Melkahka kan
149 Kapinga Iah!*
Kumwail koulkihong Siohwa apwoat koul kapwen;+
Kumwail kapinga ih nan mwomwohdisohn me loalopwoat kan.+
2 Israel en perenkihda Sounwiepe Lapalapo;+
Nein Saion seri kan en pereperenki arail Nanmwarki.
3 Irail en kahlek kapikapinga mware+
Oh koulkihong ih koulen kaping kan,* oh kesekesengki dampwurin oh arp.+
4 Pwe Siohwa kin ketin kupwurperenki sapwellime aramas akan.+
E kin ketin kalinganahla me opampap sang ni eh ketin doareirailla.+
5 Me loalopwoat kan en perenkihda ar lingan;
Ren weriwerki peren pohn ar peht kan.+
6 Awarail kan en koulki koulen kaping kan ong Koht,
Oh ren kolokol kedlahs me au riau,
7 Pwe ren ikih wehi kan
Oh kaloke aramas akan,
8 Pwe ren salihekihdi ar nanmwarki kan selmete
Oh ar lapalap kan selmete kehlail kan,
9 Pwe ren kapwaiada kadeik me ntingdier ong irail.+
Sapwellime aramas loalopwoat kan me pahn ahneki pwais en wia mepwukat koaros.
Kapinga Iah!*