Kitail Sohte Kin Kelekelehpw

1-2. (a) Dahme kahrehda kitail kak nda me kitail sohte kin kelehpw ni atail lelohng kahpwal kan? (b) Dahme kitail pahn koasoiapene nan iren onop wet?

NI AHNSOU me kitail kin lelohng kahpwal laud kan, ele kitail kin pehm me kitail kelekelehpw nanwel rotorot ehu oh sohte kak diar elen kohkohsang. Ahpw, kitail sohte kelekelehpw. Samatail limpoako nanleng sohte kin ketin mwahngihete atail kahpwal kan ahpw e pil inoukihda en ketin sewese kitail. Ni limpoak Siohwa ketin inoukihong kitail: ‘I pahn seweseiuk.’—Ais. 41:10.

² Iren onop wet pahn koasoia ia duwen Siohwa eh kin ketin sewese kitail (1) sang ni eh kin ketin kahluwa kitail, (2) ketikihda dahme kitail anahne, (3) pere kitail, oh (4) kansenamwahwih kitail. Siohwa ketin kamehlelehiong kitail me sohte lipilipil kahpwal dah kan me kitail lelohng, e sohte pahn ketin manokeikitailla. E sohte pahn ketin likidmelieikitailla. Eri kitail sohte kin kelekelehpw.

SIOHWA KIN KETIN KAHLUWA KITAIL

3-4. Ia duwen Siohwa eh kin ketin kahluwa kitail? (Melkahka 48:14)

³ Wadek Melkahka 48:14. Siohwa sohte ketin kasik kitail en pein kahluwa kitail. Ia duwen eh kin ketin kahluwa sapwellime tohnkaudok loalopwoat kan rahnwet? Ehu ahl me e kin ketin wia met iei sang Paipel. (Mel. 119:105) Sang ni sapwellime Mahsen, Siohwa kin ketin sewese kitail en wiahda pilipil kan oh kakairada irair kaselel kan me kin imwikihla nsenamwahu mehlel ni ahnsou wet oh koapworopwor en mour kohkohlahte.a Karasepe, e ketin padahkihong kitail en soikala lingeringer, en kin mehlel ni soahng koaros me kitail kin wia, oh poakohng meteikan sang nan mohngiongitail. (Mel. 37:8; Ipru 13:18; 1 Pit. 1:22) Ni atail kin kasalehda irair pwukat, kitail pahn wiahla pahpa nohno mwahu, ohl oh lih pwopwoud mwahu, oh kompoakepah mwahu.

⁴ Nan Paipel, Siohwa ketin padahkihong kitail duwen dahme wiawihong aramas akan me ahneki kahpwal kan oh pepehm me duwehte atail. (1 Kor. 10:13; Seims 5:17) Ni atail kin wadek duwen mouren aramas pwukat oh kapwaiada dahme kitail sukuhlki, kitail kin paiekihda ni ahl riau. Keieu, kitail kin esehda me kaidehn kitail kelehpw me kin ahneki kahpwal. Meteikan pil kin ahneki soangen kahpwal kan me duwehte met oh kak dadaur sang ni sapwellimen Siohwa sawas. (1 Pit. 5:9) Oh keriau, kitail sukuhlki dahme pahn sewese kitail en dadaur pahn atail kahpwal kan oh ahnekihte peren.—Rom 15:4.

5. Ihs me Siohwa kin ketin doadoahngki pwehn kahluwa kitail?

⁵ Siohwa pil kin ketin doadoahngki riatail kan pwehn kahluwa kitail.b Karasepe, sounapwalih en circuit kan kin kaukaule mwamwaitih mwomwohdiso kan pwehn kangoange kitail. Arail padahk kan kin kakehlaka atail pwoson oh sewese kitail en miniminpene. (Wiewia 15:40–16:5) Elder kan pil kin doadoahk laud pwehn sewese emenemen kitail en karanihte Siohwa. (1 Pit. 5:​2, 3) Pahpa nohno kan kin padahkihong neirail seri kan en poakohng Siohwa, ia duwen arail pahn wiahda pilipil mwahu oh en kin tiahk mwahu. (Lep. Pad. 22:6) Oh lih Kristian kan kin sewese sister pwulopwul kan sang ni arail kin wia mehn kahlemeng mwahu, kihda kaweid mwahu kan, oh mehn kangoang kansenamwahu kan.—Taitus 2:​3-5.

