Esekiel

46 “Iet me Kaun Wasa Lapalahpie Siohwa ketin mahsanih: ‘Ewen kehl en wasa me kelpene masloaleo me sallahng palimese+ pahn ritidi+ erein rahnen doadoahk weneu,+ ahpw e pahn ritida ni rahnen Sapad oh ni rahnen maram pwul. 2 Kaun emen pahn pedolong sang likio ni palangk en ewen kehlo,+ oh e pahn kesihnenda limwahn uhren wenihmw en ewen kehlo. Samworo kan pahn meirongki eh meirong isihs me pwonte isihsla oh eh meirong en kaminimin kan, oh e pahn poaridi ni taht en ewen kehlo oh mwuri e pahn pedoila. Ahpw ewen kehlo sohte pahn ritidi lao lel nin soutik. 3 Aramas akan en sahpwo pil pahn poaridiong mwohn silangin Siohwa ni wasahn pedolong en ewen kehlo ni rahnen Sapad kan oh ni rahnen maram pwul kan.+

4 “‘Meirong isihs me pwonte isihsla me kaun menet pahn patohwanohng Siohwa ni rahnen Sapado iei sihmpwul wol wenemen me roson mwahu oh emen sihpw wol me roson mwahu.+ 5 Meirong en krein pahn wia ihpah* ehu ong sihpw wolo oh sohte lipilipil uwen me e kak kihda ong sihmpwul wol ko, iangahki ihn* en leh ehu ong ehuehu ihpah.+ 6 Ni rahnen maram pwul, e pahn meirongki koupwul wol men me roson mwahu sang pelin kou kan, sihmpwul wol wenemen oh emen sihpw wol; mahn pwukat pahn anahne roson mwahu.+ 7 E pahn meirongki nin duwen meirong en krein ehu, ihpah ehu ong koupwul wolo, ihpah ehu ong sihpw wolo oh sohte lipilipil uwen me e kak kihda ong sihmpwul wol ko. Oh e pahn meirongki ihn en leh ehu ong ehuehu ihpah.

8 “‘Ni kaun menet eh pahn kin pedolong, e pahn pedolong sang ni palangk en ewen kehlo, oh e pahn pedoila wasaohte.+ 9 Oh ni aramas en sahpwo ar pahn kohlongodo mwohn silangin Siohwa erein kasarawi kan,+ irail me kohlongodo sang ni ewen kehl en paliepeng+ pwehn kaudok pahn pedoila sang ni ewen kehl en palieir,+ oh irail me kohlongodo sang ni ewen kehl en palieir pahn pedoila sang ni ewen kehl en paliepeng. Sohte me pahn pedoila ni ewen kehl me e pedolong ie, pwe re pahn pedoi ni ewen kehl me mi palilahsang irail. 10 A ong kaun me mi nanpwungarailo, e pahn pedolong ni ar pedolong, oh e pahn pedoi ni ar pedoi. 11 Erein kasarawi ko,* meirong en krein pahn wia ihpah ehu ong koupwul wolo, ihpah ehu ong sihpw wolo oh sohte lipilipil uwen me e kak kihda ong sihmpwul wol ko, iangahki ihn en leh ehu ong ehuehu ihpah.+

12 “‘Ma kaun menet kaunopada meirong isihs ehu me pwonte isihsla+ de meirong en kaminimin kan nin duwen meirong ehu sang ni nsene ong Siohwa, ewen kehl me sallahng palimese pahn ritidahng ih, oh e pahn kaunopada eh meirong isihs me pwonte isihsla oh eh meirong en kaminimin kan duwehte me e kin wia ni rahnen Sapad.+ Mwurin eh pedoila, ewen kehlo pahn ritidi.+

13 “‘Ehuehu rahn ke pahn kaunopada sihmpwul wol roson mwahu men me sounpar ehu nin duwen meirong isihs me pwonte isihsla ong Siohwa.+ Ke pahn wia met nimenseng koaros. 14 Patehng met, nimenseng koaros ke pahn kaunopada wenekis ehun ihpah nin duwen meirong en krein ehu, iangahki silikis ehun ihn en leh mehn usupihki pohn pilawa amas mwahwo nin duwen meirong en krein me kin kaukaule wiawi ong Siohwa. Met koasoandi poatopoat ehu. 15 Re pahn kaunopada sihmpwul wol, meirong en krein oh leh nimenseng koaros nin duwen meirong isihs me pwonte isihsla me kin kaukaule wiawi.’

16 “Iet me Kaun Wasa Lapalahpie Siohwa ketin mahsanih: ‘Ma kaun emen kihla sahpw nin duwen kisakis ehu ong emenemen nah pwutak kan nin duwen sohso, met pahn wiahla sapwen nah pwutak ko. Sapwarail met sang ni sohso. 17 Ahpw ma e kihong emen nah ladu ehu sahpw sang eh sohso, e pahn sapweniki met lao lel pahr en saledek;+ oh mwuri sahpwo pahn kapwurupwurla rehn kaun menet. Ihte nah pwutak kan me kak ahneki eh sohso kohkohlahte. 18 Kaun menet sohte pahn ale sohso ehu sang aramas akan ni eh ngihtehtehkiong irail en kohkohsang sapwarail. E pahn kihong nah pwutak kan sohso ehu sang pein sapwe, kahrehda sohte emen nanpwungen nei aramas akan pahn pekeussang nan sapwe.’”

19 Ih eri kahreiehla loaleo ni wasahn pedolong+ me mi limwahn ewen kehl me kolahng perehn mwenge sarawi ko* en samworo kan, me sallahng paliepeng,+ oh I kilangada wasa ehu mwurin perehn mwenge ko me sallahng palikapi. 20 E ndaiong ie: “Ih wasaht me samworo kan pahn pwoailih meirong en tomwki dihp oh meirong en dihp oh wasa me re pahn umwunda meirong en krein,+ pwe ren dehr wa mehkot kohieila wasa me kelpene maslikio oh kadaur sarawi* ong aramas ako.”+

21 E kahreiehla wasa me kelpene maslikio oh kahre ie daulih keimw pahieu ko en wasa me kelpeneo, oh I kilangada wasa me kelpene ehu limwahn ehuehu keimw en wasa me kelpene maslikio. 22 Ni keimw pahieu ko en wasa me kelpeneo mie kisin wasa kelpene kei. Re reireiki kiupid* 40 oh tehlapki kiupid 30. Meh pahieu ko koaros wehteieu.* 23 Mie kisin dihd kei* me kapilpene meh pahieu ko koaros, oh pahnangin dihd ko mie wasa kokouda kei mehn pwoailih meirong ko. 24 Ih eri ndaiong ie: “Ih ihmw pwukat me sounpapah kan en tehnpas sarawio kin pwoailih en aramas akan meirong.”+