Dahme Paipel Mahsanihki Duwen Easter?
Paipel sapengki
Kasarawien Easter sohte kin poahsoandahsang Paipel. Ahpw ma ke kilang poadopoad en kasarawi wet, ke pahn esehda ia uhdahn wehwehn Easter—me poahsoankihda tiahk en mahs ehu me pid kaparapar. Medewehla ire pwukat.
Eden Kasarawio: Pwuhken Encyclopædia Britannica koasoia: “Sohte me ese ia wasa lepin lokaiahn waio (English) Easter tepisang ie; mpen pahr 700 samwa, samworo en Anglo-Saxon me adaneki Venerable Bede alehda ahd wet sang koht lih en ahnsoun poad (spring) en mehn Anglo-Saxon me ede Eostre.” Ekei kin nda me e dokedoke Astarte, koht lih en kaparapar en mehn Penisia, me pil duwehte koht en mehn Papilon me adaneki Ishtar.
Hare kan, rapit kan: Mepwukat wia kilelepen kaparapar me “kohsang tiahk en kasarawi en mahs oh pil kilelepen en mehn Iurop oh Middle East arail kin wia kasarawi en pelien lamalam kan me kaidehn Kristian erein ahnsoun poad (spring).”?—Encyclopædia Britannica.
Kutohr kan: Nin duwen me diksenerio Funk & Wagnalls Standard Dictionary of Folklore, Mythology and Legend koasoia, ni ahnsou me re kin rapahki kutohr en Easter kan, me dene rapit en Eastero me wahdo, met “sohte wiahte mwadong en seri ehu, ahpw e wia kisehn kasarawi en kaparapar ehu.” Ekei tiahk kan kin kamehlele me kutohr en Easter me kin kapwatda ko “kak wahdo peren, paiamwahu, roson mwahu, oh pereparail ni manaman.”—Traditional Festivals.
Likoun Easter kapw: “Aramas kin nda me e sohte kasalehda wahu de e pahn wahdo paisuwed ma emen sohte kin likawih likou kapw ni eh rahnmwahwih en mehn Scandinavia koht lih en ahnsoun poad (spring), de Eastre.”—The Giant Book of Superstitions.
Sarawien ni sohrahn (Sunrise services): Mepwukat kin dokedoke tiahk en irail kan me kin kaudokiong ketipin mahso me kin “wiawi ni soangen rahn me reirei en rahn oh nipwong kin duwepenehte (vernal equinox) ni ar kin kasamwohdo ketipin oh eh kehl laud pwehn wahdo mour kapw ong soahng koaros me wie kekeirda.”—Celebrations—The Complete Book of American Holidays.
Pwuhko The American Book of Days kawehwehda mwahu ia wasa Easter tepisang ie ni eh koasoia: “Sohte me pahn peikasalki me kaunen pelien lamalam kan en Kristian erein pahr 300 samwa alehda tiahk en pelien lamalam teikan me kaidehn Kristian oh wiahkihla padahk en Kristian ehu.”
Paipel kin kaleke aramas en dehr idawehn tiahk en sahpw de aramas me kin kansensuwedihala Koht ni arail kaudokiong ih. (Mark 7:6-8) Keriaun Korint 6:17 mahsanih: “Siohwa ketin mahsanih: ‘ . . . Katohreikumwailla oh dehr doahke mehkot samin.’” Easter iei kasarawi ehu me irail kan me kaidehn Kristian kin wia, oh irail kan me kin men kaperenda Koht pahn soikala kasarawi wet.