Esekiel
23 Siohwa ketin pwurehng mahsanihong ie: 2 “Nein-aramas, mie lih riemen me ara nohno mehtehmen.+ 3 Ira wiahla lihen netiki paliwarara nan Isip;+ sangete ara pwulopwul ira kin netiki paliwarara. Wasao ira kin iang wia nenek oh ira sohla meipwon. 4 Me laudo ede Oh-olah,* oh rie serepeino adaneki Oh-olipah.* Ira wiahla ahi oh naitikihada pwutak kan oh serepein kan. A me pid adara ko, Oh-olah iei me Sameria,+ oh Oh-olipah iei me Serusalem.
5 “Oh-olah tepida netiki paliwere+ ni eh wiewiahte ahi. E kin inangih eh mwohnlimpoak kan,+ mehn mpe kan, iei mehn Asiria kan.+ 6 Irail kepina kei me likawih likou poh mei oh keriaun kaun kei—irail koaros mwahnakapw pwulopwul kaselel kei me mwomwohd pohn wararail oahs kan. 7 Oh-olah usehlahte netiki paliwere rehn me keieu kaselel en Asiria kan koaros, oh e kasaminehkihla pein ih+ en me e kin inangih kan dikedik kasaut kan.* 8 E sohte kesehla wiewiahn netiki paliwere me e kin wia nan Isip, pwe ni eh pwulopwul re wendi reh, oh re kin kauwehla eh meipwon oh re kin kihkihdi arail ineng* powe.+ 9 Eri I kihla ih nan pehn eh mwohnlimpoak kan, mehn Asiria kan,+ me e kin inangih. 10 Re kasalehda eh kilisou+ oh koledi nah pwutak kan oh serepein kan,+ oh re kemehkihla ih kedlahs pwoat. E adsuwedla nanpwungen lih akan, oh re kadeikada ih.
11 “Ni ahnsou me rie serepeino Oh-olipah kilangada met, eh ineng pil ahpwte suwedsang, oh eh netiki paliwere suwedsang me rieo wiahda.+ 12 E kin inangih mehn mpe kan, iei mehn Asiria kan,+ kepina kan oh keriaun kaun akan me likawih likou kaselel oh mwomwohd pohn oahs kan—koaros mwahnakapw kaselel kei. 13 Ni eh kasaminehla pein ih, I tehkada me ira koaros kin idawehn elen mour tehieu.+ 14 Ahpw Oh-olipah kin usehlahte kalaudehla eh wiewiahn netiki paliwere. E kilang ohl akan ar perperda ni dihd kan, kilel en mehn Kaldia kan me perperda oh litopwla poh weitahta, 15 me pirapirki kateng ni lukoparail kan, lisoarop reirei pohn moangarail kan, mwomwen sounpei kei. Irail koaros mwomwen mehn Papilon kan, me ipwidi nan sapwen mehn Kaldia kan. 16 Ni Oh-olipah eh kilangirailda, e ahpw mwadangete tepida inangih irail, oh e kadarala meninkeder kei rehrail nan Kaldia.+ 17 Mehn Papilon kan ahpw kin usehlahte kohdo nan eh peht en limpoak, oh re kasaminehkihla ih ar ineng.* Mwurin ar kasaminehla ih, e sohpeisang irail ni eh sautkinirailla.
18 “Ni Oh-olipah eh usehlahte netiki paliwere oh sohte namenengki oh kasale eh kilisou,+ I sohpeisang ih pwehki ei sautkihla, duwehte ei sohpeisang rie serepeino.+ 19 Oh e usehlahte kalaudehla eh wiewiahn netiki paliwere,+ tamatamanda rahn akan en eh pwulopwul ni eh netiki paliwere nan sapwen Isip.+ 20 E kin inangih irail duwehte pekehi kan en ohl akan me nair dipwisoun kaparapar kan duwehte nein dongki men oh oahs emen. 21 Ke kin inengieng en wia wiewia samin en omw pwulopwul nan Isip+ ni ar kin doahdoahke mwaremwaromw, omw dihdi kan ni omw pwulopwul.+
22 “Kahrehda, Oh-olipah, iet me Kaun Wasa Lapalahpie Siohwa ketin mahsanih: ‘I pahn kamwakidada omw mwohnlimpoak kan+ me ke sohpeisang ni omw sautkinirailla, oh I pahn wairaildo ren uhwong uhk sang wasa koaros,+ 23 mehn Papilon kan+ oh mehn Kaldia kan koaros,+ ohl en Pekod kan+ oh Soa oh Koa, iangahki mehn Asiria kan koaros. Irail koaros mwahnakapw kaselel kei, kepina kei oh keriaun kaun kei, sounpei kei oh me pilipilda kei,* koaros mwohd pohn oahs kan. 24 Irail pahn mahwenkihong uhk kurumahn mahwen tohto oh daiahn kuruma kan oh pwihnen sounpei laud ehu, mehn sansar laud oh mehn sansar tikitik oh lisoarop. Re pahn kapiluhkpene, oh I pahn ruwese irail ren kadeikuhkada, oh re pahn kadeik uhk nin duwen me re mwahuki.+ 25 I pahn kasalehda ei engieng pahmw, oh re pahn kasalehiong uhk ar lingeringer. Re pahn lupukasang tumwomwen oh salengomw kan, oh irail me luhwehdi pahn mehkihla kedlahs. Re pahn wahsang noumw pwutak kan oh serepein kan, oh irail me luhwehdi pahn mwasingkihla kisiniei.+ 26 Re pahn kapwuhrasang omw likou kan+ oh adihasang omw mehn kapwat kaselel kan.+ 27 I pahn katokehdi omw wiewia samin oh omw kin netiki paliweromw,+ me tepida sang nan sapwen Isip.+ Ke sohla pahn kilang irail, oh ke sohla pahn tamataman Isip.’
