Tamataman Iren Paipel kan

Mie pak me ke kin apwalki tamanda iren Paipel ehu me ke perenki? Mwein ehu me kin kansenamwahwihiuk, seweseiuk en powehdi madamadau sapwung kan, de me ke men ehukihong emen. (Mel. 119:​11, 111) Tehk ekei iren sawas kan me kak seweseiuk en tamataman iren Paipel kan.

• Doadoahngki JW Library^®app. Ni omw wadek Paipel nan JW Library oh ke wadekada ire ehu me ke men tamataman, ke kak doadoahngki tag pwe ken kak mengei en diarada mwuhr.

• Kihda iren Paipelo wasa me ke kak kilang. Ntingihdi iren Paipel me ke men tamatamano nan kisin doaropwe ehu, oh kihong wasa me ke pahn kalapw kilang. Ekei kin kihong ni neirail kilahs en irongen, ah ekei kin kihong ni wenihmw en neirail aispwoaks. Ahpw, ekei kin kilele iren Paipelo oh doadoahngki ong wallpaper nan neirail computer de cellphone.

• Wiahda nan kisin doaropwe. Nan ehu kisin doaropwe, ntingihdi eden pwuhken Paipelo oh irelaud oh iretikitik depe, oh apali doaropweo, ntingihdi dahme iretikitiko mahsanih. Kowe eri song kilang dahme ireo mahsanih oh song en tamataman, de kilang apali doaropweo, oh song tamataman ia wasa ireo mi nan Paipel.