6. Dahme kitail anahne wia pwehn uhdahn paiekihda sapwellimen Siohwa kaweid?

⁶ Siohwa ketikihongkitailehr kaweid me kitail anahne pwehn wiahda pilipil mwahu kan oh ahneki mour nsenamwahu. Ia duwen atail kak kasalehda me kitail kalahnganki dahme e ketin wiahiong kitail? Lepin Padahk 3:​5, 6 mahsanih: “Likih KAUN-O ni mohngiongomw unsek. Dehr koapworopworki mehkan me ke pein lemeleme me ke ese.” Ni atail wia met, “e pahn ketin kasalehiong [kitail] ahl me pwung,” met iei, e pahn ketin sewese kitail en soikala kahpwal tohto oh ahneki mour nsenamwahu. Kitail uhdahn kalahnganki me Siohwa uhdahn kin ketin mwahngih oh poakohng kitail me kahrehda e kin ketikihda kaweid me emenemen kitail anahne!—Mel. 32:8.

SIOHWA KIN KETIKIHDA DAHME KITAIL ANAHNE

7. Ia ekei ahl me Siohwa kin ketikihda dahme kitail anahne? (Pilipai 4:19)

⁷ Wadek Pilipai 4:19. Patehng eh kin ketin kahluwa kitail, Siohwa kin ketin kapaia atail nannanti pwehn mie kanatail mwenge, atail likou, oh wasahn kousoan. (Mad. 6:33; 2 Des. 3:12) E sohte sapwung en pwunodki ia duwen atail pahn alehdi soahng pwukat. Ahpw Siohwa sohte ketin kupwurki kitail en nohn pwunodki mepwukat. (Mad. 6:25) Dahme kahrehda? Pwehki Samatailo sohte pahn ketin keseikitailla. (Mad. 6:8; Ipru 13:5) Kitail kak uhdahn likih ni eh mahsanih me e pahn ketikihda dahme kitail anahne.

8. Dahme Siohwa ketin wiahiong Depit?

⁸ Medewehla ia duwen Siohwa eh ketin sewese Depit. Erein sounpar apwal ko me Depit tangasang Nanmwarki Sohl, Siohwa ketikihda dahme ih oh nah ohl ko anahne pwehn pitila. Ni Depit eh medewehla duwen Siohwa eh ketin sewese ni ahnsowo, e koasoia: “Ni ei pwulopwul, oh met ni ei mahlahr, I saikinte kilang aramas mwahu men me KAUN-O ketin likidmeliehla, de nah seri kan pekipeki ar tungoal kisin mwenge.” (Mel. 37:25) Duwehte Depit, ele ke pil kilangehr duwen Siohwa eh ketikihda dahme kowe oh riomw Kristian kan anahne erein ahnsou apwal kan.

9. Ia duwen Siohwa eh kin ketin sewese sapwellime aramas akan erein kahpwal laud kan? (Pil kilang kilel kan.)

⁹ Siohwa pil kin ketikihda dahme sapwellime aramas akan anahne ni ahnsou me mie kahpwal laud ehu. Karasepe, ni ahnsou me mie lehk lapalap wiawi ni mwehin tepin Kristian ko, riarail kan nan ekei wasa kadarala soahng kan me re anahne. (Wiewia 11:​27-30; Rom 15:​25, 26) Sapwellimen Koht aramas akan rahnwet pil kin sewese riarail kan me anahne sawas. Ni ahnsou me kahpwal laud ehu wiawi, ni limpoak Siohwa kin ketin kamwakid sapwellime aramas akan en kihda soahng kan me anahn me duwehte mwenge, pihl, likou, oh wini ong riarail kan me mi wasa me kahpwalo wiawi. Pwihn en kou ihmw kan kin kamwahwihala ihmw ohla kan oh Wasahn Kaudok kan. Oh sapwellimen Siohwa ladu kan kin mwadang kihong irail kan me sohla imwarail de irail kan me re poakohng mehla mehn kangoang kan sang Paipel.c

10-11. Dahme ke sukuhlkihsang dahme wiawihong Borys?

