Keieun Kronikel
19 Mwuri Nahas nanmwarkien Ammon ahpw mehla, oh nah pwutako wiliandi ih wiahla nanmwarki.+ 2 Depit eri nda: “I pahn kasalehiong Anun nein Nahas limpoak loalopwoat+ pwehki eh pahpao eh kasalehiong ie limpoak loalopwoat.” Depit eri kadarala meninkeder kan en kansenamwahwih pwehki eh pahpao mehla. Ahpw ni ahnsou me nein Depit ladu ko lellahng nan sapwen mehn Ammon ko+ pwe ren kansenamwahwih Anun, 3 lapalap akan en mehn Ammon ko eri ndaiong Anun: “Komw medewe me Depit kin kawauwih semomwio ni eh kadarodohng uhk irail kan me pahn kansenamwahwih komwi? Nah ladu kan sou kohdo rehmwi pwe ren dawih sahpwet oh lipoahroke oh kalowehdi?” 4 Anun eri ale nein Depit ladu ko oh sihpih irail,+ oh lupukasang lukopen arail likou ko oh kadarirailla. 5 Ni Depit eh rongada duwen ohl ako, e ahpw mwadangete kadarala meteiko pwehn tuhwong irail, pwehki ohl ako uhdahn namenekla douluhl; oh nanmwarkio ahpw ndaiong irail: “Kumwail mihmihte nan Seriko+ lao amwail alis kan pwurehng wosada, kumwail ahpw pwurodo.”
6 Mehn Ammon kan eri kilangada me Depit kailongkinirailla, eri Anun oh mehn Ammon kan pwainkihda silper dalend* 1,000 kurumahn mahwen oh soundak oahs kan sang Mesopodamia,* Aram-maaka oh Sohpa.+ 7 Irail eri pwain kurumahn mahwen 32,000, iangahki nanmwarkien Maaka oh nah aramas akan. Irail ahpw kohdo oh kauwada kahnimpwal mwohn Medepa.+ Mehn Ammon kan eri kohpene sang nan arail kahnimw kan ong mahwen.
8 Ni Depit eh rongada met, e ahpw kadarala Sohap+ oh karis en sounpeio pwon, iangahki nah sounpei kan me keieu kehlail.+ 9 Oh mehn Ammon kan ahpw kohieila oh koasoansoandi ni ireken mahwen ni wasahn pedolong en kahnimwo nindoken nanmwarki me kohdo ko ar mihmi nan mohso.
10 Ni Sohap eh kilang sounpei kan ar kohkodohng uhwong ih sang mwowe oh mwuri, e ahpw pilada ekei pwihn en sounpei me keieu koahiek nan Israel oh koasoaneiraildi ni ireken mahwen pwe ren tuhwong mehn Siria ko.+ 11 Ih eri kihdi luhwen sounpei ko pahn kaweid en* rie pwutak Apisai,+ pwehn koasoaneiraildi ni ireken mahwen pwe ren tuhwong mehn Ammon ko. 12 Ih eri nda: “Ma mehn Siria kan+ kehlailsang ie, eri ke anahne kohdo doareiehla, ahpw ma mehn Ammon kan kehlailsang uhk, I pahn doareiukala. 13 Kitail anahne kehlail oh kommwad+ pwehki neitail aramas akan oh pwehki kahnimw kan en atail Koht, oh Siohwa pahn ketin wia dahme mwahu mwohn silangi.”
14 Sohap oh nah ohl akan ahpw kolahng mahweniong mehn Siria ko, oh mehn Siria ko ahpw tangdoaui.+ 15 Ni mehn Ammon kan ar kilangada mehn Siria kan ar tangdoaui, re pil tangasang rie pwutako Apisai oh pweieklahng nan kahnimwo. Mwurin mwo Sohap ahpw kohdo Serusalem.
16 Ni mehn Siria ko ar kilangada me re lohdier pahn mehn Israel ko, re ahpw ileklahng meninkeder kan ren ekerodo mehn Siria kan me mi nan sahpw akan ni Pillapo,*+ oh Sopak, nein Adadeser kaunen karis en sounpei me kahluwa irail.+
17 Ni ahnsou me rohng wet lella rehn Depit, e ahpw mwadangete kihpene mehn Israel koaros oh kotehla Sordan oh kohla rehrail oh koasoaneiraildi ni ireken mahwen. Depit eri koasoaneiraildi ni ireken mahwen pwe ren tuhwong mehn Siria kan oh re mahweniong ih.+ 18 Ahpw mehn Siria kan tangasang mehn Israel kan; oh Depit kemehla nein mehn Siria kan soundak kuruma 7,000, oh sounpei alu 40,000, oh e kemehla Sopak, kaunen karis en sounpeio. 19 Ni nein Adadeser ladu kan ar kilangada me irail lohdier pahn Israel,+ re ahpw mwadangete wiahda popohl rehn Depit oh mihla pahn eh manaman;+ oh Siria sohla men sewese mehn Ammon kan.