1925​​—Sounpar Epwiki Samwalahro

KOAPWOROPWOR ME KIN PWAND EN PWEIDA

Tohnsukuhl kan en Paipel kamehlele me sampah pahn wiahla paradais ehu nan 1925. Dahme kahrehda? Brother Albert Schroeder, me mwuhr iangala Governing Body, kawehwehda: “Se kamehlele me nan 1925, me keidi kan pahn kohdahla nanleng, oh me lelepek kan, duwehte Eipraam oh Depit, pahn iasada oh tiengla mwowe nin sampah.” Eri, ni met eh sohte wiawi, ekei riatail Kristian kan mworusala.—Lep. Pad. 13:12.

Mendahki irail mworusala, pali laud en Tohnsukuhl kan en Paipel doulahte soupisengki doadoahk en kalohk. Irail wehwehkihla me en kalohki duwen Siohwa iei doadoahk me keieu kesempwal me irail en wia. Kitail pahn sukuhlki ia duwen arail doadoahngki redio pwehn kalohk ong aramas tohto.

SOUNKADEHDE KAN WIAHDA EKEI REDIO SDEISIN

Nan 1924, aramas tohto kin rong redio sdeisino WBBR. Kahrehda nan 1925, Tohnsukuhl kan en Paipel pil wiahda ehu redio sdeisin karanih Chicago, Illinois me uhdahn kehlail. Eden redio sdeisin kapwo iei WORD. Ralph Leffler, me iang sewese kauwada redio sdeisino koasoia me aramas akan sang wasa tohto me uhdahn doh kin kak rong sdeisino, ahpw mehlel ni soutik kan me kin kopou. Karasepe, ehu peneinei me mi Pilot Station, Alaska, me dohki mwail 3,000 iang rong ehu tepin broadcast ko. Mwurin arail rong, peneineio ntinglahng irail kan me doadoahk nan sdeisino pwehn kalahnganki arail kihda prokramo me kangoange oh sewese irail en kalaudehla arail esehla duwen Koht oh Paipel.

The Watch Tower en December 1, 1925 kawehwehda dahme kahrehda aramas tohto sang wasa doh kan kak rong prokramo. E koasoia: “WORD iei ehu redio sdeisin me uhdahn kehlail nan wehin Amerika, me kin doadoahngki watt 5,000. Aramas akan sang sahpw koaros en Wehin Amerika, Cuba, oh lella wasa doh kan ni paliepeng en Alaska pil kak rong. Aramas akan me saikinte rong padahk mehlel kin men kalaudehla arail sukuhlki met pwehki arail rong sdeisino.”

Erein ahnsowo, Tohnsukuhl kan en Paipel pil men doadoahngki redio pwehn kalohki rongamwahwo nan Canada. Nan 1924, redio sdeisino CHUC wiawihda nan Saskatoon, Saskatchewan. E wia ehu tepin redio sdeisin nan Canada me kin kapwileweite prokram kan me pidada Koht oh Paipel. Nan 1925, irail anahne rapahki ehu wasa me laud ong redio sdeisino. Eri, sapwellimen Siohwa pwihn kasaula redio sdeisino ong Regent Building, wasahn kasdo ehu me mering nan Saskatoon me irail pwainda oh kamwahwihala.

Pwehki redio sdeisino, aramas tohto me kin kousoan nan kisin kahnimw kan oh wasa kan me dohsang kahnimw ko nan Saskatchewan ehdin rong rongamwahwo. Karasepe, nan ehu kisin kahnimw doh ko, lih emen me adaneki Mrs. Graham ntingla oh peki sawasepen Paipel kan mwurin eh rong ehu broadcast. Brother George Naish koasoia me ngilen eh peksawaso mwomwen uhdahn karuwaru, kahrehda re kadarala reh pwuhk isuh ko en Studies in the Scriptures. Sohte pwand mwurin mwo, Mrs. Graham tepida kalohki dahme e sukuhlki pil ong aramas akan me mi wasa doh kan.

