Peki Sawas Rehn Elder kan

1. Ia duwen Siohwa eh ketin kasalehda me sapwellime sihpw kan kesempwal ong ih?

SAPWELLIMEN Siohwa sihpw kan kin kesempwal ong ih. E ketin pwainkinirailda ntahn Sises oh idihada elder kan nan mwomwohdiso pwehn apwalih irail. (Wiewia 20:28) Koht ketin kupwurki elder kan en apwalih mwahu sapwellime sihpw kan. Elder kan kin idawehn Sises sang ni ar kin kangoange Kristian kan oh sewese irail en lelepekte ong Siohwa.—Ais. 32:​1, 2.

2. Ihs me Siohwa kin keieu kupwurki sewese? (Esekiel 34:​15, 16)

² Siohwa kin ketin poakohng sapwellime sihpw kan koaros, ahpw e kin keieu ketin nsenohki irail kan me kin lokolok. Ele ekei kin lokolok pwehki ar wiahda sapwung kan oh Siohwa kin ketin doadoahngki elder kan pwehn sewese irail. (Wadek Esekiel 34:​15, 16.) Ahpw, e ketin kupwurki kitail en ale sawas ni atail anahne. E sohte ketin kupwurkihte kitail en kapakapki sawas, ahpw en pil peki sawas rehn “silepe oh sounpadahk,” kan nan mwomwohdiso.—Ep. 4:​11, 12.

3. Ia duwen kitail koaros kak paiekihda atail koasoiapene pwukoahn elder kan?

³ Nan iren onop wet, kitail pahn koasoiapene ia duwen Siohwa eh kin ketin doadoahngki elder kan pwehn sewese irail kan me arail nanpwungmwahu reh luwetala. Kitail pahn sapengala peidek pwukat: Iahd me kitail en peki sawas rehn elder kan? Dahme kahrehda kitail en wia met? Oh ia duwen arail kin sewese kitail? Ele atail nanpwungmwahu rehn Siohwa uhdahn kehlail ahnsou wet, oh kitail sohte anahne sawas sang elder kan. Ahpw iren onop wet pahn kalaudehla atail kalahnganki mwomwen Siohwa eh kin ketin doadoahngki elder kan oh pahn sewese kitail en ese dahme kitail pahn wia ni atail anahne arail sawas.

IAHD ME KITAIL EN PEKI SAWAS REHN ELDER KAN?

4. Ia duwen atail ese me Seims 5:​14-16, 19, 20 kin koasoakoasoia emen me eh nanpwungmwahu rehn Siohwa luwetala?( Pil kilang kilel kan.)

⁴ Tohnpadahk Seims kawehwehda ia duwen Siohwa eh kin ketin doadoahngki elder kan pwehn sewese kitail. E ntingihedi: “Mie rehmwail me soumwahu? En ekerodo sounapwalih kan en mwomwohdiso.” (Wadek Seims 5:​14-16, 19, 20.) Seims koasoakoasoia aramas emen me anahne kamwahwihala eh nanpwungmwahu rehn Siohwa. Seims ndaiong me soumwahwo en peki sawas rehn elder kan nan mwomwohdiso, a kaidehn rehn toahkte. Seims pil kawehwehda me aramas soumwahwo mwahula ni ahnsou me e ale mahkpen dipe kan. Pwe me soumwahwo en mwahula, e anahne kohla tuhwong toahkte oh padahkihong kahpwalo, oh mwuhr e anahne peikiong ahn toahkteo kaweid. Ni ahlohte, ma kitail anahne sawas pwehn pwurehng karanihala Siohwa, kitail anahne koasoiong elder kan padahkihong irail atail kahpwal, oh eri idawehn kaweid me re kihong kitail sang nan Paipel.

5. Ia duwen atail kak ese ma atail nanpwungmwahu rehn Siohwa luwetala?

⁵ Seims irelaud 5 kangoange kitail en koasoiong elder kan ahnsou koaros me kitail pehm me kitail anahne sawas pwehn kakehlaka atail pwoson. Paipel kehkehlingkihong kitail me ma kitail sohte kanahieng, kitail kakete medewe me kitail ahneki nanpwungmwahu keren rehn Siohwa ahpw uhdahno soh. (Seims 1:22) Ekei tepin Kristian kan nan Sardis wiahda sapwung wet, ahpw Sises ketin padahkihong irail me re solahr kin kaperenda Siohwa. (Kaud. 3:​1, 2) Ehu ahl me kitail kak ese ma kitail ahneki nanpwungmwahu rehn Siohwa iei sang ni atail kapahrekihpene atail ngoang en kaudokiong Siohwa ahnsou wet oh pil mahso. (Kaud. 2:​4, 5) Kitail kak pein idek rehtail: ‘Ei perenki wadek oh doudouloale Paipel tikitikla? I kin towehda oh kaunopada ong ekeite mihting kan? I kin perenki kalohk duwehte mahso de I men doadoahngki ei ahnsou pwehn wia soahng teikan? I kin medewe duwen mwohni laudsang mahso?’ Ma kitail nda ei ong peidek pwukat, e kak wehwehki me atail nanpwungmwahu rehn Siohwa luwetala. Oh met pahn suwedla ma kitail sohte wia mehkot. Ma kitail sohte kak pein kakehlaka atail nanpwungmwahu rehn Siohwa, de ma kitail wiahda mehkot me Siohwa sohte ketin kupwurki, kitail en peki sawas rehn elder kan.