¹⁰ Ni kadek, Siohwa pil kin ketikihda dahme irail kan me sohte kin kaudokiong ih anahne. Duwehte met, kitail kin rapahki ahl akan en kasalehda kadek ong irail kan me sohte kin papah ih. (Kal. 6:10) Ni atail wia met, kitail kak sewese irail en kalaudehla arail ese kitail oh Siohwa. Medewehla dahme wiawihong Borys, kaunen sukuhl men me kin mi Ukraine. Mendahki Borys kaidehn emen Sounkadehdehn Siohwa kan, ahnsou koaros e kin kadekohng oh wauneki dahme nah tohnsukuhl kan me wia Sounkadehde kin kamehlele. Ni ahnsou me Borys pilada en tangasang wasa me mahweno wiewiawi oh kohla ehu wasa me sohte keper nan sahpwo, riatail kan sewese ih. Mwuhr, Borys iang towehda Katamanpen pwoulahn Krais. Ni eh medewehla soahng koaros me brother ko wiahiong, Borys koasoia: “Sounkadehde kan uhdahn kadekohng ie oh apwalih ie mwahu. I uhdahn kalahnganki Sounkadehdehn Siohwa kan.”

¹¹ Kitail pil kak kahlemengih Samatailo me ketin kadek kalahngan sang ni atail kasalehda limpoak ong irail kan me anahne sawas, mehnda ma re kin kamehlele dahme kitail kamehlele de soh. (Luk 6:​31, 36) Kitail koapworopworki me limpoak me kitail kasalehiong irail pahn kamwakid irail en men kalaudehla arail papah Siohwa oh tepida iang kitail papah ih. (1 Pit. 2:12) Ahpw mehnda ma irail pilada en papah Siohwa de soh, kitail pahn peren pwehki “kihwei kin kaperen sang ale.”—Wiewia 20:35.

SIOHWA KIN KETIN PERE KITAIL

12. Dahme Siohwa ketin inoukihong sapwellime aramas akan? (Melkahka 91:​1, 2, 14)

¹² Wadek Melkahka 91:​1, 2, 14. Rahnwet, Siohwa ketin inoukihda en pere sapwellime aramas akan sang soahng kan me kak kauwehla arail nanpwungmwahu reh. E sohte pahn ketin mweidohng Sehdan en kauhdi sapwellime aramas akan en kaudokiong ih ni ahl me e ketin kupwurki. (Sohn 17:15) Oh erein ‘kahn kamakam kowahlapo,’ kitail kak uhdahn kamehlele me Siohwa pahn ketin kapwaiada sapwellime inou en sewese kitail en kolokolete atail pwoson en kehlail oh doareikitailla.—Kaud. 7:​9, 14.

13. Ni ahl dah kan me Siohwa kin ketin pere emenemen kitail?

¹³ Ia duwen Siohwa eh kin ketin pere emenemen kitail? Siohwa ketikihong kitail Paipel pwe kitail en kak ese dahme pwung oh sapwung. (Ipru 5:14) Ni atail kin kapwaiada dahme kitail sukuhlkihsang Paipel, kitail kin pere atail nanpwungmwahu reh oh pil wiahda pilipil mwahu kan me kin sewese kitail en ahneki peren oh roson mwahu. (Mel. 91:4) Patehng met, Siohwa kin ketikihda mwomwohdiso pwehn kihong kitail sawas me kitail anahne pwehn lelepekohngete. (Ais. 32:​1, 2) Riatail kan nan mwomwohdiso kin poakohng Siohwa oh peikihong ih. En patehng irail nan mihting kan, nan kalohk, oh erein mwemweit, kin kangoange oh sewese kitail en soikala dahme suwed.—Lep. Pad. 13:20.

