Saintis kan Kamwakid Rahn Kuloak en Ohlahn Sampah—Dahme Paipel Mahsanih?

Ni January 24, 2023, saintis kan nda me Kuloak en Ohlahn Sampah (Doomsday Clock)a kerenlahngehr ni lukepen pwong, me kin karasaraskihong imwin sampah.

• “‘Kuloak en Ohlahn Sampah’ kin karasaraskihong keperpen mwomwlahn aramas. Niareo, saintis kan kamwakid rahn kuloako en kerenlahng douluhl lukepen pwong, pwehki mahwen nan Ukraine, kapwunod en mahwen en nuclear oh keperlahn mesenleng.”—AFP International Text Wire.

• “Niareo, saintis kan kasalehda me rahn ‘Kuloak en Ohlahn Sampah’ mwekidahla seken 90 mwohn lukepen pwong—aramas akan uhdahn kerenlahng armakedon sang mahso.”—ABC News.

• “Pwihn en saintis ehu sang sampah pwon koasoia keperpen aramas akan ar kakete kamwomwala pein irail laudsang mahso.”—The Guardian.

Ia duwe, mour en aramas koaros oh atail sampah pahn kereniongehr mwomwla? Kitail anahne masak dahme pahn wiawi ni ahnsou kohkohdo? Dahme Paipel mahsanih?

Dahme pahn wiawi ni ahnsou kohkohdo

Paipel mahsanih me “sampah duweduwehte” oh mie aramas akan me “pahn sapwenikihla kohkohlahte.” (Eklesiasdes 1:4; Melkahka 37:29) Eri aramas akan sohte pahn kauwehla sampah de wiahiong sampah en sohla kak wia wasahn kousoan ong aramas akan.

Ahpw, Paipel kin mahsanih duwen imwio. Karasepe, e mahsanih me “sampah . . . pahn sohrala.”—1 Sohn 2:17.

• Pwehn diarada ia wehwehn Paipel eh kin mahsanih duwen imwin sampah, menlau wadek oaralap “Is the World Coming to an End? What Is the Apocalypse?”

• Pwehn ese dahme Paipel mahsaniheki iahd me soahng pwukat pahn wiawi, menlau wadek oaralap “When Will the World End?”

Ahneki koapworopwor

Paipel kak sewesei kitail en ahneki koapworopwor mendahki kahpwal en sampah kan me kin wiawi ahnsou wet. Ia duwen?

• Paipel kin kihong kitail kaweid mwahu kan. (2 Timoty 3:16, 17) Karasepe, wadek oaralap “How to Control Worry” pwe ken kilang ia duwen Paipel eh kak seweseiuk en ahneki koapworopwor mendahki kahpwal kan nan omw mour.

• Paipel kin kasalehda me mie koapworopwor ni ahnsou kohkohdo. (Rom 15:4) E kin kawehwehda dahme kitail kak kasik ni ahnsou wet oh pil ni ahnsou kohkohdo, me kin sewese kitail en ahnekihte koapworopwor mendahki dahme kin wiawi nin sampah.

Pwe ken sukuhlki soahng tohto nan Paipel, se lukeiuk en song at koasoandien onop Paipel ni soh isepe.