Esekiel
25 Siohwa ketin pwurehng mahsanihong ie: 2 “Nein-aramas, sohpeilahng mehn Ammon kan,+ oh wia kokohp ong irail.+ 3 Ke pahn ndahki duwen mehn Ammon kan, ‘Rong mahsen en Kaun Wasa Lapalahpie Siohwa. Iet me Kaun Wasa Lapalahpie Siohwa ketin mahsanih: “Pwehki ke nda ‘Iao!’ ong ei wasa sarawio ni eh saminla, oh ong sapwen Israel ni eh tehnla, oh ong aramas en Suda kan ni ar kalipilipala, 4 kahrehda I pahn kihiukala rehn aramas en Palimese kan ren nainekinuhkala. Re pahn kauwada arail kahnimpwal kan* oh imwarail impwal kan rehmw. Re pahn kang wahn sapwomw, oh re pahn nim nimomw milik. 5 I pahn wiakihla Rappa+ mohs ehu ong kamel kan, oh sapwen mehn Ammon kan wasahn kommoal ehu ong pelinmen kan; oh kumwail pahn anahne ese me ngehi me Siohwa.”’”
6 “Pwe iet me Kaun Wasa Lapalahpie Siohwa ketin mahsanih: ‘Pwehki ke lopwolopw+ oh tomotomki nehmw kan oh ke perenkihda sapwen Israel ni soangen kepit kan,+ 7 kahrehda I pahn kapahwei limeiet rehmw pwehn kihiukala rehn wehi kan nin duwen mehkot ren kulihasang. I pahn kasohreiukala sang rehn aramas akan oh kamwomwuhkala sang sahpw kan.+ I pahn kamwomwuhkala, oh ke pahn anahne ese me ngehi me Siohwa.’
8 “Iet me Kaun Wasa Lapalahpie Siohwa ketin mahsanih: ‘Pwehki Mohap+ oh Seir+ nda, “Kilang! Aramas en Suda kan duwehte wehi teikan koaros,” 9 I pahn kahrehiong imwintihti kan ren mahweniong keilen* Mohap ni kahnimw kan me mi ni irepen sahpwo, kahnimw kan me kalingana sahpwo, Ped-sesimod, Paal-meon oh kohla lel Kiriadaim.+ 10 I pahn kihla Mohap iangahki mehn Ammon kan nin duwen sohso ehu ong aramas en Palimese kan,+ pwe mehn Ammon kan en manokonokla nan wehi kan.+ 11 Oh I pahn wia kadeik nan Mohap,+ oh re pahn anahne ese me ngehi me Siohwa.’
12 “Iet me Kaun Wasa Lapalahpie Siohwa ketin mahsanih: ‘Edom wiadahr mwekid en ikih ong aramas en Suda kan oh kahredahr dihp laud ni eh dupukohng irail;+ 13 kahrehda iet me Kaun Wasa Lapalahpie Siohwa ketin mahsanih: “I pil pahn kapahla limeiet ong Edom oh kemehla aramas oh pelinmen kan nan sahpwo, oh I pahn wiahiong en tehnla.+ Sang Deman kohla lel Dedan, irail koaros pahn mehkihla kedlahs.+ 14 ‘I pahn ikih Edom sang ni pehn nei aramas en Israel kan.+ Re pahn wahdo ei engieng kowahlap pohn Edom, pwe ren kehn ei ikih irail,’+ Kaun Wasa Lapalahpie Siohwa me ketin mahmahsen.”’
15 “Iet me Kaun Wasa Lapalahpie Siohwa ketin mahsanih: ‘Pwehki ar kolokolete kailok, mehn Pilisdia kan kin songosong ren ikih oh kamwomwala.+ 16 Eri, iet me Kaun Wasa Lapalahpie Siohwa ketin mahsanih: “I pahn kapahla limeiet ong mehn Pilisdia kan,+ oh I pahn kasohrehla mehn Kered kan+ oh pahn kamwomwala irail me luhwehdi kan me kin kousoan ni oaroahro.+ 17 I uhdahn pahn ikih irail oh kaloke irail ni engieng laud, oh re pahn anahne ese me ngehi me Siohwa ni ei ikih irail.”’”