IREN ONOP 21
KOUL 21 Mwohneki Mahs Wehio
Rapahki Kahnimwo me Pahn Mihmihte
“Kitail kin nantihong raparapahki kahnimwo me pahn kohdo.”—IPRU 13:14.
DAHME KITAIL PAHN SUKUHLKI
Dahme kitail kak sukuhlkihsang Ipru irelaud 13 me pahn sewese kitail rahnwet oh pil ahnsou kohkohdo.
1. Dahme Sises ketin kohpada pahn wiawihong Serusalem ni mwehin tepin Kristian ko?
RAHN kei mwohn Sises Krais pwoula, e ketin padahkihong sapwellime tohnpadahk ko kokohp ehu. Kokohpo tepin pweida ni ahnsou me Serusalem oh tehnpas sarawio kamwomwmwomwla. E ketin padahkihong irail me ehu rahn karis en sounpei kan pahn kapilpene Serusalem. (Luk 21:20) Sises mahsanihong sapwellime tohnpadahk ko me ni ahnsou me re pahn kilang karis en sounpeio, me iei sounpei en Rom kan, irail anahne mwadang tangasang wasao.—Luk 21:21, 22.
2. Mehn kataman dahieu me wahnpoaron Pohl kihong Kristian en Ipru ko nan Sudia oh Serusalem?
2 Sounpar keite mwohn sounpei en Rom ko kapilpene Serusalem, wahnpoaron Pohl ntingihada kisinlikou ehu me met adaneki pwuhken Ipru. Nan kisinlikowo, Pohl kihong Kristian kan nan Sudia oh Serusalem kaweid kesempwal kan me pahn sewese irail en kaunopada ong kahpwal kan me pahn wiawi. Dahme pahn wiawi? Serusalem pahn mwomwla. Ma Kristian ko men pitila, irail anahne kaunopada en tangasang imwarail kan oh arail pesines kan. Me pid kahnimw en Serusalem, Pohl ntingihedi: “Sohte atail kahnimw ehu me poatopoat wasaht.” Ih eri pil nda: “Ahpw kitail kin nantihong raparapahki kahnimwo me pahn kohdo.”—Ipru 13:14.
3. Kahnimw dahieu “me poahsoankihda poahsoan mehlel,” oh dahme kahrehda kitail en likihete?
3 Ni Kristian ko ar pilada en kohkohsang Serusalem oh Sudia, aramas tohto ele kouruhrkin irail oh nda me re pweipwei, ahpw pilipil me re wiadaho doareirailla. Rahnwet, aramas akan ele kin nda me kitail pweipwei pwehki kitail sohte kin likih mwohni oh sohte koapworopworki me aramas pahn kamwahwihala kahpwal kan nin sampah. Eri, dahme kahrehda kitail wiahda pilipilo? Kitail ese me koasoandi en sampah wet sohte pahn mihmi werei. Kitail kin likihete “kahnimw ehu me poahsoankihda poahsoan mehlel,” me iei Wehin Koht, “me pahn kohdo.”a (Ipru 11:10; Mad. 6:33) Ehuehu sawaspen oaralap nan iren onop wet pahn koasoia: (1) ia duwen ahn Pohl kaweido eh sewese tepin Kristian ko en likihete “kahnimwo me pahn kohdo,” (2) ia duwen Pohl eh kaunopirailda en tangasang Serusalem, oh (3) ia duwen eh kaweido eh kin sewese kitail rahnwet.
LIKIH SIOHWA ME SOHTE PAHN KETIN KESEIUKALA
4. Dahme kahrehda Serusalem kin kesempwal ong Kristian ko?
4 Serusalem kin kesempwal ong Kristian ko. Tepin mwomwohdisohn Kristian wiawihda wasao nan pahr 33, oh pwihn me kin apwalih mwomwohdiso ko pil kin mi mwo. Patehng met, Kristian tohto imwaneki ihmw oh ahneki soahng tohto nan kahnimwo. Ahpw Sises ketin padahkihong sapwellime tohnpadahk ko me irail anahne tangasang Serusalem oh pil Sudia.—Mad. 24:16.
5. Ia duwen Pohl eh kaunopada Kristian ko ong dahme pahn wiawi?
5 Pwehn kaunopada Kristian ko ong dahme pahn wiawi, Pohl sewese irail en medemedewehte sapwellimen Siohwa pepehm ong kahnimwo. Pohl katamankihong irail me Siohwa solahr ketin pwungki samworo ko nan tehnpas sarawio de pil meirong kan me kin wiawi wasao. (Ipru 8:13) Pali laud en tohnkahnimwo soikala Mesaia. Tehnpas sarawi en Serusalem solahr wia wasahn kaudok min ong Siohwa, oh e pahn kamwomwmwomwla.—Luk 13:34, 35.