14. (a) Dahme kahrehda Koht sohte kin ketin pere kitail sang kahpwal koaros? (b) Dahme Melkahka 9:10 kamehlelehiong kitail? (Pil kilang nting tikitik me mi pah.)

¹⁴ Mahso, ekei pak Siohwa kin ketin pere sapwellime aramas akan sang lokolok de kamakamala. Ahpw, e sohte kin ketin ahnsou koaros wia met. Paipel kin padahngki me “paisuwed kin lelohng aramas koaruhsie.” (Ekl. 9:11) Siohwa ketin mweidohng ekei sapwellime ladu kan en lelohng lokolok oh mehla pwehn kadehdehda me Sehdan sounlikamw men. (Sohp 2:​4-6; Mad. 23:34) Met pil duwehte nan atail ahnsou. Mendahki Siohwa sohte pahn ketikihsang atail kahpwal kan, kitail kak kamehlele me e sohte pahn ketin likidmeliehla irail kan me poakohng ih.d—Mel. 9:10.

SIOHWA KIN KETIN KANSENAMWAHWIH KITAIL

15. Ia duwen atail kin diar nsenamwahu sang ni kapakap, Mahsen en Koht, oh riatail kan? (2 Korint 1:​3, 4)

¹⁵ Wadek 2 Korint 1:​3, 4. Ekei pak, kitail kin pahtoula, pwunodada, de mworusala. Mwein met ke mi nan irair kamworus ehu me kahrehiong uhk ken pehm me ke kelekelehpw. Ia duwe, mie me wehwehki omw pepehm? Siohwa ketin mwahngih. E sohte kin ketin mwahngihete atail pepehm kan ahpw e pil ketin “kansenamwahwih kitail nan atail kahpwal koaros.” Ia duwen? Ni atail kin patohwanohng ih atail pepehm oh madamadau, e kin ketikihong kitail “popohl me inenen siksang madamadau en aramas koaros.” (Pil. 4:​6, 7) Kitail pil kin nsenamwahula ni atail kin wadek sapwellimen Siohwa mahsen nan Paipel. Nan Paipel, Siohwa kin ketin padahkihong kitail uwen eh ketin poakohng kitail, ia duwen atail en ahneki erpit, oh kihong kitail koapworopwor. Kitail pil kin diar nsenamwahu nan atail mihting kan, sukuhlki soahng kangoang kan sang nan Paipel, oh werekiong riatail Kristian kan me poakohng kitail.

16. Dahme ke sukuhlkihsang dahme wiawihong Nathan oh Priscilla?

¹⁶ Pwehn karasahda ia duwen Siohwa eh kin ketikihda mehn kangoang kansenamwahu kan sang sapwellime Mahsen, tehk dahme wiawihong Nathan oh Priscilla, me kin mi Wehin Amerika. Sounpar kei samwalahro, ira pilada en keseula wasa me mie anahn laud ong sounkalohki Wehio kan. Nathan koasoia: “Se likih me Siohwa pahn ketin kapaia kiht.” Ahpw, mwurin ara lella ni ara pwukoa kapwo, ira ahnekihda soumwahu ehu me ira sohte kasik oh kahpwal en mwohni. Kedekedeo, ira anahne pwurala ara wasao, oh ira kin ahnekihte kahpwal en mwohni. Nathan koasoia: “I medewe dahme kahrehda Koht sohte ketin sewesei kiht ni ahl me se medewe e pahn ketin wia. I pil tepida medewe ma I wiahda mehkot sapwung.” Ahpw sohte pwand, Nathan oh Priscilla tepida esehda me Koht sohte ketin likidmelieirahla ni ahnsou me ira anahne sawas. Nathan pil koasoia: “Erein ahnsou apwal ko, Paipel duwehla kompoakepah loalokong men me kin kihong kiht kangoang oh kaweid. Medemedewehte ia duwen Siohwa eh ketin sewesei kiht erein ahnsou apwal ko a kaidehn en medemedewehte at kahpwal kan, sewesei kiht en uhdahn kamehlele me Siohwa pahn ketin pousehlahte sewese kiht ni ahnsou kohkohdo.”

