Dahme Kahrehda Diren Kailok?​—Dahme Paipel Mahsanih?

Palien rohng kan kin kalapw ripohtki duwen aramas akan me kin kasalehda ar kailok ni lokaia de wiewia pwehki ar lipilipilki aramas, oh duwen aramas akan ar kin peiong meteikan pwehki wekpeseng en keinek, oh duwen mahwen.

•  “Rahnwet e tohtohla aramas akan me kin kasalehda ar kailok ni lokaia nan internet, pwehki mahwen me wiawi nanpwungen Israel oh Gaza oh pil aramas akan me kin kalaudehla tiahk lemei oh kailok.”​—The New York Times, November 15, 2023.

•  “Sangete October 7, aramas akan me kin kasalehda ar kailok ni lokaia de wiewia pwehki ar lipilipilki aramas tohtohsang mahso.”​—Dennis Francis, president of the United Nations General Assembly, November 3, 2023.

Sangete mahs mie aramas akan me kin kasalehda ar kailok ni lokaia, oh kin mie tiahk lemei oh mahwen. Ni mehlel, Paipel mahsanih me mie aramas me “kin kadar lokaia samin [“lemei,” NW] rasehng arep” oh me kin kahrehda mahwen oh tiahk lemei. (Melkahka 64:3; 120:7; 140:1) Ahpw Paipel kawehwehda kahrepen kailok me kitail kin kilang rahnwet eh tohtohla.

Kailok​—Kilel en atail ahnsou

Paipel kasalehda kahrepe riau me kailok mihmihki wasa koaros.

1. 1. Paipel kohpada ahnsou ehu me “limpoak en pali laud en aramas pahn loula.” (Madiu 24:12) Aramas akan pahn kin kasalehda wiewia kan me kin kahrehda kailok a kaidehn limpoak.—2 Timoty 3:1-5.

2. 2. Kailok laud me kin wiawi nin sampah rahnwet kin kasalehda me Sehdan me Tepil kin kamwakid mepwukat. Paipel mahsanih me “sampah pwon mi pahn manaman en me suwedo.”—1 Sohn 5:19; Kaudiahl 12:9, 12.

Ahpw, Paipel pil kasalehda me kereniongehr Koht pahn ketikihsang soahng kan me kin kahrehda kailok. Oh pil, e pahn ketin kamwahwihala soangen medek koaros me kailok kin kahrehda. Paipel inoukihda:

•  Koht “pahn ketin limwihasang pilen masarail kan koaros, oh mehla solahr pahn wiawi, solahr mwahiei, solahr sengiseng oh solahr medek. Mehkan en mahso sohralahr.”—Kaudiahl 21:4.