28 “Pwe iet me Kaun Wasa Lapalahpie Siohwa ketin mahsanih: ‘I pahn panguhkala rehn irail me ke kin kailongki, irail ako me ke sohpeisang ni omw sautkinirailla.+ 29 Re pahn kasalehiong uhk ar kailok oh kihsang mehkoaros me ke koadoahkihada+ oh kohkohsang uhk nan omw kilisouda douluhl. Kanamenekpen omw tiahk samin oh omw wiewia samin oh omw netiki paliweromw pahn sansalda.+ 30 Mepwukat pahn wiawihong uhk pwehki ke kin pwakih wehi kan duwehte lihen netiki paliwere men,+ pwehki ke kasaminehkinuhkala arail dikedik kasaut kan.+ 31 Ke kin idawehnte elen mour en riomw serepeino,+ oh I pahn kihdi nah kepo nan pehmwen.’+
32 “Iet me Kaun Wasa Lapalahpie Siohwa ketin mahsanih:
‘Ke pahn iang nim nein riomw serepeino kep me loal oh laud,+
Oh ke pahn wiahla mehn kemenkouruhr oh kepit, me kepo direkihla.+
33 Ke pahn lohdi pahn* sakau daulihala oh pahtou,
Kep en kamasepwehk oh tehnla,
Kep en riomw serepeino, Sameria.
34 Ke pahn anahne nim oh kanekehsang kanengen kepo+ oh rukoapene diperen kep pwehlo
Oh mwuri ke pahn leke* mwaremwaromwen.
“Pwe ngehi me mahmahsen,” Kaun Wasa Lapalahpie Siohwa me ketin mahmahsen.’
35 “Kahrehda iet me Kaun Wasa Lapalahpie Siohwa ketin mahsanih: ‘Pwehki ke manokeiehla oh pohnsehseiehla douluhl,*+ ke pahn weuwa imwilahn omw wiewia samin oh omw wiewiahn netiki paliweromw.’”
36 Siohwa eri ketin mahsanihong ie: “Nein-aramas, ke pahn lohki kadeik ong Oh-olah oh Oh-olipah+ oh uhkihong ira ara wiewia kasaut kan? 37 Ira wiadahr dipen kamwahl,*+ oh mie nta nan pehra kan. Ira sohte kamwahlte rehn ara dikedik kasaut kan, ahpw ira pil meirongkihla neira seri kan nan kisiniei* nin duwen mwenge kei ong ara dikedik kan.+ 38 Oh pil, iet me ira wiahiong ie: Rahno ira kasaminehla ei wasa sarawio, oh ira kasaminehla ei sapad kan. 39 Mwurin ara kemehla neira seri kan nin duwen meirong kei ong ara dikedik kasaut kan,+ ira kohlongodo nan ei wasa sarawio pwehn kasaminehla+ rahnohte. Ih met me ira wia nan tehnpeseio. 40 Ira pil kadarala meninkeder men pwe ohl akan en kohdo sang wasa doh.+ Ni ar kohkohdo, ke duhduhla oh litopwihala pwoaren mesomw kan oh kapwatahkinuhkada mehn kapwat kan.+ 41 Oh ke mwohndi pohn mehn mwomwohd kaselel ehu+ me tehpel ehu mi mwowe,+ tehpel me ke pwil ei warpwohmwahu+ oh ei leh powe.+ 42 Ngilen pokon en ohl ekei me sohte kin pwunodki mehkot ahpw kohkohda sang wasao, nanpwungen irail me kin kamamsakau kan me wisiklongodo sang nan sapwtehno. Re kihong luwou kan ni pehn lih ako oh nihn kaselel kan pohn moangara kan.
43 “Eri I ndahki lih me kin pwangada pwehki eh kin kamwahl: ‘Met e pahn kin usehlahte netiki paliwere.’ 44 Eri re kin usehlahte kohla reh, duwehte emen eh kin kohla rehn lihen netiki paliwere men. Ih met mwomwen ar kin kohla rehn Oh-olah oh Oh-olipah, lih en wiewia samin ko. 45 Ahpw ohl pwung kan pahn kadeingkihda ih kopwung me konehng ong kamwahl+ oh kakerehdi nta;+ pwe ira lihen kamwahl kei, oh mie nta nan pehra kan.+
46 “Pwe iet me Kaun Wasa Lapalahpie Siohwa ketin mahsanih: ‘Karis en sounpei ehu pahn kodohng ira pwehn wiahkinirahla mehkot kamasepwehk ehu oh mehkot en kulihasang.+ 47 Karis en sounpeio pahn katehkin ira takai+ oh pelehkinirapeseng neirail kedlahs kan. Re pahn kemehla neira pwutak kan oh serepein kan+ oh isikada imwara kan.+ 48 I pahn katokehdi wiewia samin en sahpwo, oh lih koaros pahn sukuhlki mehn kasukuhl ehu oh sohte pahn alasang amwa wiewia samin kan.+ 49 Re pahn wadohng pohmwa imwilahn amwa wiewia samin oh dihp kan me kumwa wiahda ni amwa kaudokiong amwa dikedik kasaut kan; oh kumwa pahn anahne ese me ngehi me Kaun Wasa Lapalahpie Siohwa.’”+