Eklesiasdes

6 I kilangehr pil ehu soahng kansensuwed* me kin wiawi nin sampah,* oh e kin kalapw wiawi rehn aramas akan: 2 Koht mehlelo ketikihong aramas emen kepwe kan oh wahupe, pwe en kak ahneki soahng koaros me e inengieng; ahpw Koht mehlelo sohte kin ketin mweidohng en pereperenki mepwukat, mendahki mehn keiru men ele pahn uhd pereperenki mepwukat. Met sohte katepe oh uhdahn kamedek. 3 Ma aramas emen pahn naineki seri epwiki oh e momourki sounpar tohto lao e mahla, ahpw e sohte pereperenki soahng mwahu kan mwohn eh mehla,* I pahn nda me seri me ipwidihte mehla mwahusang ih.+ 4 Sohte katepen seri meno eh ipwidi. Duwehte eh mehla nan rotorot oh sohte ede. 5 Mendahki e pil sohte mwahn kilangedi ketipin de ese mehkot, e pil mwahusangete* mehteio.+ 6 Ia katepen momourki sounpar riekid ahpw sohte ahneki peren? Kaidehn koaros kin kohla wasatehkis?+

7 Aramas emen kin doadoahk laud pwehn audehda ewe;+ ahpw e sohte mwahn kin itarki. 8 Pwe ia duwen aramas loalokong men eh kin mwahusang me pweipwei men,+ de ia katepen aramas semwehmwe men en ese duwen eh pahn momour?* 9 En pereperenki dahme mesomw kan kin kilang mwahusang inengieng soahng kan me ke sohte kak ahneki. Met pil sohte katepe, rasehng pwakipwakih kisinieng.

10 Soahng koaros me miehier, mie adarail oh irair en aramas sansaldahr; oh aramas sohte kak akamaiong* emen me kehlailsang ih. 11 Ma lokaia* kin tohtohla, ih uwen ar kin sohla katepe; oh kamwahu dah me re kin wadohng aramas? 12 Ihs me ese dahme keieu mwahu ong aramas emen en wia erein eh mour mwotomwot oh soh katepe, me kin sohrala rasehng mwete ehu?+ Pwe ihs me kak padahkihong aramas emen dahme pahn wiawi nin sampah* mwurin eh sohla mie?