Esekiel
22 Siohwa ketin pwurehng mahsanihong ie: 2 “A kowe, nein-aramas, ke onopadahr en lohki kadeik ong* kahnimw me pwukoahki dipen kamaramas*+ oh kasalehiong ih eh soahng kasaut kan koaros?+ 3 Ke pahn nda, ‘Iet me Kaun Wasa Lapalahpie Siohwa ketin mahsanih: “Kowe kahnimw me direkihla keredien nta,+ me eh ahnsou wie kohkohdo,+ me kin wiahda dikedik kasaut kan* pwehn kasaminehla pein ih,+ 4 omw kakerehdi nta me kahrehiong omw pwukoahkihdi dipen kamaramas,+ oh omw dikedik kasaut kan kahrehiong omw saminla.+ Ke kamwadangahla imwin omw rahn akan, oh imwin omw sounpar kan leledohr. Ihme kahrehda I pahn wiahkinuhkala mehkot kanamenek ehu ong wehi kan oh mehn kepit ehu ong sahpw kan koaros.+ 5 Sahpw kan me keren oh dohsang uhk pahn kapailokeiuk,+ kowe me edomw samin oh me direkihla pingiping. 6 Kilang! Emenemen kaunen Israel kan me mi rehmw kin doadoahngki ar manaman pwehn kakerehdi nta.+ 7 Re kin mwamwahliki arail pahpa oh nohno kan me mi rehmw.+ Re kin widinge mehn liki kan me kin koukousoan rehmw, oh re kin wiakauwe seri sepwoupwou oh liohdi.”’”+
8 “‘Ke kin mwamwahliki ei wasa sarawi kan, oh ke kin kasaminehla ei sapad kan.+ 9 Mie sounkaraun likamw kan rehmw me kin koasoanehdi ren kakerehdi nta.+ Re kin tungoale meirong kan rehmw pohn nahna kan oh wia wiewia samin kan rehmw.+ 10 Re kin kasaminehla en ar pahpa kan peht kan* rehmw,+ oh re kin kanamenekihala lih emen ni eh saminki eh soumwahu en lih.+ 11 Aramas emen kin wia wiewia kasaut rehn en mehn mpe pwoud,+ oh emen kin kasaminehkihla en nah pwutako pwoud wiewia samin,+ oh emen kin kanamenekihala rie serepein rehmw, nein eh pahpao serepein.+ 12 Re kin ale kisakis ni ahl sapwung rehmw pwehn kakerehdi nta.+ Irail kin kamangaiong emen mwohni+ oh kihda wihn en mwohni oh kulihasang mehn mparail kan mwohni.+ Ei, ke uhdahn manokeiehla,’ Kaun Wasa Lapalahpie Siohwa me ketin mahmahsen.
13 “‘Kilang! I lopw pwehki ei kasautki omw ale kamwahupomw ni likamw oh wiewiahn kakerehdi nta me wiawi rehmw. 14 Ia duwe, omw eimah* pahn mihmihte oh pehmw kan pahn kehkehlailte ni rahn akan me I pahn uhwong uhk?+ Ngehi, Siohwa me mahmahsen, oh I pahn mwekid. 15 I pahn kamwarakuhkpeseng nan wehi kan oh kihiukpeseng nan sahpw akan,+ oh I pahn katokehdi omw samin.+ 16 Oh ke pahn mwamwahlla mwohn wehi kan, oh ke pahn anahne ese me ngehi me Siohwa.’”+
17 Oh Siohwa ketin pwurehng mahsanihong ie: 18 “Nein-aramas, aramas en Israel kan wiahla mehkot sohte katepe* ehu ong ie. Irail koaros wia prons, dihn, mete oh leht nan wasahn kisiniei mwehl ehu. Re duwehla mehkot sohte katepe sang ni silper.+
19 “Kahrehda iet me Kaun Wasa Lapalahpie Siohwa ketin mahsanih: ‘Pwehki kumwail koaros wiahla mehkot sohte katepe,*+ I pahn kihkumwailpene nan Serusalem. 20 Duwehte silper, prons, mete, leht oh dihn ar kohpene nan wasahn kisiniei mwehl ehu pwehn peukohng kisiniei pohrail oh kapeirailpeseng, eri I pahn kihkumwailpene nan ei engieng mwuledek, oh I pahn peuk pohmwail oh kapeikumwailpeseng.+ 21 I pahn kihkumwailpene oh peukohng pohmwail kisiniei en ei engieng,+ oh kumwail pahn peipeseng nan kahnimwo.+ 22 Duwehte silper eh kin peipeseng nan wasahn kisiniei mwehl ehu, eri kumwail pahn peipeseng nan kahnimwo; oh kumwail pahn anahne ese me pein ngehi, Siohwa, me wudekihdi ei engieng pohmwail.’”
23 Oh Siohwa ketin pwurehng mahsanihong ie: 24 “Nein-aramas, ndaiong ih, ‘Kowe sahpw ehu me sohte pahn kamwakelda, me keteu sohte pahn mweredi powe ni rahnen engieng. 25 Eh soukohp kan wiewia pilahn mwersuwed reh,+ duwehte laion men wie ngiringirki eh tetehrpeseng seike.+ Re kin kadallehla aramas* akan. Re kin kihsang soahng kesempwal oh dipwisou kesempwal kan. Re kahrehda eh tohtohla liohdi reh. 26 Nah samworo kan kauwelahr ei kosonned,+ oh re kin usehlahte kasaminehla ei wasa sarawi kan.+ Re sohte kin katohrepeseng dahme sarawi oh dahme sohte sarawi,+ oh re sohte kin kasalehda dahme samin oh dahme mwakelekel,+ oh re kahng kapwaiada ei sapad kan, oh I saminla nanpwungarail. 27 Eh lapalap akan me mi reh duwehte kidien wel kan me kin tetehrpeseng seikarail; re kin kakerehdi nta oh kemehla aramas* akan pwe ren kepwehpwehkihla.+ 28 Ahpw eh soukohp kan plasderihkihla arail wiewia kan litopw pwetepwet. Re kin kilang kaudiahl likamw kan oh kihda kosetipw likamw,+ oh re kin nda: “Iet me Kaun Wasa Lapalahpie Siohwa ketin mahsanih,” ni ngehi, Siohwa, sohte kin mahseniong irail. 29 Aramas akan en sahpwo kin widing oh pirap,+ re kin wiakauwe me lokolok kan oh me semwehmwe kan, oh re widingehdi mehn liki me kin kousoan rehrail oh sohte kin wiahiong ih pwung pahrek.’
30 “‘I raparapahki ohl emen nanpwungarail me pahn kak kamwahwihala kehl takaio de uh mwohi nan wasa pwalo pwehn doarehla sahpwo, pwe sahpwo en dehr kamwomwmwomwla,+ ahpw sohte me I diar. 31 Eri I pahn wudekihdiong ei engieng pohrail oh kasohrehkinirailla kisiniei en ei engieng. I pahn kihdiong pohn moangarail kan imwilahn arail wiewia kan,’ Kaun Wasa Lapalahpie Siohwa me ketin mahmahsen.”