SUKUHLKI PADAHK MEHLEL KESEMPWAL EHU

Nan March 1, 2025, mie artikel kesempwal ehu nan makasihno The Watch Tower me oaralapo koasoia “Birth of the Nation.” Dahme kahrehda artikelo uhdahn kesempwal? Tohnsukuhl kan en Paipel eseier me Sehdan kin kaunda ngehn suwed kan, pelien lamalam kan, palien koperment oh pesines kan nin sampah. Soahng pwukat koaros mi pahn eh manaman. Ahpw, ‘ladu lelepek oh loalokongo’ doadoahngki artikelo pwehn sewese riatail Kristian ko en wehwehki me sapwellimen Siohwa ladu kan nanleng oh sampah kin miniminpene. Irail uhdahn tohrohrasang ahn Sehdan sampah oh kin doadoahkpene pwehn utung Siohwa oh pelianda Sehdan oh irail kan me kin idawehn. (Mad. 24:45) Laduwo pil kawehwehda me Wehin Koht ipwidier nan pahr 1914 oh ih pahro me “mahwen tepida wiawi nanleng,” Sehdan oh nah ngehn suwed kan lekdeksang nanleng oh met mihmiher nin sampah.—Kaud. 12:​7-9.

Ekei Tohnsukuhl en Paipel ko sohte pwungki padahk kapw wet. Eri, artikelo koasoia: “Ma sounwadawad en The Watch Tower kan sohte pwungki dahme ntingdier, irail anahne kanengamah oh likih Siohwa ni arail pousehlahte papah ih ni lelepek.”

Ahpw Tom Eyre, pioneer men sang Britain, koasoiahda ia duwen pali laud en Tohnsukuhl kan en Paipel ar mwekidki artikelo: “Riatail Kristian kan uhdahn perenkihda kawehwe wet duwen Kaudiahl 12. Ni aht wehwehkihda me Wehin Koht tepidaier kakaun nanleng, se inenen perenki ehukihong meteikan duwen rongamwahu wet. E kahrehiong kiht en men kalaudehla aht doadoahk en kalohk oh pil sewesei kiht en kilang me Siohwa pahn ketin wia soahng kaselel kan ni ahnsou kohkohdo.”

KALOHKI DUWEN SIOHWA

Rahnpwukat, Sounkadehdehn Siohwa kan kin kalapw koasoia duwen sapwellimen Siohwa mahsen ko nan Aiseia 43:10 me mahsanih: “Kumwail me iei ei sounkadehde; I pilkumwaildahr nin duwen ei ladu.” Mwohn 1925, iren Paipel wet sohte kin kalapw pwarada nan neitail sawasepen Paipel kan. Ahpw e wekila. Erein 1925, makasihn en The Watch Tower 11 kin koasoia duwen Aiseia 43:10 oh 12!

Ni imwin August 1925, Tohnsukuhl kan en Paipel pokonpene pwe ren wia kapokon ehu nan Indianapolis, Indiana. Pwehn kasamwo tohnkapokono, Joseph F. Rutherford ntingihedi nan doaropwehn prokramo: “Kitail kohdo ni kapokon wet pwe Kauno en ketikihong kitail kehl me pahn kalaudehla atail ineng en wia sapwellime sounkadehde ni atail pwurala ni atail wasahn kalohk.” Erein kapokon en rahn waluho, koaros me towehda alehdi kangoang en kalohki duwen Siohwa ni ahnsou sohte lipilipil.

Rahn Kaunop, August 29, Brother Rutherford wia padahko me oaralape “A Call to Action.” Nan eh padahko, e kasalehda dahme kahrehda kalohk uhdahn kesempwal. E koasoia: “Siohwa ketin mahsanihong sapwellime aramas akan . . . : ‘Kumwail me ei sounkadehde oh ngehi me Koht.’ Ih eri ketin kehkehlingkihong irail. ‘Kumwail wiahda ehu kilel ong wehi kan pwe re en ese.’ Eri, irail kante me Siohwa kin ketin kaweidki sapwellime manaman me kak kalohki duwen Ih pwehki E sapwellimankin irail.”—Ais. 43:​12, NW; 62:10.

