Sewese Noumw Tohnsukuhl en Paipelo en Pilada Papah Siohwa

1-2. (a) Dahme kahrehda ekei tohnsukuhl en Paipel kan kin pweiek en pilada papah Siohwa? (b) Dahme kitail pahn koasoiapene nan iren onop wet?

MIE soahng kan me ke kin pwunodki me kahrehda ke pweiek en wiahla emen Sounkadehdehn Siohwa? Mwein ke pwunodki me iengomw tohndoadoahk, kompoakepahmw, de omw peneinei pahn lingeringer pahmw ma ke wiahla emen Sounkadehde. De mwein ke pwunodki me ke sohte pahn kak mour pahrekiong sapwellimen Siohwa koasoandi kan. Ma ei, eri ke kak wehwehki ahn noumw tohnsukuhl kan pepehm oh dahme kahrehda e kak apwal ong irail en pilada ren wiahla emen Sounkadehdehn Siohwa.

² Sises mwahngih me soahng pwukat kak kauhdi emen dehr papah Siohwa. (Mad. 13:​20-22) Ahpw e sohte ketin uhdihsang sewese irail kan me pweiek en idawehn ih. Pwehn wia met, e ketin sewese sapwellime tohnpadahk ko en ese dahme kahrehda e apwal ong irail en pilada en papah Siohwa, oh sewese irail en kalaudehla ar limpoak ong Siohwa. E pil ketin sewese irail en mwohneki mahs Siohwa nan arail mour, oh padahkihong irail dahme re kak wia ni meteikan ar uhwong irail. Ia duwen atail kak doadoahngki dahme Sises ketin padahkihong sapwellime tohnpadahk ko ni atail doadoahngki pwuhko Pereperenki Mour Kohkohlahte! pwehn sewese tohnsukuhl en Paipel men en pilada papah Siohwa?

SEWESE EN ESE DAHME KIN APWAL ONG IH

3. Dahme kakete kauhdi Nikodihmus en wiahla emen sapwellimen Sises tohnpadahk?

³ Nikodihmus iei emen kaun lapalap en Suhs, oh e lelohng kahpwal en wiahla emen tohnpadahk en Sises. Sounpwongte weneu mwurin Sises eh tepida sapwellime doadoahk en kalohk, Nikodihmus esehier me Sises iei Mesaiao. (Sohn 3:​1, 2) Ahpw Nikodihmus pilada en tuhwong Sises ni soh sansal pwehki eh “masak mehn Suhs ako.” (Sohn 7:13; 12:42) Mwein e masak me e pahn sohla eh manaman ma e wiahla emen sapwellimen Sises tohnpadahk.a

4. Ia duwen Sises eh sewese Nikodihmus en ese dahme Koht ketin kasik sang reh?

⁴ Nikodihmus ese Kosonned en Moseso, ahpw e anahne sawas pwehn wehwehki dahme Siohwa ketin kasik sang reh. Ia duwen Sises eh sewese? Sises pil kupwurki koasoiong Nikodihmus nipwong. Oh ni sansal, Sises ketin padahkihong Nikodihmus dahme e anahne wia pwehn wiahla emen tohnpadahk: koluhkihla dipe kan, papidaisla, oh pwoson sapwellimen Koht Ohlo.—Sohn 3:​5, 14-21.

5. Ia duwen atail kak sewese tohnsukuhl en Paipel men en ese dahme kin kauhdihsang en papah Siohwa?

⁵ Mehnda ma tohnsukuhl en Paipel men ese mwahu duwen Paipel, ele kitail anahne sewese en ese dahme kin kahrehiong en pweiek en papah Siohwa. Karasepe, e kakete eh doadoahk en mwohni kin kihsang eh ahnsou, de mwein eh peneinei sohte men en wiahla emen Sounkadehdehn Siohwa. Duwehte Sises, wiahda ahnsou pwehn sewese noumw tohnsukuhlo. Ele ke kak luke en iang uhk kohla mwemweit wasa kis de kohla alu. Nan soangen ahnsou pwukat, ke kak sewese en koasoiaiong uhk duwen eh mour oh ke pahn kak ese eh kahpwal kan. Kangoange noumw tohnsukuhlo en wiahda wekidekla kan me anahn, kaidehn pwehn kaperenda iuk, ahpw pwehn kasalehda eh poakohng Siohwa.

