Dahme Paipel Mahsanihki Duwen Krismas?
Paipel sapengki
Paipel sohte kasalehda iahd me Sises ketin ipwidi, e sohte pil mahsanih me kitail en kasarawi eh ipwidi. Nin duwen me pwuhko Cyclopedia sang McClintock oh Strong koasoia: “Koht sohte ketin kehkehlingki me kitail en kasarawi Krismas, oh Kadehde Kapw sohte kasalehda duwen Krismas.”
Ahpw, petehkpen poadopoad en Krismas kasalehda me e tepisang tiahk en mehn mahs kan me kaidehn Kristian. Paipel kasalehda me kitail kin kansensuwedihala Koht ma kitail song en kaudokiong ih ni ahl me e sohte ketin kupwurki.—Eksodus 32:5-7.
Poadopoad Duwen Tiahk en Krismas kan
Kasarawien ipwidi en Sises: “Tepin Kristian ko sohte kin kasarawi ipwidi en [Sises] pwehki re wiahki kasarawihpen ahn emen rahnen ipwidi tiahk en mehn mahs kan me kaidehn Kristian.”—The World Book Encyclopedia.
December 25: Sohte mehn kadehde me Sises ketin ipwidi ni December 25. Kaunen pelien lamalam kan pilada rahno pwehn pahrekiong kasarawi kan me mehn mahso, me kaidehn Kristian kei, kin wia ni rahn akan me ketipino kin mwadang kihrla (winter solstice).
Kamadipw oh kihpeseng kisakis kan: Pwuhko The Encyclopedia Americana koasoia: “Saturnalia iei kasarawi ehu me mehn Rom kin wia nan werengen December, oh tiahk tohto me kin wiawi nan Krismas kohsang kasarawi wet. Karasepe, nan kasarawi wet, re kin wia kamadipw, kihpeseng kisakis, oh isik kandehla kan.” Pwuhko Encyclopædia Britannica kasalehda me “doadoahk oh pesines koaros” kin uhdi erein rahnen Saturnalia.
Dengki en Krismas kan: Nin duwen me pwuhko The Encyclopedia of Religion koasoia, mehn Iurop kan kin kapwatahkihda imwarail kan “soangsoangen dengki kan oh tuhkehn Krismas kan (evergreens)” pwehn kasarawi rahn me ketipino kin mwadang kihrla (winter solstice) oh pwehn pelian ngehn suwed kan.
Tuhkehn Krismas: “Irail mehn Iurop kan me kaidehn Kristian kin kaudokiong tuhke, oh irail doula wiewiawihte mwurin arail wiahla Kristian kei.” Ehu ahl me kasalehda me re kin kaudokiongete tuhke iei sang ni arail kin “kihdi tuhkehn Krismas ni wasahn pedolong de nan imwarail kan erein werengen ahnsoun kopou (midwinter).”—Encyclopædia Britannica.