Mwurinte ahn Brother Rutherford padahko, e wadek doaropwe kesempwal ehu me oaralape “Message of Hope.” Tohnkapokono koaros pwungki rohng wet, me koasoia me Wehin Koht kelehpw me kak kihda koapworopwor en alehdi “kapai kan en popohl, paiamwahu, roson, mour, saledek oh peren kohkohlahte.” Mwuhr, sapwellimen Koht pwihn kawehwehdi oh print doaropweo ni lokaia kei pwehn doadoahngki nan kalohk. Mpen copy pahdep me wiawihda oh kohpeseng.

Tohnsukuhl kan en Paipel sohte adanekihla Sounkadehdehn Siohwa kan nan pahro, ahpw sounpar kei mwuhr. Ahpw irail tepida wehwehkihla ia uwen kesempwal en kalohki duwen Siohwa.

TEPIDA PWURALA REHN ME MEN RONG KAN

Pwehki ahnsowo Tohnsukuhl kan en Paipel tohtohla nan sampah, sapwellimen Siohwa pwihn kangoange irail en dehr kin kihlahte sawasepen Paipel kan ong aramas akan ahpw ren pil pwurala rehn irail kan me nin tapio men rong rongamwahwo. Mwurin doadoahk tohrohr en kihpeseng kisin doaropweo “Message of Hope,” Bulletina kaweidki: “Koasoanehdi en pwurala rehn aramas akan me kumwail kihong kisin doaropweo Message of Hope.”

Nan Bulletin en January 1925, mie ripoht ehu sang Tohnsukuhl en Paipel men nan Plano, Texas. E koasoia: “Se kin pwuriamweikihla me ni aht pwurehng pwurala ni wasahn kalohk kan me se kohla mwoweo, e kin pweida mwahusang wasahn kalohk kan me se kin tepida kalohk ie. Erein sounpar eisek, mie kisin kahnimw kis nan at wasahn kalohko me se pwuralahr pak limau. . . . Me keren, Sister Hendrix oh ei nohno pwurehng pwurala wasao oh kihla pwuhk tohtohsang mwoweo.”

Oh nan Panama, pioneer men ntingihedi: “Aramas tohto sohte kin men rong ni ei tepin kalohkla rehrail, ahpw ni keriapak de kesilipak en ei pwurala rehrail, irail wekila. Nan pahr me nekiero, I doadoahngki pali laud en ei ahnsou en pwurala rehn irail kan me I kalohkla rehrail mwoweo, oh mie soahng mwahu tohto me wiawihong ie ni ei pwurala rehn ekei irail.”

KILANGLAHNG AHNSOU KOHKOHDO

Ni imwin pahr 1925, Brother Rutherford ntinglahng pioneer kan oh kawehwehda dahme wiawiher nan doadoahk en kalohk en pahro, oh dahme irail anahne wia mwuhr. E koasoia: “Erein pahr me nekiero, e wia pwais kaselel ehu ong kumwail en kansenamwahwihala aramas tohto me kin nsensuwed. Doadoahk wet uhdahn kaperen ong kumwail . . . Nan pahr 1926, kumwail pahn ahneki ahnsou mwahu tohto en kadehdehda duwen Koht oh sapwellime Wehio, oh kasalehda ihs me uhdahn sapwellime tohnkaudok kan. . . . Kitail en ehupene oh pousehlahte doadoahngki ngilatail kan pwehn kapinga atail Koht oh atail Nanmwarki.”

Ni pahr 1925 eh kereniong imwisekla, brother kan pilahne ren kalaudehla Pedel en Brooklyn. Nan 1926, sapwellimen Koht pwihn tepida wia doadoahk en kauwada ihmw me laudsang me irail kin wia mwoweo.