6. Ia duwen omw kak sewese noumw tohnsukuhl men en ese me e kak kapwaiada dahme e kin sukuhlki? (1 Korint 16:13)

⁶ Ni tohnsukuhl en Paipel men eh kamehlele me Siohwa pahn ketin sewese en wia dahme pwung, e pahn alehdi kehl me anahn pwehn kapwaiada dahme e kin sukuhlki. (Wadek 1 Korint 16:13.) Omw pwukoa kak duwehte sounpadahk men nan sukuhl. Soangen sounpadahk dah me ke kin perenki ni ahnsou me ke iang sukuhl? Mwein sounpadahko me seweseiuk ni kanengamah ken ese me ke kak wia dahme ke anahne wia. Ni ahlohte, sounpadahk en Paipel men sohte kin padahngkihte dahme Koht kupwurki kitail en wia, ahpw e pil kamehlelehiong nah tohnsukuhlo me e kak wiahda wekidekla kan pwehki Siohwa pahn ketin sewese ih. Ia duwen omw kak wia met?

SEWESE KALAUDEHLA EH LIMPOAK ONG SIOHWA

7. Ia duwen Sises eh ketin sewese aramas akan en kalaudehla ar poakohng Siohwa?

⁷ Sises mwahngih me poakohng Koht pahn kamwakid sapwellime tohnpadahk kan en kapwaiada dahme re kin sukuhlki. E kalapw ketin padahngki soahng kan me pahn sewese sapwellime tohnpadahk kan en kalaudehla arail poakohng Samarailo nanleng. Karasepe, e kasalehda me Siohwa ketin duwehte ohl emen me kin kihong nah seri kan soahng mwahu kan. (Mad. 7:​9-11) Ekei aramas sohte ahneki sahm limpoak me duwehte Siohwa. Medewehla ia arail pepehm ni ahnsou me Sises ketikihda karasaras en pahpa limpoako me kasamwo nah pwutako me salongala. Irail kak kilang me Siohwa ketin poakohng oh kupwurki sewese irail.—Luk 15:​20-24.

8. Ia duwen omw kak sewese tohnsukuhl en Paipel men en kalaudehla eh limpoak Siohwa?

⁸ Ke pil kak sewese tohnsukuhl en Paipel men en kalaudehla eh poakohng Siohwa sang ni omw kalapw padahngki sapwellime irair kaselel kan. Erein ehuehu amwa onop, sewese noumw tohnsukuhlo en wehwehki ia duwen dahme e kin sukuhlki eh kasalehda me Siohwa ketin poakohng kitail. Ni amwa koasoiapene duwen pweinen pweipwei sapahlo, kasalehda ia duwen met eh dokedoke ih. (Rom 5:8; 1 Sohn 4:10) Ni tohnsukuhl men eh wehwehkihda ia uwen laud en Siohwa eh ketin poakohng ih, met kak sewese en kalaudehla eh poakohng Siohwa.—Kal. 2:20.

9. Dahme sewese ohl emen me adaneki Michael en wiahda wekidekla nan eh mour?

⁹ Medewehla Michael sang Indonesia. E tikida nan padahk mehlel ahpw e sohte papidaisla. Ni eh sounpar 18, e keseula nan ehu sahpw oh kin doadoahk nin duwen emen soundiraip sidohsa laud. Mwuhr e pwopwoudla ahpw e pousehlahte doadoahk nan ehu sahpw me dohsang eh peneineio. Erein ahnsowo, eh pwoudo oh nah serepeino tepida onop Paipel oh kekeirda. Mwurin eh nohnou mehla, Michael pilada en pwurala imwarailo pwehn apwalih eh pahpao oh pwungki en onop Paipel. Michael uhdahn mwekidki ni eh medemedewe wasa me koasoia “Kalaudehla Omw Ese Met ” nan iren mehn kasukuhl 27 en pwuhko Pereperenki Mour Kohkohlahte! Ni eh medemedewe ia uwen Siohwa eh ketin kupwurtoutoukihla sapwellime Ohlo eh lokolok, Michael tepida sengiseng. Oh ni eh wehwehkihda ia uwen Siohwa oh Sises ara ketin poakohng ih, e wiahda wekidekla kan nan eh mour oh papidaisla.