17. Ia duwen sister men me adaneki Helga eh alehdi kangoang? (Pil kilang kilel.)

¹⁷ Siohwa pil kin ketin kansenamwahwih kitail sang ni eh kin ketin doadoahngki riatail kan. Kitail kak kilang met sang dahme wiawihong Helga, me kin mi Hungary. Erein sounpar tohto, e lelohng kahpwal kan me kahrehiong ih pwunod oh pehm me sohte katepe. Ahpw ni eh medewehla soahng kan me wiawi, e kak kilang me Siohwa kin ketin doadoahngki rie Kristian kan nan mwomwohdiso pwehn kansenamwahwih. E ntingihedi: “Siohwa kin ketin ahnsou koaros sewese ie ni eh mahsanih me I kin uhdahn pwangada pwehki ei doadoahk en mwohni, apwalih nei seri soumwahwo, oh kahpwal teikan. Ehuehu rahn erein sounpar 30 samwalahro, e kin ketin kolokolete sapwellime inou en kansenamwahwih ie. E kin ketin kalapw kakehlaka ie sang ni meteikan ar kangoange ie. I kalapw alehdi text, kisinlikou, de kaping ni ahnsou me I kin keieu anahne.”

18. Ia duwen atail kak kansenamwahwih meteikan?

¹⁸ Kitail ahneki pwais kaselel en kahlemengih atail Kohto sang ni atail kin kansenamwahwih meteikan. Ia duwen atail kak wia met? Kitail kak rong irail ni kanengamah, koasoia soahng kansenamwahu kan, oh sewese irail ni ahl teikan. (Lep. Pad. 3:27) Kitail kin nantihong kansenamwahwih irail kan koaros me kin lelohng lokolok, iangahki irail kan me saikinte iang papah Koht. Ni ahnsou me mehn mpatail kan kin pahtoula, soumwahuda, de pwunodada, kitail kin mwemweitla, rong irail, oh ehukihong irail ire kangoang kan sang nan Paipel. Ni atail kin kahlemengih Siohwa, “Koht en kansenamwahu koaros,” kitail sohte kin sewesehte iengatail tohnkaudok kan ahpw pil irail kan me sohte kin papah Koht ren men sukuhlki duwen ih.—Mad. 5:16.

SIOHWA PAHN KETIN AHNSOU KOAROS SEWESE KITAIL

19. Dahme Siohwa kin ketin wiahiong kitail, oh ia duwen atail kak kahlemengih?

¹⁹ Siohwa kin ketin uhdahn nsenohki koaros me kin poakohng ih. E sohte kin ketin likidmelieikitailla ni atail lelohng kahpwal kan. Duwehte pahpa oh nohno men ara kin nsenohki ni limpoak neira seri, Siohwa kin ketin nsenohki sapwellime ladu lelepek kan. E kin ketin kahluwa kitail, ketikihda dahme kitail anahne, pere, oh kansenamwahwih kitail. Kitail kin kahlemengih Samatail limpoako nanleng ni atail kin utung oh kangoange meteikan erein arail kahpwal kan. Mendahki kahpwal kan oh soahng kamedek kan kakete pwarada, kitail kak kamehlele me Siohwa kin ketin ieiang kitail. E ketin inoukihong kitail: ‘Ke dehr masak, pwe I kin ieiang uhk.’ (Ais. 41:10) Inou wet kamehlelehiong kitail me ong Siohwa, kitail sohte kin kelekelehpw!