Kisinlikou Sang Pwihn me Kin Apwalih Mwomwohdiso nan Sampah Pwon
Ong Riat akan:
“Se kin poaden kapingkalahngankihong Koht pwehki kumwail koaros, oh kin kalap tamankumwailda nan at kapakap akan. Pwe se kin tamanda, mwohn silangin Samatail Koht, duwen amwail kin doadoahngki amwail pwoson, oh duwen amwail limpoak me kin kahrehiong kumwail doadoahk laud, oh pil duwen amwail tengediong nan amwail koapworopworki atail Kaun Sises Krais.” (1 Des. 1:2, 3) Ia uwen kaselel en mahsen pwukat me kin kasalehda at pepehm ong kumwail! Se kapingkalahngankihong Siohwa pwehki kumwail oh doadoahk mwahu me kumwail kin kapwaiada. Dahme kahrehda?
Pahr nekiero, kumwail kin pwerisekiong wia amwail ‘doadoahk lelepek’ oh ‘doadoahk laud pwehki limpoak’ me pid doadoahk en Wehio. Tohto kumwail rapahki elen kalaudehla amwail doadoahk en kalohk. Ekei kumwail kosoula kalohk wasa kan, de pil nan sahpw teikan, me anahn laud en sounkalohki Wehio kan. Ekei pil kalaudehla arail doadoahk en kalohk ni ar kin wia kalohk ong wehipokon. Me tohto kin mwekidki en iang sawaspen pioneer erein sounpwong kan en Kataman, erein sounpwong me sounapwalih kin mwemweit, de erein doadoahk tohrohr me wiawi nan August 2014. Mendahki amwail irair kan kin wekpeseng, se kilang me kumwail loalenohng amwail doadoahk ong Siohwa, oh se kapingahkin kumwail. (Kol. 3:23, 24) Amwail ‘doadoahk lelepek’ iei ehu kahrepen sen kapingkalahngankihong Siohwa!
Se pil uhdahn perenki amwail ‘doadoahk laud pwehki limpoak’ me pid soangsoangen doadoahk en kokou ihmw en wasahn kaudok kan de ohpis kan nan sampah pwon. Soangen wasa pwukat uhdahn anahn, pwehki tohtohlahn sapwellimen Siohwa aramas akan eh wie kekeirda. (Ais. 60:22) Song medewehla, uwen tohtohn sounkalohk kan nan pahr teio, lella meh 8,201,545, pil iangahki me kin onop Paipel kan meh 9,499,933 nan ehuehu sounpwong. Imwilahn doadoahk en kekeirda wet, ohpis tohto pil anahnehte en onohnsapahlda de kalaudala. Ei, met pil wehwehki me Wasahn Kaudok tohto pil anahnte! Ni ahnsowohte, ohpis en kawehwe kan kin anahn nan wasa kan pwe sounkawehwe kan en kousoan ie oh wia ar doadoahk nan sahpw me kin lokaiahki lokaia me re kin kawehwe.
Imwilahn met, kitail kak pein idek rehtail, ‘Dahme I kak wia pwehn utung doadoahk en kauwada soangen wasa pwukat?’ Ekei kitail ele kak toukihda pein kitail en iang doadoahk en kauwada ihmw. Oh, mehnda ma mie atail koahiek en wia ihmw de soh, kitail koaros ahneki pwais kaselel en sawaskihda atail kepwe kesempwal kan ong doadoahk kesempwal pwukat. (Lep. Pad. 3:9, 10) Ni ahnsou me re kauwada impwal sarawio, uwen ahn mehn Israel kan mwekidki toukihda ar kepwe kan, pakair ehu kohda ren uhdihsang kihda ar kepwe kan. (Eks. 36:5-7) Ni mehlel, soangen mehn kahlemeng pwukat nan Paipel kin sair atail mohngiong oh kin kamwakid kitail. Amwail ‘doadoahk laud pwehki limpoak’ nan doadoahk kesempwal en papah sarawi pwukat wia pil ehu kahrepe sen kapingkalahngankihong Siohwa!
Se ahneki kahrepe tohrohr en peren ni at kilang riat akan ar kin dadaurete. Karasepe, medewehla riatail akan nan Palieir en Korea. Sangete pahr 1950, brother pwulopwul kan nan sahpwo kin kalapw selidi ahnsou kis de ahnsou reirei pwehki re sohte men kauwehla ar soupoupali nin duwen Kristian kei. Soangen wiepe wet kin kalapw wiawihong riatail kan ahpw re sohte kin lohdi. Ar mehn kahlemeng mwahu en dadaurete kin kakehlaka atail pwoson!
Nan Eritrea, riatail brother silimen me selidier daulih sounpar 20. Meteikan, iangahki riatail sister kan oh neirail seri kan, selkihdi ahnsou mwotomwot kei. Doadoahk laud tohto kin wiawi pwehn kasaledekihraila sang imweteng, ahpw lao lel met saikinte pweida. Riatail brother kan sohte kesehla arail soupoupali. Re kolokolete arail lelepek pahn soangsoangen irair apwal akan. Se sohte kin manokehla irail me lelepek kan nan at kapakap kan.—Rom 1:8-10.
Mehlel, pali laud en kumwail sohte selidi pwehki amwail pwoson. Ahpw, tohto kumwail kin nannanti dadaur pahn kahpwal en roson, mahmahla, uhwong kan sang kisehn peneinei me sohte iang kisehn amwail pwoson, de pil ehu soangen kahpwal me emenemente wehwehki. Mendahki kahpwal pwukat, kumwail pousehlahte papah Siohwa ni lelepek! (Seims 1:12) Se kapingai kumwail. Pil ehu kahrepe sen pil kapingkalahngankihong Siohwa iei amwail kin dadaurete ni lelepek.
Ei, amwail doadoahk lelepek oh doadoahk laud pwehki limpoak, oh amwail dadaurete ni lelepek kihda kahrepe kaselel kan sen “kapingkalahngan ong KAUN-O, pwehki eh kupwur mwahu.” (Mel. 106:1) Se inenen poakepoake kumwail koaros oh se kapakapkiong Siohwa me e pahn ketin kakehlakahda kumwail, apwahpwalih kumwail, oh kapai kumwailda pwe kumwail en papah ih kohkohlahte.
Riamwail kan,
Pwihn me Kin Apwalih Mwomwohdiso nan Sampah Pwon en Sounkadehdehn Siohwa kan