SEWESE EN MWOHNEKI MAHS SIOHWA

10. Ia duwen Sises eh ketin sewese sapwellime tohnpadahk ko en mwohneki mahs Siohwa? (Luk 5:​5-11) (Pil kilang kilel.)

¹⁰ Tepin tohnpadahk ko mwadang pohnese me Sises iei Mesaiao me inouda, ahpw re anahnehte sawas pwehn wehwehki me pwehn papah Siohwa re anahne ngoangki kalohki rongamwahwo. Piter oh Andru wiahier tohnpadahk erein ahnsou kis ni ahnsou me Sises ketin luke ira en idawehnla ih. (Mad. 4:​18, 19) Ira koaros oh pil Seims oh Sohn koaros wia soused kei, oh arail pesineso kin pweida. (Mark 1:​16-20) Ni Piter oh Andru “pwilikihdi ara uhk ko,” ele ira wiahda koasoandi en apwalih ara peneinei ko ni ara idawehnla Sises. Dahme kahrehda ira men pwilikihdi ara pesineso? Pwuhken Luk padahkihong kitail me Sises ketin wiahda manaman ehu me kakehlaka ara likih me Siohwa kak ketikihda dahme ira anahne sohte lipilipil dahme wiawi.—Wadek Luk 5:​5-11.

11. Ia duwen atail kak doadoahngki dahme wiawihong kitail pwehn kakehlaka ahn neitail tohnsukuhlo pwoson?

¹¹ Kitail sohte kak wiahda manaman kan duwehte Sises, ahpw kitail kak ehukihong meteikan ia duwen Siohwa eh kin ketin sewese irail kan me kin mwohneki mahs ih nan arail mour. Karasepe, ke tamataman ia duwen Siohwa eh ketin seweseiuk ni omw tepida iang towehda mihting kan? Mwein ke anahne tuhwong omw kaunen doadoahko oh kawehwehiong dahme kahrehda ke solahr kak doadoahk daulih awahn doadoahk ma met kin kauwehla omw kin iang towehda mihting. Ni omw kawehwehiong noumw tohnsukuhlo dahme wiawihong uhk, kawehwehda ia duwen omw pwoson eh kehlailla ni Siohwa eh ketin seweseiuk ni omw pilada en mwohneki mahs ih nan omw mour.

12. (a) Dahme kahrehda kitail anahne luke soangsoangen sounkalohk kan en iang onop Paipel ehu? (b) Dahme ke pil kak doadoahngki pwehn sewese noumw tohnsukuhlo en mwohneki mahs Siohwa? Menlau kihda ehu karasaras.

¹² Noumw tohnsukuhlo pahn pil paiekihda eh rong ia duwen Kristian teikan arail wekidala ar mour pwehn mwohneki mahs Siohwa. Eri luke soangsoangen sounkalohk kan ren iang uhk onop Paipel rehn noumw tohnsukuhlo. Peki ren kawehwehda ia duwen ar esehla padahk mehlel oh dahme re wia pwehn mwohneki mahs Siohwa nan ar mour. Patehng met, wiahda ahnsou ong noumw tohnsukuhlo pwehn kilang kisin kasdo kan nan pwuhko Pereperenki Mour Kohkohlahte! wasa kan me koasoia “Kalaudehla Ahmw Wehwehki” de “Pil Tehk.” Karasepe, ni amwa koasoiapene iren mehn kasukuhl 37 oh kilang kisin kasdou Jehovah Will Care for Our Needs, koasoiapene oh sewese noumw tohnsukuhlo en ese dahme kak sewese en mwohneki mahs Siohwa.

SEWESE POWEHDI EH KAHPWAL KAN

13. Ia duwen Sises eh ketin kaunopada sapwellime tohnpadahk ko ong uhwong?

¹³ Sises ketin pwurupwurehng padahkihong sapwellime tohnpadahk ko me irail pahn lelohng uhwong sang meteikan oh pil sang arail peneinei. (Mad. 5:11; 10:​22, 36) Sohte pwand mwohn Sises pwoula, e ketin padahkihong sapwellime tohnpadahk ko me irail kakete kamakamala pwehki re kin kaudokiong Siohwa. (Mad. 24:9; Sohn 15:20; 16:2) E ketin kangoange irail en kanahieng nan arail doadoahk en kalohk. Karasepe, e ketin padahkihong irail en dehr akamaiong irail me kin uhwong oh kanahieng dahme re kin koasoia oh wia pwe ren kak pousehlahte kalohk.

