:1 Depit koasokoasoia sapwellimen Siohwa ladu lelepek kan me aramas suwed kan pitiehdi. Mwuri, kitail wadek me Siohwa pahn ketin uhwong irail kan me koasoia soahng suwed ko. Melkahkao kamehlelehiong kitail me kitail kak likih Koht pwehn sewese sapwellime aramas akan pwehki eh mahsen kan kin min.
Eri iretikitik 7 koasokoasoia me Siohwa kin ketin sile oh pere “irail,” me iei irail kan me kin lokolok pwehki aramas suwed kan.
Lepin lokaia “irail” sansalda nan pelien Paipel ni lokaiahn Ipru. Nan ehu kawehwehn Paipel Greek Septuagint e doadoahngki “kiht” pak riau nan iretikitik 7. Eri e kin dokedoke irail me lelepek kan me kin lokolok oh wiakaula. Iretikitik 7 koasoia “emenemen irail” me lelepek pahn poadoandoarla “sang dih wet,” me iei aramas akan me kin “ kapinga me suwed.” (Mel. 12:7, 8) Nan kawehwehn lokaiahn Aramaik, iretikitik 7 koasoia: “Maing KAUN, komw pahn ketin pere me pwung kan, komw pahn ketin sile irail sang dih suwed wet kohkohlahte. Aramas suwed kan kin mi wasa koaros, duwehte mwahs me kin ihkasang ntahn aramas.” Kawehwe wet pil kin kihda mehn kadehde me Melkahka 12:7 sohte dokedoke mahsen en Koht.
Ihme kahrehda iretikitik wet kihda koapworopwor ong “aramas lelepek” me Koht pahn ketin doareirailla.