Keieun Kronikel
13 Depit eri koasoiong kaunen meh kid kan oh kaunen meh epwiki kan oh kaun teikan koaros.+ 2 Depit eri ndaiong mwomwohdisohn Israel pwon: “Ma e mwahuwong kumwail oh ma Siohwa atail Koht ketin kupwurki, a kitail kadarala pakair rehn luhwen riatail kan nan sapwen Israel pwon oh pil rehn samworo kan oh mehn Lipai kan me mi nan ar kahnimw kan*+ ren kohdo oh iang kitail. 3 Oh kitail pahn kapwurehdo Kohpwahn inou lap+ en atail Kohto.” Pwe re sohte kin apwalih ni mwehin Sohlo.+ 4 Mwomwohdiso pwon pwungki ren wia met, pwe met mwomwen pwung ong aramas ako koaros. 5 Depit eri kapokonepene Israel pwon, sang ni pillap* en Isip lella Lepo-amad,*+ pwe ren wahdo Kohpwahn inou lap en Koht mehlelo sang Kiriad-searim.+
6 Depit oh Israel pwon eri kohdahla Paala,+ me iei Kiriad-searim me mi nan sapwen Suda, pwe ren wahdahdo sang wasao Kohpwahn inou lap en Koht mehlelo, Siohwa, me kin ketiket nan mwoale pohnangin* kerup ko,+ wasa me aramas ako kin likweriong mware. 7 Ahpw, re kihdiong Kohpwahn inou lap en Koht mehlelo pohn kuruma kapw ehu+ oh wahsang ni imwen Apinadap, oh Ussah oh Ahio me kakahluwa kurumao.+ 8 Depit oh Israel pwon wiewia kasarawi mwohn silangin Koht mehlelo ni ngoang laud, ni ar koul, kesengki arp, keseng sahl teikan, dampwurin,+ simpal,*+ oh sowi.+ 9 Ahpw ni ar lellahng ni wasahn kihsang kilin krein* nan Kidon, Ussah ahpw poarala oh koledi Kohpwahn inou lapo, pwe kou ko kereniong kesehdi. 10 Siohwa eri ketin engiengda pahn Ussah, oh E ketin kemehla ih wasao pwehki eh poaralahng Kohpwahn inou lapo,+ oh e mehla wasao mwohn silangin Koht.+ 11 Ahpw Depit lingeringerda* pwehki Siohwa eh ketin engiengda pahn Ussah; oh wasao adanekihla Peres-ussa* leledo rahnwet.
12 Depit eri masakada Koht mehlelo rahno oh nda: “Ia duwen ei kak patohwando rehi Kohpwahn inou lap en Koht mehlelo?”+ 13 Depit sohte wahla Kohpwahn inou lapo wasa me e kin mihmi ie nan kahnimw en Depit, ahpw e uhd koasoanehdi en wisikla ni imwen Oped-edom, mehn Kahd. 14 Kohpwahn inou lap en Koht mehlelo mihmi rehn tohnimwen Oped-edom, oh e mihmihki nan imweo erein sounpwong siluh, oh Siohwa kin ketin kapaia tohnimwen Oped-edom oh mehkoaros me e ahneki.+