6. Dahme irail kan me wiahda dihp laud anahne wia?

⁶ Ekei dihp uhdahn laud me kakete kahrehda aramaso en kohsang mwomwohdiso ma e sohte koluhla. Ma kitail wiahda ehu rehn soangen dihp pwukat kitail anahne koasoiong emen elder kan. (1 Kor. 5:​11-13) Emen me wiahda dihp laud anahne sawas pwehn kamwahwihala eh nanpwungmwahu rehn Siohwa. Pwehn alehdi sapwellimen Siohwa mahk sang ni pweinen pweipwei sapahlo, kitail anahne kasalehda “soahng kan me kasalehda koluhla.” (Wiewia 26:20) Oh ehu ahl en wia met iei sang ni atail tuhwong elder kan ma kitail wiahda dihp laud.

7. Ihs me pil anahne sawas sang elder kan?

⁷ Elder kan pil men sewese irail kan me uhdahn apwalki pelianda arail ineng sapwung kan. (Wiewia 20:35) Ele ke kin apwalki wia met, mwein mwohn omw wiahla Kristian men ke kin ahnla doadoahngki wini en kasahliel, kilang kilel de kasdo suwed, de wia tiahk samin. Dehr masak en peki sawas, ke kak koasoiong emen elder me pahn rong uhk, kihda kaweid mwahu, oh kamehlelehiong uhk me Siohwa ketin kupwurki omw nannanti en pelianda ineng sapwung kan. (Ekl. 4:12) Mwein ke pahn mworusala pwehki ke ahnekihte ineng sapwung kan. Ahpw elder kan pahn katamankihong uhk me Siohwa kin ketin kupwurperenki ni omw kin peki sawas. Met kasalehda me ke kin aktikitik.—1 Kor. 10:12.

8. Kitail anahne padahkihong elder kan sapwung koaros me kitail wiahda?

⁸ Kitail sohte anahne padahkihong elder kan sapwung koaros me kitail wiahda. Karasepe, ele ke nda mehkot kamedek ong riomw Kristian men, de uhdahn lingeringerda pah. Ma met wiawi, idawehn ahn Sises kaweido oh kohla pekimahk rehn riomwo, a dehr kohla rehn elder men. (Mad. 5:​23, 24) Ke kak roporopki irair kan me duwehte mpahi, kanengamah, oh kaunda pein kowe, pwe ken kak kalaudehla omw kasalehda irair pwukat mwuhr. Ei mehlel, ma ke saikinte kak kamwahwihala omw kahpwalo, ke kak peki sawas rehn elder men. Ni ahnsou me Iuodia oh Sindiki sohte kak kamwahwihala nanpwungara, Pohl peki brother men nan mwomwohdisou en sewese ira. Oh elder men nan omw mwomwohdisou pil kak seweseiuk.—Pil. 4:​2, 3.

DAHME KAHREHDA KITAIL EN PEKI SAWAS REHN ELDER KAN?

9. Dahme kahrehda kitail en dehr namenengki peki sawas rehn elder kan? (Lepin Padahk 28:13)

⁹ Kitail anahne pwoson oh eimah pwehn peki sawas ni atail wiahda dihp laud ehu de ni atail pehm me kitail sohte kak pelianda atail ineng sapwung kan. Kitail en dehr namenengki peki sawas rehn elder kan. Dahme kahrehda? Pwehki Siohwa ketikihda elder kan pwe ren sewese kitail en kolokolete atail nanpwungmwahu reh. Eri ni atail kin koasoiong elder kan, kitail kin kasalehda me kitail likih Siohwa oh kin peikiong. Kitail kin pohnese me kitail anahne sapwellime sawas pwehn doulahte wia dahme pwung. (Mel. 94:18) Oh ma kitail wiahda dihp, kitail kak kamehlele me Siohwa pahn ketin mahkohng kitail ma kitail padahkihong elder kan oh uhdihsang wia dahme sapwung.—Wadek Lepin Padahk 28:13.

