Esekiel
24 Ni keduwaun sounpar, ni kaeisek en sounpwong, ni kaeisek en rahn en sounpwongo, Siohwa ketin pwurehng mahsanihong ie: 2 “Nein-aramas, kilelehdi depe rahnwet,* rahnwette. Nanmwarkien Papilon tapihadahr eh mahweniong Serusalem rahnwet.+ 3 Oh koasoia lepin kahs ehu duwen aramas uhwong kan, oh ndahki duwen irail:
“‘Iet me Kaun Wasa Lapalahpie Siohwa ketin mahsanih:
“Kihda einpwoat en kuko;* kihda pohn kisinieio oh wudekiong pihl loale.+
4 Kihdiong lepin uduk kan loale,+ lapi mwahu koaros,
Dengeo oh pwopweo; audehkihda tih me keieu kaselel kan.
5 Ale sihpw me keieu kaselel sang pelin sihpwo,+ oh koasoakehda tuwi kan kapilpene pahn einpwoato.
Pwoailihada lapi ko, oh kukih tih ko loale.”’
6 “Eri iet me Kaun Wasa Lapalahpie Siohwa ketin mahsanih:
‘Meid suwediong kahnimw en kakerehdi nta,+ einpwoat mero, me eh mer kan sohte kohsang!
Kihsang kanenge, ehuehu lapi kan;+ dehpa wia usuhs ong irail.
7 Pwe ntahn kahnimwo mihmi loale;+ e wudekihdiong pohn takai mahsahs ehu.
E sohte wudekihdiong nin sampah pwehn pwainkihdi pwelpar.+
8 Pwehn kamwakidada engieng en ikih,
I kihdier eh ntao pohn takai melengileng mahsahso
Pwe ntao en dehr pweipweidi.’+
9 “Eri iet me Kaun Wasa Lapalahpie Siohwa ketin mahsanih:
‘Meid suwediong kahnimw en kakerehdi ntao!+
I pahn koasoakehda tuwi ko ile.
10 Koasoakehda tuwi ko oh saunda kisinieio,
Pwoailihada douluhl uduko, wudekihla pileo, oh mweidohng tih ko en roangala.
11 Kihdi einpwoat soh kanengeo pohn mwoalus kan pwehn karakarala
Pwe einpwoat pronso en karakarala oh weitahtahla.
Eh samin kan pahn peipeseng loale,+ oh eh mer kan pahn sohrasang.
12 Met kapwunod oh kapwang,
Pwe mer mosulo sohte pahn kohsang.+
Keselahng einpwoato nan kisinieio iangahki eh mer kan!’
13 “‘Omw samin kohsang omw wiewia samin.+ I song en kamwakeleiukada, ahpw ke sohte mwakelekelda sang omw samin. Ke sohte pahn mwakelekella lao ei engieng pahmw pahn meleileidi.+ 14 Ngehi, Siohwa, me mahmahsen. Met pahn wiawi. I pahn mwekid ni ei sohte pweiekla, sohte pahtoula, sohte koluhla.+ Re pahn kadeik uhk nin duwen omw wiewia kan oh mwekid kan,’ Kaun Wasa Lapalahpie Siohwa me ketin mahmahsen.”
15 Oh Siohwa ketin pwurehng mahsanihong ie: 16 “Nein-aramas, ni ahnsoutehkis I pahn kihsang uhk me ke poakohngo.+ Ke sohte pahn mwahieiki;* de pil ke sohte pahn sengiseng de kakerehdi pilen mesomw kan. 17 Ingitik loalomw, oh dehpa wia tiahk en mwahiei kan ong me mehla.+ Pirehdi omw lisoaropen,+ oh kihong omw suht kan.+ Ke sohte pahn perehla omw alisen,*+ oh ke dehpa tungoale pilawa me meteikan wadohng uhk.”*+
18 Oh I koasoiong aramas ako nimensengo, oh ei pwoudo mehla nin soutiko. Eri mandahn rahno I wia duwehte kehkehlik me I alehdio. 19 Aramas ako kin ndindaiong ie: “Komw sou pahn padahkihong kiht, ia duwen soahng pwukat me komw wiewia eh pidkitda?” 20 I sapeng irail: “Siohwa ketin mahsanihong ie, 21 ‘Ndaiong aramas en Israel kan: “Iet me Kaun Wasa Lapalahpie Siohwa ketin mahsanih, ‘I pahn kasaminehla ei wasa sarawio,+ wasa me kumwail kin pohnmwahsohki, me kumwail kin kesempwalki oh me mohngiongimwail kan kin inengieng. Noumwail pwutak kan oh serepein kan me kumwail pwilikihdi pahn mehkihla kedlahs.+ 22 Eri kumwail pahn anahne wia duwehte dahme I wiahiero. Kumwail sohte pahn perehla amwail alis kan, oh kumwail sohte pahn tungoale pilawa me meteikan wadohng kumwail.+ 23 Amwail lisoarop kan pahn mi pohn moangamwail kan oh amwail suht kan pahn mi ni nehmwail kan. Kumwail sohte pahn mwahiei de sengiseng. Ahpw, kumwail pahn matala nan amwail sapwung kan,+ oh kumwail pahn ingihngtikpene nanpwungamwail. 24 Esekiel wiahla kilel ehu ong kumwail.+ Kumwail pahn wia duwehte dahme e wiao. Ni ahnsou me met wiawi, kumwail pahn anahne ese me ngehi me Kaun Wasa Lapalahpie Siohwa.’”’”
25 “Oh kowe, nein-aramas, I pahn kihsang irail imwarail ihmw laud kehl kehlailo—mehkot kaselel me re kin perenki, me re kin kesempwalki, me mohngiongirail kan kin inengieng—iangahki neirail pwutak kan oh serepein kan.+ Rahno, 26 emen me pitila pahn pakairkihong uhk duwen met.+ 27 Rahno ke pahn sarapeseng oh koasoiong me pitilao, oh ke pahn pwurehng lokaiahda.+ Ke pahn wiahla kilel ehu ong irail, oh re pahn anahne ese me ngehi me Siohwa.”