14. Ia duwen atail kak sewese tohnsukuhl men en kaunopada ong uhwong? (2 Timoty 3:12)

¹⁴ Duwehte Sises, kitail kak kawehwehiong neitail tohnsukuhlo dahme ekei ienge tohndoadoahk, kompoakepah, oh eh peneinei kakete nda oh wia pwehki e kin onop Paipel. (Wadek 2 Timoty 3:12.) Ekei ienge tohndoadoahk kan kakete kapailoke pwehki eh kin song en mour pahrekiong kaweid en Paipel kan. Meteikan iangahki kiseh kan kakete sapwungki dahme e kin sukuhlkihsang Paipel. Atail mwadang kaunopada neitail tohnsukuhl kan ong uhwong kan pahn kak sewese irail en ese dahme re pahn nda oh wia ni meteikan ar uhwong irail.

15. Dahme kak sewese tohnsukuhl en Paipel men en dadaur pahn uhwong sang eh peneinei?

¹⁵ Ma noumw tohnsukuhlo kin lelohng uhwong sang eh peneinei, sewese en ese dahme kahrehda ekei kiseh kan kin lingeringer. Mwein kiseh kan kin medewe me Sounkadehdehn Siohwa kan aramas suwed kei de re kin padahngki soahng likamw kan. Sises pil ketin lelohng uhwong sang eh peneinei. (Mark 3:21; Sohn 7:5) Padahkihong noumw tohnsukuhlo en kin kanengamah oh kin koasoi kadek ong eh peneinei oh meteikan.

16. Ia duwen atail kak sewese tohnsukuhl en Paipel men en kawehwehda dahme e kin kamehlele ni ahl kadek?

¹⁶ Pil ni ahnsou me kiseh kan men ese dahme tohnsukuhlo sukusukuhlki, e mwahu me tohnsukuhlo sohte kin song en kawehwehda soahng tohto ni ahnsou ehute. Ma e wia met, kiseh kan kakete nsensuwedla oh sohla men pwurehng koasoia dahme e kin kamehlele. Eri kangoange noumw tohnsukuhlo en koasoiahda dahme e kin kamehlele ni ahl me pahn kahrehiong kiseh kan en men rong duwen Paipel ni ehu ahnsou. (Kol. 4:6) Mwein e kak kangoange kiseh kan en tehk jw.org. Met pahn kahrehiong irail en men kalaudehla ar esehla duwen Sounkadehdehn kan ni ahnsou me re men.

17. Ia duwen omw kak kaiahnehda tohnsukuhl men en kak sapengala peidek kan me pid Sounkadehdehn Siohwa kan? (Pil kilang kilel.)

¹⁷ Ke kak doadoahngki wasa me koasoia “Frequently Asked Questions” nan jw.org pwehn sewese noumw tohnsukuhlo en kaunopada pasapeng mengei ong peidek kan me kiseh oh ienge tohndoadoahk kan kakete idek. (2 Tim. 2:​24, 25) Ni kaimwiseklahn ehuehu iren mehn kasukuhl, kousapahlih wasa me nda “Ekei Aramas Kin Nda” nan pwuhko Pereperenki Mour Kohkohlahte! Kangoange noumw tohnsukuhlo en praktiski ia duwen eh pahn kawehwehiong aramas dahme e kin kamehlele. Ma anahn, sewese en diar ahl me mwahu en kawehwehda dahme e kin kamehlele. Ni amwa praktiski soahng pwukat, e pahn koahiek en kawehwehda dahme e kamehlele ni eimah.