6. Dahme kahrehda ahn Pohl kaweido nan Ipru 13:5, 6 uhdahn konehng Kristian ko?
6 Ni Pohl eh ntinglahng mehn Ipru ko, aramas tohto kin perenki kousoan de mwemweitla Serusalem. Sounnting en Rom men ni ahnsowo kahdaneki Serusalem kahnimw me keieu ndand en nan wasa ko. Mehn Suhs sang sahpw tohto kin seiloakla wasao nan sounpar koaros pwehn iang kamadipw en kasarawih kan. Irail kin doadoahngkihla mwohni laud nan kahnimwo. Pwehki met, ekei Kristian ko ele wiahda mwohni tohto. Mwein ihme kahrehda Pohl ndaiong irail: “Amwail mour en saledeksang limpoak en mwohni, ni amwail kin itarki dahme kumwail ahneki.” Ih eri doadoahngki iren Paipel ehu me kasalehda sapwellimen Siohwa inou ong emenemen sapwellime ladu kan: “I sohte pahn mweisang uhk oh I sohte pahn keseiukala.” (Wadek Ipru 13:5, 6; Deud. 31:6; Mel. 118:6) Mwuhr, Kristian ko anahne taman inou wet. Dahme kahrehda? Pwehki mwurinte arail alehdi kisinlikou wet, irail anahne kohkohsang imwarail kan, arail pesines kan, oh pali laud en arail kepwe kan. Irail pahn mihla ehu wasa tohrohr oh e pahn apwal.
7. Dahme kahrehda kitail anahne kakehlakahla atail likih Siohwa ahnsou wet?
7 Mehn kasukuhl ong kitail: Dahme pahn kereniong wiawi? ‘Kamakam kowahlapo’ pahn tepida oh koasoandi suwed en sampah wet pahn kasohrala. (Mad. 24:21) Duwehte tepin Kristian ko, kitail anahne lelepekte ahnsou wet oh kaunopada ong ahnsowo. (Luk 21:34-36) Erein kahn kamakam kowahlapo, ele e pahn sohla imwatail de atail kepwe. Ni ahnsowo, kitail anahne uhdahn likih me Siohwa sohte pahn ketin keseikitailla. Pil ahnsou wet, mwohn kahn kamakam kowahlapo tepida, kitail en kasalehda uwen laud en atail likih Siohwa. Pein idek rehmw, ‘Ei wiewia oh mehn akadei kan kasalehda me I kin likih, kaidehn kepwe kan, ahpw Koht me ketin inoukihda en apwalih ie?’ (1 Tim. 6:17) Mehn kahlemeng en tepin Kristian ko kak sewese kitail en lelepekte erein ‘kahn kamakam kowahlapo.’ Ahpw ‘kahn kamakam kowahlapo’ pahn uhdahn apwal sang dahme Kristian kan kin lelohng. Eri, ia duwen atail pahn uhdahn ese dahme kitail pahn wia ni ahnsou me e tepida?
PEIKIONG IRAIL KAN ME KIN TIENGLA MWOWE
8. Kaweid dah me Sises ketikihong sapwellime tohnpadahk kan?
8 Sounpar kei mwurin Kristian en Ipru ko alehdi nein Pohl kisinlikowo, irail kilang sounpei en Rom kan kapilpene kahnimw en Serusalem. Ni arail kilang met, irail ese me ih ahnsoun tangasang Serusalem oh Sudia. Serusalem pahn kereniong mwomwla. (Mad. 24:3; Luk 21:20, 24) Ahpw ia wasa me irail en tangala ie? Sises mahsanih: “Irail me mi nan Sudia en tepida tangalahng nin nahna kan.” (Luk 21:21) Mie nahna tohto wasa ko. Eri mehnia me irail en tangalahng ie?
9. Dahme kahrehda Kristian ko kakete pwonopwonki mehnia nahna me ren tangalahng ie? (Pil kilang map.)
9 Medewehla ekei nahna kan me Kristian ko kak tangala ie: nahna kan en Sameria, nahna kan nan Kalili, Nahna Ermon oh nahna kan en Lepanon, oh nahna kan apali Sordan. (Kilang map.) Ekei kahnimw kan nan nahna pwukat mwomwen sohte keper en tangala ie oh kousoan wasao. Karasepe, kahnimw en Gamla mi pohn nahna ileile ehu oh uhdahn apwal en lella wasao. Ekei mehn Suhs ko kamehlele me e sohte keper en kousoan Gamla. Ahpw mehn Rom ko mahweniong oh kamwomwala kahnimwo oh kemehla me tohto me kousoan wasao.b
Mie nahna tohto me tepin Kristian ko tangala ie, ahpw mie ekei me keper ong irail (Menlau kilang parakrap 9)
10-11. (a) Ia duwen Siohwa eh ketikihda kaweid? (Ipru 13:7, 17) (b) Ia duwen Kristian ko ar paiekihda arail peikiong irail kan me kin tiengla mwohrail? (Pil kilang kilel.)