10. Dahme kak wiawi ma kitail song en ekihla dipatail kan?

¹⁰ Ni atail padahkihong elder kan dihp me kitail wiahda, Siohwa kak ketin mahkohng kitail, oh kitail kak pwurehng ahneki nanpwungmwahu reh. Ahpw ma kitail sohte koasoiong elder kan, atail irairo uhdahn pahn suwedla. Ni ahnsou me Nanmwarki Depit song en ekihla dipe ko, e uhdahn nsensuwedkihla oh medengkihla pwehki e ese me e kauwehla eh nanpwungmwahu rehn Siohwa. (Mel. 32:​3-5) Ni atail sohte mwadang kamwahwihala soumwahu ehu de ohla ehu me kitail ahnekihda, soumwahwo de ohlao pahn suwedla. Duwehte met, ma kitail wiahda dihp laud ehu, oh sohte ale sawas rehn elder kan, kitail kakete sohla ahneki nanpwungmwahu rehn Siohwa. Siohwa ketin mwahngih met, ihme kahrehda e ketin luke kitail en “kapwungala mahs ire pwukat” reh sang ni eh ketikihda elder kan pwe ren sewese kitail.—Ais. 1:​5, 6, 18.

11. Dahme pil kak wiawi ma kitail sohte padahkihong elder kan dihp laud ehu?

¹¹ Ma kitail sohte padahkihong elder kan dihp laud ehu me kitail wiahda, met kak kahpwalihala meteikan. Kitail kakete kauhdi sapwellimen Koht manaman en doadoahk nan mwomwohdiso, oh kauwehla popohl nanpwungen riatail Kristian kan. (Ep. 4:30) Duwehte met, ma kitail ese me emen nan mwomwohdiso wiahda dihp laud, kitail en kangoange en padahkihong elder kan.a Ma e sohte wia met, eri kitail anahne padahkihong elder kan. Ma kitail sohte wia met, eri kitail pil pahn dipada mwohn Siohwa. (Lip. 5:1) Pwehki kitail poakohng Siohwa, kitail pahn padahkihong elder kan ma emen wiahda dihp laud ehu. Ni atail wia met, kitail kin pere riatail kan nan mwomwohdiso oh sewese me wiahda dihpo en pwurehng ahneki nanpwungmwahu rehn Siohwa.

IA DUWEN ELDER KAN AR KIN SEWESE KITAIL?

12. Ia duwen elder kan ar kin sewese emen me anahne kamwahwihala eh nanpwungmwahu rehn Siohwa?

¹² Paipel kaweidki me elder kan en sewese irail kan me anahne pwurehng kamwahwihala arail nanpwungmwahu rehn Siohwa. (1 Des. 5:14) Ma ke wiahda dihp, elder kan kakete idek rehmw peidek kan pwehn wehwehki omw pepehm oh madamadau. (Lep. Pad. 20:5) Ele e sohte pahn mengei pwehki ke namenengki koasoia dahme wiawi. Ahpw ke kak sewese irail ma ke padahkihong irail kahpwal dah me ke ahneki. Dehr pwunodki me omw koasoi kan kakete mwomwen “pato mwahl” kei. (Sohp 6:3) Elder kan sohte pahn mwadang kadeikada dahme ke nda, ahpw irail pahn rong kanahieng pwe irail en ese ire mehlel koaros mwohn arail kihong uhk kaweid sang nan Paipel. (Lep. Pad. 18:13) Irail ese me e kin anahne ahnsou pwehn sewesehki emen dahme e anahne, eri irail sohte kasik en tuhwong uhk pak ehute pwehn kamwahwihala kahpwalo.

13. Ia duwen elder kan ar kak sewese kitail sang ni arail kapakap oh kihda kaweid en Paipel? (Pil kilang kilel kan.)

¹³ Elder kan sohte men kalaudehla omw suwedki dahme ke wiahda. Ahpw, irail pahn kapakapkin uhk. Ke kakete pwuriamweikihla me arail kapakap kan uhdahn “manaman.” Irail pahn seweseiuk sang ni arail ‘keiehkin uhk leh ni mwaren Siohwa.’ (Seims 5:​14-16) “Leh” wet kin karasaraskihong padahk mehlel en Paipel. Eri elder kan pahn koasoiaiong uhk iren Paipel kan me kak kansenamwahwihiuk oh seweseiuk ken pwurehng ahneki nanpwungmwahu rehn Siohwa. (Ais. 57:18) Kaweid en Paipel me irail ehukihong uhk kak kakehlaka omw koasoanehdi teng en doulahte wia dahme pwung. Elder kan kak seweseiuk ken rong Siohwa eh ketin mahsanihong uhk: “Iet ahlo, kumwail idawehn.”—Ais. 30:21.

14. Nin duwen me Kalesia 6:1 mahsanih, ia duwen elder kan ar kin sewese emen me “weweid nan ahl sapwung”? (Pil kilang kilel kan.)