18. Ia duwen omw kak kangoange tohnsukuhl men en wiahla sounkalohk me saikinte papidais? (Madiu 10:27)

¹⁸ Sises ketin kangoange sapwellime tohnpadahk ko en lohkihong aramas akan rongamwahwo. (Wadek Madiu 10:27.) Ni tohnsukuhl men eh tepida iang kalohk ihmw lel ihmw, e pahn kilang sapwellimen Siohwa sawas oh eh likih Siohwa pahn laudla. Ia duwen omw kak sewese tohnsukuhl men en wiahda mehn akadei wet? Ma mie pakair ong doadoahk tohrohr ehu nan mwomwohdiso, kangoange en medemedewe ia duwen eh kak wiahla emen sounkalohk me saikinte papidais. Kawehwehda dahme kahrehda me tohto diarada me e kin mengei en tepida kalohk nan soangen doadoahk tohrohr pwukat. Ehu mehn akadei ong ih iei e kak iang tepida wia padahk kan nan mihting en nan wihk. Ni eh lel mehn akadei wet, e pahn esehla mwahu ia duwen eh kak kawehwehda dahme e kin kamehlele.

KASALEHDA OMW LIKIH NOUMW TOHNSUKUHLO

19. Ia duwen Sises eh ketin kasalehda eh likih sapwellime tohnpadahk kan, oh ia duwen atail kak kahlemengih?

¹⁹ Mwohn Sises eh ketidahla nanleng, e padahkihong sapwellime tohnpadahk ko me re pahn pwurehng tuhpene. Irail sohte wehwehki me Sises mahmahsanih me irail pahn kohdahla nanleng. Mendahki sapwellime tohnpadahk ko sohte wehwehki soahng koaros, Sises kamehlele me re men kaperenda Siohwa. (Sohn 14:​1-5, 8) E mwahngih me irail anahne ahnsou pwehn wehwehki ekei soahng kan, me duwehte koapworopwor en mi nanleng. (Sohn 16:12) Kitail pil kak kasalehda me kitail likih me neitail tohnsukuhlo men kaperenda Siohwa.

20. Ia duwen sister men eh kasalehda me e likih nah tohnsukuhlo?

²⁰ Kitail kin koapworopworkihte me neitail tohnsukuhlo men wia dahme pwung. Karasepe, medewehla sister men nan Malawi me adaneki Chifundo. E tepida onop Paipel doadoahngki pwuhko Pereperenki Mour Kohkohlahte! rehn lih emen me kin iang Kadolik adaneki Alinafe. Ni ara kanekehla iren mehn kasukuhl 14, Chifundo idek rehn nah tohnsukuhlo dahme e medewehki doadoahngki sansal nan kaudok. Alinafe lingeringerda oh koasoia: “Met ei pilipil!” Chifundo medewe me ira solahr pahn onop Paipel. Ahpw ni kanengamah e pousehlahte onop rehn Alinafe, oh koapworopworki me kedekedeo e pahn wehwehkihda me doadoahngki sansal kan sapwung. Mwurin sounpwong kei, Chifundo idek reh peidek me mi nan iren mehn kasukuhl 34: “Soangen kamwahu dah kan me ke diarada ni omw onopki Paipel oh Koht mehlelo Siohwa?” Chifundo koasoiahda ia duwen Alinafe eh sapeng, “E koasoia ire kaselel tohto, ehu iei me Sounkadehde kan sohte kin wia dahme Paipel mahsanih me sapwung.” Sohte pwand mwurin mwo, Alinafe uhdihsang doadoahngki sansal kan oh papidaisla.

21. Ia duwen atail kak sewese neitail tohnsukuhlo en pilada en papah Siohwa?

²¹ Mendahki Siohwa me kin ketin “kakairada,” kitail kak sewese tohnsukuhl en Paipel men en kekeirda. (1 Kor. 3:7) Kitail kin wia laudsang en padahkihong dahme Koht kupwurki en wia. Kitail kin sewese en kakairada eh limpoak ong Siohwa. Kitail pil kin kangoange en kasalehda eh limpoak ong Siohwa sang ni eh mwohneki mahs Ih nan eh mour. Oh kitail kin padahkihong me e kak likih me Siohwa pahn ketin sewese ni eh lelohng kahpwal kan. Ni atail kin kasalehda atail likih ih, kitail kin kakehlaka eh koapworopworki me e pil kak mour pahrekiong sapwellimen Siohwa koasoandi kan oh pilada en papah Siohwa.