10 E mwomwen me Siohwa ketin doadoahngki irail kan me kin tiengla mwowe nan mwomwohdiso pwehn kaweid Kristian ko. Soupoad Eusebius mwuhr ntingihedi duwen ahnsowo. E koasoia me Koht ketin padahkihong ekei brother ko nan Serusalem me Kristian kan anahne kohkohsang Serusalem oh kohla Pella, kahnimw ehu nan Peria. Kahnimw en Pella wia wasa mwahu ehu ong Kristian ko en tangala ie. E sohte dohsang Serusalem, kahrehda e mengei en lella wasao. Pil ehu, pali laud en aramas akan nan Pella kaidehn mehn Suhs kei, eri irail sohte kin nannanti en mahweniong mehn Rom kan.—Kilang map.
11 Kristian kan me tangala ni nahna ko kapwaiada ahn Pohl kaweido ‘en peikiong irail kan me kin tiengla mwohrail’ nan mwomwohdiso. (Wadek Ipru 13:7, 17.) Irail peik oh eri pitila. Poadopoad kasalehda me Koht sohte ketin kesehla irail kan me kin “awiawih kahnimw ehu me poahsoankihda poahsoan mehlel,” me iei Wehin Koht.—Ipru 11:10.
Pella wia wasa sohte keper ehu ong Kristian ko en tangala oh kousoanla ie (Menlau kilang parakrap 10-11)
12-13. Ia duwen Siohwa eh ketin kaweid sapwellime aramas akan erein ahnsou apwal kan?
12 Mehn kasukuhl ong kitail: Siohwa kin ketin doadoahngki irail kan me kin tiengla mwowe pwehn kaweid sapwellime aramas akan. Mie karasaras tohto nan Paipel me kasalehda ia duwen Siohwa eh ketin doadoahngki ohl lelepek kan pwehn kaweid sapwellime aramas akan erein apwal laud kan. (Deud. 31:23; Mel. 77:20) Rahnwet kitail pil kilang ni sansal me Siohwa kin ketin doadoahngki irail kan me kin tiengla mwowe pwehn kaweid sapwellime aramas akan.
13 Karasepe, ahnsou me soumwahu lusuluso COVID-19 tepida, ‘irail kan me kin tiengla mwowe’ kihong mwomwohdiso kan kaweid. Brother pwukat kihong elder kan kaweid ong ia duwen mwomwohdiso kan ar pahn tuhpene oh pousehlahte kaudokiong Siohwa. Sounpwong keite mwurin soumwahu lusuluso eh tepida, mie atail kapokon laud ehu me wiawi ni lokaia daulih 500 nan Internet, TV, oh redio. Soangen kapokon wet sohte kin wiawi mahso. Erein soumwahu lusuluso, kitail kin pousehlahte alehdi kaweid kan me kitail anahne sang Siohwa. Pwehki met, kitail kin miniminpenehte. Kitail kak kamehlele me sohte lipilipil soangen kahpwal dah me kitail pahn lelohng ahnsou kohkohdo, Siohwa pahn ketin pousehlahte sewese irail kan me kin tiengla mwowe pwe ren wiahda pilipil mwahu kan. Likin atail kin likih Siohwa oh peikiong sapwellime kehkehlik kan, irair kaselel dah teikan me pahn sewese kitail en kaunopadahng kahn kamakam kowahlapo oh mwekid ni elen loalokong ni ahnsou apwalo?
KASALEHDA LIMPOAK EN PIRIEN OH KADEK
14. Nin duwen me Ipru 13:1-3 mahsanih, irair kaselel dah kan me Kristian ko anahne kasalehda mwohn Serusalem eh mwomwla?
14 Ni ahnsou me kahn kamakam kowahlap pahn tepida, kitail anahne kalaudehla atail poakohng emenemen. Ni ahnsowo, kitail anahne idawehn mehn kahlemeng en Kristian ko nan Serusalem oh Sudia. Irail kin ahnsou koaros kasalehda arail poakohng emenemen. (Ipru 10:32-34) Ahpw nan sounpar kan mwohn Serusalem eh mwomwla, Kristian ko anahne kalaudehla arail “limpoak en pirien” oh “kasamwo meteikan ni kadek.”c (Wadek Ipru 13:1-3.) Kitail pil pahn anahne kasalehda laudsang mahs atail poakohng riatail Kristian kan mwohn koasoandi suwed wet eh pahn imwisekla.