¹⁴ Wadek Kalesia 6:1. Kristian men me kin “weweid nan ahl sapwung,” sohte kin wia dahme Siohwa ketin kupwurki en wia. Ele e wiahda pilipil sapwung ehu de dihp laud ehu. Limpoak kin kamwakid elder kan en “song kapwungala soangen aramas menet ni kadek.” Lepin lokaiahn Krihk me kawehwehdiong “kapwungala” kak pil wehwehki toahkte men eh kainenehla tihn aramas men me tipw pwehn mwahula. Toahkte mwahu men pahn kanahieng ni eh song en kainenehla tihn aramaso pwehn dehr kalaudehla eh medek. Ni elder kan ar kin song kapwungala emen me wiahda dihp, irail kin song en dehr kalaudehla eh lokolok. Ahpw irail kin wia uwen arail kak en kapwungala riarailo ni ahl kadek. Paipel pil padahkihong irail en ‘mwasamwasahn pein irail.’ Ni arail kin sewese emen en doadoahngki kaweid en Paipel, irail pahn ahnsou koaros taman me re pil kin wiahda sapwung. Irail uhdahn pahn kanahieng en dehr medewe me re mwahusang aramaso me re song en sewese, ahpw irail pahn aktikitik oh poakehla.—1 Pit. 3:8.

15. Dahme kitail kak wia ma kitail ahneki kahpwal ehu?

¹⁵ Kitail kak likih elder kan nan atail mwomwohdiso. Siohwa ketin padahkihong irail en dehr ndaiong meteikan duwen atail irair. Irail sukuhlki en kihda kaweid sang nan Paipel a kaidehn en padahkihong kitail dahme re medewe me pwung. Oh re sukuhlki me irail anahne pousehlahte sewese kitail en dadaur pahn atail kahpwal kan. (Lep. Pad. 11:13; Kal. 6:2) En elder kan irair oh koahiek wekpeseng, ahpw kitail kak koasoiong emen irail ma mie atail kahpwal. Ei mehlel, kitail sohte pahn kohla rehn emenemen elder oh peki kaweid, koapworopworki me emen irail pahn ndaiong kitail dahme kitail men rong. Ma kitail wia met, kitail pahn duwehla irail kan me men meteikan en padahkihong irail dahme “re kin men rong” ahpw sohte men sukuhlki “padahk mehlel” en Paipel. (2 Tim. 4:3) Ni atail koasoiaiong emen elder duwen kahpwal ehu, e kakete idek ma kitail koasoiongehr elder teikan duwen kahpwalo oh kaweid dah me re kihda. Oh aktikitik pahn kamwakid ih en peki kaweid rehn emen elder.—Lep. Pad. 13:10.

PEIN ATAIL PWUKOA

16. Pwukoa dahieu me kitail ahneki?

¹⁶ Mendahki elder kan kin kihong kitail kaweid oh sewesehkin kitail atail kahpwal kan, irail sohte pahn ndaiong kitail dahme kitail en wia. Kitail koaros anahne kasalehiong Siohwa me kitail poakohng oh men kaperenda ih sang ni dahme kitail kin nda oh wia ehuehu rahn. Oh e pahn ketin sewese kitail en wiahda pilipil mwahu kan oh lelepekohngete ih. (Rom 14:12) Ihme kahrehda elder kan sohte pahn ndaiong kitail dahme kitail en wia, ahpw re pahn doadoahngki Paipel pwehn sewese kitail en wehwehki sapwellimen Siohwa madamadau oh eri mweidohng kitail en pein wiahda atail pilipil. Sang ni atail idawehn arail kaweid sang nan Paipel, kitail kak kaiahnehda pein atail “kehl en madamadau” pwehn wiahda pilipil mwahu.—Ipru 5:14.

17. Dahme kitail en nantihong wia?

¹⁷ Ia uwen eh wia pwais kaselel en wia sapwellimen Siohwa sihpw! Siohwa ketin poaronehdo Sises ‘silepen sihpw mwahwo,’ pwehn tounmeteikihla moure ong kitail pwe kitail en kak mour kohkohlahte. (Sohn 10:11) Siohwa pil ketikihong kitail elder kan pwehn apwalih kitail nan mwomwohdiso, duwehte me e ketin inoukihda: “I pahn kihong kumwail silepen sihpw kan me kin mwekid pahrekiong kupwurei, oh re pahn kamwengehkin kumwail loalokong oh dehde mwahu.” (Ser. 3:​15, NW) Eri ni atail pwoson oh nanpwungmwahu rehn Siohwa eh luwetala, kitail en dehr masak peki sawas rehn elder kan. Eri kitail nantihong pwehn paiekihda laud elder kan nan mwomwohdiso me Siohwa ketikihda pwehn sewese kitail.