15. Dahme kahrehda Kristian mehn Ipru ko anahne kasalehda limpoak en pirien oh kadek mwurin arail tangasang Serusalem?
15 Ni sounpei en Rom ko ar kapilpene Serusalem ahpw pil mwadang pwurasang, Kristian ko tepida tang oh wahda ekeite arail kepwe. (Mad. 24:17, 18) Irail anahne sawaspene ni arail kohkohlahng nahna ko oh pil ni arail tepida kousoandi Pella oh pil doadoahk. Ele “mie anahn karuwaru” tohto me irail ahneki, ahpw met kihong irail ahnsou mwahu en uhdahn kasalehda limpoak en pirien oh kasamwo meteikan ni kadek ni arail sawaspene oh ehukihpene dahme irail ahneki.—Taitus 3:14.
16. Ia duwen atail kak kasalehda limpoak ong riatail Kristian kan me anahne atail sawas? (Pil kilang kilel.)
16 Mehn kasukuhl ong kitail: Limpoak kin kamwakid kitail en sewese riatail Kristian kan ni ahnsou me re anahne. Karasepe, me tohto kin perenki sewese riarail kan me anahne tangasang sapwarail pwehki mahwen de kahpwal laud en melimel de rerrer en sahpw ape. Irail kin kihong dahme irail anahne, oh pil sewese oh kangoange irail en pousehlahte papah Siohwa. Emen sister sang Ukraine me tangasang eh wasao pwehki mahwen koasoia: “Se kilangehr duwen Siohwa eh ketin doadoahngki riat Kristian kan en kaweid oh apwalih kiht. Re uhdahn kadek ong kiht oh apwalih kiht mwahu nan Ukraine, Hungary, oh met nan Sehmen.” Kitail kin iang Siohwa doadoahk ni atail kin kadekohng riatail kan oh apwalihala arail anahn akan.—Lep. Pad. 19:17; 2 Kor. 1:3, 4.
Kristian kan rahnwet me tangasang sapwarail anahne atail sawas (Menlau kilang parakrap 16)
17. Dahme kahrehda e uhdahn anahn en kakairada limpoak en pirien oh kadek ahnsou wet?
17 Erein kahn kamakam kowahlapo, kitail pahn anahne sawaspene laudsang ahnsou wet. (Apak. 3:16-18) Siohwa kin ketin kaiakaiahne kitail ahnsou wet pwe kitail en kakairada limpoak en pirien oh kadek, irair kei me uhdahn anahn ahnsowo.
DAHME PAHN WIAWI NI AHNSOU KOHKOHDO
18. Ia duwen atail kak alasang Kristian ko me tangasang Serusalem?
18 Nin duwen me poadopoad kasalehda, Kristian ko me tangalahng nahna ko pitsang kamwomwlahn Serusalem. Irail tangasang kahnimwo, ahpw Siohwa sohte ketin keseirailla. Ia duwen atail ahnsou? Kitail sohte ese duwen soahng koaros me pahn wiawi ni ahnsou kohkohdo. Ahpw Sises ketin padahkihong kitail en kin onohnop pwehn peik. (Luk 12:40) Kitail pil kak doudouloale kaweid me Pohl ntingkilahng mehn Ipru ko oh kapwaiada. Oh pein Siohwa ketin inoukihong emenemen kitail me e sohte pahn ketin mweisang de keseikitailla. (Ipru 13:5, 6) Kitail en likihete Wehin Koht—kahnimwo me pahn mihmihte—kitail eri pahn paiekihda kapai kaselel kan kohkohlahte.—Mad. 25:34.
KOUL 157 Popohl Pweidahr!
a Nan Paipel, kahnimw kan kin kalapw mi pahn manaman en nanmwarki men. Soangen kahnimwo pil kak wia wehi ehu.—Sen. 14:2.
b Met wiawi nan pahr 67, sohte pwand mwurin Kristian kan tangasang Sudia oh Serusalem.
c Lepin lokaia me kawehwehdi ong “limpoak en pirien” kak pidada limpoak nanpwungen peneinei keren. Ahpw Pohl doadoahngki lepin lokaiao pwehn kawehwehda limpoak laud me kitail kin ahneki ong riatail kan nan mwomwohdiso.